1 max i yeδwel ebram elεemres tesεe utesεiyn yeffeγes rebbi yennes: «neč δerreb elqader, seferHiyδ eθkuwneδ δeSSaleh, 2 welεehδiyw binatne neč dcex, uδedje ezzerriεθex egget egget.» 3 yesjeδ ebram yennes rebbi: 4 «wahen δelεehδiyw iyδex. δeθeδewleδ δeljed n midden egget, 5 meεεač ellesmex *ebram δeθeδwel ibrahiym εlexaTer erriyγex δeljed n midden egget. 6 uδexerre etterweδ egget, uδage midden essix, Hette lemluwk δefγen essix. 7 δege elεehδiyw iyδex usiyn didreriyx beεδex eljiyl beεεeδ eljiyl uδeyeqqiym diyme, δekuwne δerreb icex uyidreriyx beεδex. 8 uδexuwce cex didreriyx beεδex elqeεεeθ n kenεan elkul elli teεmereδ δiys emuberrani, δewce baqi, uδekuwne δerrebbensen.» 9 yennes rebbi y ibrahiym: «emme cex yelzmex eθetfeĎ elεehδiyw iyδex didreriyx beεδex eljiyl beεεeδ eljiyl. 10 utay elεehδiyw elli yelzmex eθetfeĎ binatne didreriyx beεδex <kul edxer essiywem yelzem eyemĎehher*.> 11 eĎehher δeykuwn ellemareθ n elεehδiyw iyδwem. 12,13 kul edxer γers θmenye eyyam kul iyjen seg ixeddemnex elli emmarwen γerx dixeddamen elli tesγitten s leflusex s γer iberreniyyen yelzem eyemĎehher eljiyl beεεeδ eljiyl. 14 kul edxer elyemĎehherc yelzem eyemgelleb seg midnes εlexaTer elyettiyfc elεehδiyw.» 15 yennes rebbi y ibrahiym: «emme liwecex saray meεεač etsemmiyδ saray, δeyeδwel ellesmes sarreh. 16 δebarxe δiys uzade δexuwce efruwx essis. δebarxe δiys uδeθerre δyemme n midden egget Hette lemluwk δefγen essis.» 17 ibrahiym yesjeδ, yen y imenes, <eyemmaru efruwx y weryaz γers myat sne? weθged sarreh elli γers tesεiyn sne eθaru efruwx?> y eS. 18 yennes ibrahiym y rebbi: «imette muc δismaεiyl eyyuwreθ?» 19 yer felles rebbi: «la, sarreh liwecex netteθ elli δexθaru efruwx uδetsemmiyδ isHaq. uδage elεehδiyw iyδes didreriys beεδes uδeyeqqiym diyme. 20 wismaεiyl tay sliyγex uδebarxe δiys uδeθerre yettaru egget egget, δeyeδwel δdadde n eθnac δlejduwd, uδeθerre n midden egget. 21 emme elεehδiyw δeθege disHaq elli δettaru sarreh esukkes ejjay emelweqθe wah.» 22 max i ykemmel edwiys, rebbi yedje ibrahiym yexDem. 23 esses ibrahiym yuγeδ ismaεiyl memmis dixeddamen elli emmarwen g elHuces elkul, delli emmesγen s lefluses, kul edxer seg elHuces iĎehherθen emmax i syenne rebbi. 24,25 ibrahiym ykan elεemres tesεe utesεiyn umemmis ismaεiyl θleTTac elweqθelli emĎehren. 26 uggas iyjen emĎehren lessen: dadde dmemmis. 27 leδxuwr n elHuwc n ibrahiym elli emmarwen diyn delli emmesγen s lefluws elkulhum emĎehren iyδes.