1 ligeddec yuwsef eyeTTef imenes ezzaθ n ixeddemnes. elweqθes yezge fellasen yen: «efγeθ felle elkul.» welyeqqiym Hette iyjen diyn max i senyenne yuwsef f elHqiqθes. 2 yekker yuwsef iθerw eSbiyH elmi iθesliyn imiSriyyen delli g elHuwc n ferεuwn elkul. 3 welbeεδ yenne yuwsef y eyeθmes: «neč dyuwsef, elyuwc dadde yedder?» yemenni eyeθmes elgeddenc esuθlayen lexeTerhum ukkeδen essis. 4 yenne yuwsef y eyeθmes: «esδeθ etweliyw.» eqrebnes. elweqθes yenne: «neč yuwweθwem yuwsef elli ezzenzemti y miSr. 5 uture eθukδemc weθeθHecmemc lexeTerkum ezzenzmi y miSr. δrebbi yexs sah unette elli yuzeniyδ eldah qeblewwem bac e xenmenεe xenyum dleεbaδ s temettent. 6 ture θεedden εamiyn δezzemmeθ fellane welluciyn xemse sniyn xlaf welδiysen la δexrez ula δamjer. 7 yuzeniyδ rebbi y elqeεεeθe qeblewwem bac e θafem δ wiyn exenymenneε s temettent usinc eqqiymen idreriywwem edderen. 8 eyθuzinemc δxenyum eldah, yemenni δrebbi yegeyiyδ δennayeb n ferεuwn weyendeγ ewkiles f elHuces uδelHakem n miSr elkul. 9 rewHeθ fiyseε ydadde tenmes, yennayex memmiyx yuwsef. rahu rebbi yegeyiyδ δelHakem f miSr elkul. est etweliyw fiyseε w eθεeTlec. 10 bac e θeδewlem etweliyw usinc eθeεmreδ cex didreriyx didrari n idreriyx delHucewwem elkul g elqeεεeθ n jasan. 11 uture exεawne diyn lexaTer elluciyn xemse sniyn δezzemmeθ usinc wetteHθajeδ Hette cey cex didreriyx delli iyδex elkul. 12 utaye tezriymi seg tiTTewinewwem xenyum dbenyamiyn elli eryaze elli iδukkeyawem ture eyendeγ yuwsef yuwweθwem. 13 emerqeθ enneθ y dadde f elqeδriyw g miSr. tenmes f elli tezriymti elkul. teγδemti fiyseε fiyseε eldah.»

14 iγemmer yuwsef yuwwes benyamiyn, yekker benyamiyn iθerw unette f texrumt n yuwsef. 15 ubeεδ ikub eyeθmes elkul yekker yuwsef iθerw iyδsen, ebδen dukkanes.

16 yiweD elxber y elqSer n ferεuwn elli ewmaθen n yuwsef usiynd. yefreH ferεuwn dixeddamen n elqeSres s edwiye elli slinti. 17 yenne ferεuwn y yuwsef: «en y eyeθmex eεebben iγyelensen siyrδen usinc eδuwlen y elqeεεeθ n kenεan. 18 taγδem daddeθwem delli ennewwem tesδem etweliyw taye δexennuwce elqeεεeθ tebhe egget g miSr bac eθečem seg elxireθes. 19 θendasen zade: awyeθ iyδwem tikerriytin seg elqeεεeθ n miSr ettaγem δiysneθ idreriywwem delwacunewwem weθetwemc ettaγem daddeθwem iyδwem. 20 weθendmemc f egliywwem elli δettedjem g elqeεεeθ n kenεan lexaTer elxiyraθ n elqeεεeθ n miSr elkul y xenyum.»

21 egen idrari n yeεquwb max i senyenne ferεuwn. yuceyasen yuwsef tikerriytin δelεwin y webriδ. 22 yuwce ikul iyjen essisen elkesweθ ettejδiyt yemenni benyamiyn yucayes tlaθe myat δelfeTTeθ dxemse δelksawi. 23 yazen y daddes εecre δiγyal εebben s elxiyraθ n miSr uεecre ettiγyal εebbaneθ δiyrδen dweγrum δelεwin y daddes g webriδ. 24 welbeεδ yuzen eyeθmes δerewHen yemenni iweSSaθen yenneyasen: «erbellewwem eθemεarxem g webriδ.» 25 efγen seg miSr egguwren δerewHen elmi δiwDen daddensen yeεquwb g elqeεεeθ n kenεan.

26 ennanes: «yuwsef elyuwc yedder unette eyendeγ elHakem n miSr elkul ture.» yettusemmer yeεquwb geθbuqεettes weligeddec eySeddeq δmat iyesle. 27 welbeεδ ennanes δmat isenyenne yuwsef. umax i yezre yeεquwb tikerriytin elli yuzentent yuwsef bac eθewiyneθ y miSr, uzzelen iδammen g uδmes elmerreθ xlaf. 28 yenneyasen: «neč yezziyi elli memmi yuwsef elyuwc yedder. neč exse emerqe eθenziyγ qebl n elli emmuwθe.»