1 beεεeδ wahen elkul rebbi ijerreb ibrahiym. inebaθ: «ibrahiym!» yer felles: «enεem.» 2 yennes: «awi memmiyx isHaq elli elγrexc kan ennette welli texset. qam imenex texDmeδ y elqeεεeθ n elmureyye teγrset* teHrqet emecwiyheθ f icθ seg edhari elli δexentessexne.» 3 elweječe ibrahiym yekker bekri yquS isγaren yweHreq iberδeε f eγyules yawi sen seg ixeddemnes dmemmis isHaq yersem δeyexDem y wemxan elli yuθlayes felles rebbi. 4 uggas eθθaleθ yqam ibrahiym tiTTewines yezer emxan seg lebεiyδ. 5 yen ibrahiym y ixeddemnes: «eqqiymeθ dweγyul dahen, neč dwefruwx δenali enezzal y rebbi usiyn exennerjeε.» 6 yqam ibrahiym isγaren n weHraq f memmis isHaq, yawi nette elεafyeθ ettesferθ. exeDmen essenniyn jmiyε. 7 yennes isHaq y daddes: «dadde!» yer felles: «enεem, memmi.» yenceδt: «tay elεafyeθ disγaren, umani eεelluc elli δeθneγres, n eHreqθ?» 8 yer felles ibrahiym: «δrebbi δeyδebber eεelluc n weHraq, emmi.» exeDmen essenniyn jmiyε. 9 max i θiwDen y wemxan elli y ennayes felles rebbi, ibrahiym yebne elmeδbeHdiyn iHeDDer isγaren, yeqqen memmis isHaq iHuTTi f elmeδbeH δenni isγaren. 10 yezzel ibrahiym efuses yqam tesferθ bac e yeγres memmis. 11 yaxi inebaθ elmlax n rebbi seg esme yennes: «ibrahiym! ibrahiym!» yer felles: «enεem.» 12 yennes: «eθlemsec memmiyx! esθegeδ Hette cey! εlexaTer ture essene elli cex ettekkaδeδ seg rebbi welterriyc felle memmiyx elli elγrexc kan ennette.» 13 yqam ibrahiym tiTTewines yezer elkebc weHδes, yuHel seg legrunes g eθzuwre, yexDem ibrahiym yeγet yeγresθi yeHreqθi g wemxan n memmis. 14 ysemme ibrahiym emxandiyn* «rebbi yetδebber.» welluciyn eqqaren elture: «g eddehreθ n rebbi yetδebber.» 15 inabe elmlax n rebbi ibrahiym seg esme tikkelt xlaf, 16 yennes: «yenne rebbi, εlexaTrek θegiyδ wahen welterriyc felle memmiyx elli elγrexc kan ennette, eθjulle s imeniyw, 17 tay rebbi mat iyenne, rahu δebarxe δiyx uδerre ezzerriεθex emiθran n esme dermel n ecceT, uδeγelben elεδunsen ewyen timuransen. 18 uleεbaδ n eddunyeθ elkul δesθbarxen s idreriyx εlexaTer tesliyδ edwiyw.» 19 yeδwel ibrahiym y etwali ixeddemnes ersmen δexeDmen elkul ibiyr sebεe meni δeyedder ibrahiym.

20 beεεeδ wahen yemmennes yibrahiym: «milkeh zade tiru idrari y enjenjwex n aHuwr.» 21 εuwSa emeqqar denjenjwes buwza dgemuwYiyl daddes n eram 22 dkased dHezwa dfildac dyedlaf dbetuwYiyl 23 elli yuγeδ rifqeh, eθmenyaye tiruθen milkeh y n aHuwr enjenjwes n ibrahiym. 24 tarwes rewuwmeh liweces g esser, TabeH, jaHem, taHec dmeεkeh.