1 ykan ibrahiym ygeεmez g iymi n wexyemes y etwali elbaluT n memra elweqθelli ibanes rebbi ykan as yesxen. 2 yqam tiTTewines yaxi yezre tlaθe δiryazen bedden ezzeθes, yexDem yettezzel seg iymi n texyamt etwelinsen yesjeδ g elqeεεeθ. 3 yenne iyjen essisen: «ya siydiy, neč g elxeδmtex eg felle elmziyyeθ eθeθεeddiyc. 4 edj exenneddaγe qiqqi n wamen eθessirδem essis ikreεnennum tettekkam s eddu eccejreθ, 5 usiyn exenneddaγe eTTerf n weγrum eθsuddem essis erriqennum, usiyn eθeθεeddem. εlexaTer etteθεeddamc siyn f elHuciyw.» erren f elles: «bahi, emmax i θenniyδ.» 6 yezzel ibrahiym y liweces sarreh g texyamt yennes: «fiyseε! qam tlaθe δelkiylaθ seg aren ebehhay eεjenti tegeδ eγrum.» 7 ubeεεeδ yuzzel ibrahiym y etwali esεiys yexθar eyenduwz yebhe yuwci y uxeddam elli yezreb iHeDDerθi. 8 elweqθelli iĎab eyenduwz yewyesenti nette dweγi delHliyb, iHuTTiyn ezzeθensen ibed y etwelinsen s eddu eccejreθ bac e nyexδem unihnin tetten. 9 usiyn encδent: «mani liwecex sarreh?» y er fellasen: «tenniθ g texyamt.» 10 yennes iyjen essisen: «δexerjεe esukkes ejjay emelweqθe wahen ettewθes eθkuwn sarreh liwecex tirew efruwx.» sarreh tkan δefres y etwali elbab n texyamt tesl edwiys. 11 ibrahiym dsarreh kanen δiwessaren δimkemmlen usarreh teθεedde elεmer n warew. 12 teS g ules ten: <endre beεεeδ iyexDem elεemriyw yeδwel eryaziyw δewesser eyeddes elxiyre elkul?> 13 yen rebbi y ibrahiym: «imette eteSSe sarreh ten: <zeεme mbelHeq eδerwe efruwx uneč δtewessarθ?> 14 endre telle Haje tuεer f erreb? δexerjεe esukkes ejjay emelweqθe wahen ettewθes eθkuwn sarreh tiru efruwx.» 15 tekkuδ sarreh tenker: «ellessixc.» yennes: «la, teSSiyδ.»

16 usiyn ekkeren iryazen eTfen ebriδ qeblen y etwali seduwm. yexDem ibrahiym iyδsen bac e nniceyyeε. 17 yen rebbi g ules: «zeεme ejeHδe f ebrahiym δme δege? 18 wibrahiym yelzem eyeδwel θemuwreθ temeqqarθ uteqwe umidden n elqeεεeθ elkul δeθberxen essis 19 εlexaTer neč exθeraθ bac e yweSSe idreriys dmidnes beεδes bac e sθeHfDen uffebriδiyw s wage n elxiyr, usahen yumken ege elli uεeδe essis.» 20 ubeεεeδ yenne rebbi: «ecθxe esseduwm deεmuwreh yeδwel belHeq egget weccerrensen yexθer egget (uleδnubensen xθeren), 21 δegze bac e reqbe elεmeylensen emmax i cθxen ziyγ la. wiδekan la ture essene.» 22 exDmen iryazendiyn lessen elli iyδes esyiyn y etwali seduwm, emme rebbi yeqqiym dibrahiym. 23 yeqreb ibrahiym lezzaθ yen: «δeθehelxeδ ebehhay (elli yetDeweε) dumuwHac (delli yetDewiεc) jmiyε? 24 zeεme lukan θemuwreθ δiys xemsiyn waHed δibehhayen endre δettehlxeδ wettetedjiyc f elxaĎer n xemsindiyn elli δiys? 25 Hacak kan δeθehelxeδ ebehhay dumuwHac jmiyε, ebehhay eyeδwel emumuwHac! Hacak! endre elHakem n eddunyeθ elkul liHekkemc δimseggem?» 26 yennes rebbi: «kan ufiyγ xemsiyn δibehhayen g esduwm δedje emxan elkul f elxeĎrensen.» 27 iεaweδ ibrahiym yenne: «ecbiyni dukkiyγ y rebbi sahen uneč kan δecal diyγeD. 28 lukan xemsiyndiyn enqezen essisen xemse? δeθehelxeδ θemuwreθ elkul f xemsadiyn yneqSen?» yer felles: «ethelxac iδekan ufiyγ xemse werbεiyn diyn.» 29 yennes ibrahiym xlaf: «lukan eθafeδ erbεiyn diyn?» yer felles: «ethelxac f elxaĎer n erbεiyndiyn.» 30 yennes ibrahiym: «eg elmziyyeθ eθeθγeccec, edjiyδ eθuθlaye. lukan eθafeδ tleθiyn diyn?» yer felles: «ethelxac iδekan ufiyγ tleθiyn diyn.» 31 yen ibrahiym: «rebbi, samHiyδ eθseybe g edwi. lukan eθafeδ εicriyn diyn?» yennes: «ethelxac f elxaĎer n εicriyn.» 32 yen ibrahiym: «eg elmziyyeθ eθeθγeccec, δeθuθleye exxer merre. lukan eθafeδ εecre diyn?» yennes: «ethelxac f elxaĎer n εecre.» 33 umax i ykemmel rebbi seg edwiys dibrahiym yexDem f imenes. wibrahiym yeδwel y wemxenes.