1 yesfekker rebbi sarreh emmax i yenne, yeges elli yuεeδt essis. 2 taru sarreh efruwx y ibrahiym unette δewesser, g elweqθ elli yennayes felles rebbi. 3 ysemme ibrahiym memmis elli tirwasθ sarreh <isHaq>. 4 iĎehherθ uggas eθθamen emmax i syenne rebbi. 5 ibrahiym ykan elεemres miyye max i syemmaru isHaq. 6 ten sarreh: «yessessiyδ rebbi. elli eyesl eyeS iyδi.» 7 terni xlaf: «δ wiyn ykan esyen y ibrahiym elli sarreh δeθessesf idrari? tay iruwγes efruwx max i yuwser.»

8 yekber efruwx efeDment. as n wefĎemes yege ibrahiym elfĎuwr δemeqqar. 9 tezr sarreh elli memmis n hajer temiSriθ elli tiruθ y ibrahiym yδeS* f memmis isHaq, 10 ten y ibrahiym: «gelleb texeddamte dmemmis, memmis n texeddamt liwerreθc dmemmi, memmi isHaq.» 11 ibrahiym eθyeεjiybc egget edwiye εlexaTer ismaεiyl zade kan δmemmis. 12 yennes rebbi: «eθxememec f wefruwx ziyγ f eθxeddemtex, tesleδ edwi n sarreh g elli exetten elkul εlexaTer s isHaq δeδuwlen γerx idrari. 13 useg memmis n texeddamt zade δege θemuwreθ εlexaTer Hette nette seg ezzerriεθex.» 14 yekker ibrahiym talji bekri yawi eγrum etteyeddit n wamen yezzelten y hajer, yegin f elkeθfes, igellebt netteθ dmemmis, tehmel g eSSeHreθ n biyr sebεe. 15 umax i kemlen amen tedje memmis s eddu tezuwre. 16 texDem tgeεmez tqabelt, myat mitr εelleqel, εlexaTer tenne g ules: «elHeTrac ejafi n wefruwx.» teqqiym tebδe etεeyyeĎ. 17 yesl rebbi efruwx yetεeyyeĎ n wefruwx, inabe elmlax n rebbi hajer seg esme yennes: «mette imiqelleq ehajer? eθukδc εlexaTer rebbi yesle eεeyyeĎ n wefruwx meni iyemmedj. 18 berre tessikreδ memmiym, teTfet eSbiyH εlexaTer δeθerre ettemuwreθ temeqqarθ.» 19 usiyn ymiyres tiTTewines tezr esuγ n wamen, texDem tεebbe teyeddit tessesw efruwx. 20,21 yelhe rebbi esefruwx yekber, yeεmer g eSSeHreθ n faran, yeδwel iged egget eHδaf n ennebleθ. taγes yemmes temeTTuwθ seg miSr.

22 g elweqtdiyn ebiymalek delqayeδ n eljices fiykuwl yuseδ y ibrahiym yennes: «ture rebbi iyδex g elli ettegeδ δiys elkul, 23 eθjul s rebbi elli eltγedrec essi ula s idreriyw ula s idrari n idreriyw, welli δeyθegeδ elxiyr y neč dleεbeδiyw elli θeddereδ mabinathum lewse, emmax i giyγ elxiyr δiyx.» 24 yen ibrahiym: «eθjulle.» 25 usiyn yeεrex ebiymalek f elxaĎer n wanu elli iwyent ixeddamen n ebiymalek. 26 yen ebiymalek: «ellessinac δ wiyn iyege wahen, ucex eyθenniyc, wellesliyγ essis kan asse.» 27 usiyn yuwce ibrahiym y ebiymalek esεi difunasen egen elmiθaq. 28 yefrez ibrahiym sebεe ettifĎiymin weHδesneθ seg esεiys. 29 yennes ebiymalek: «δmette iθexseδ eθenneδ essebεeye n tifĎiymin intefrzeδ weHδesneθ?» 30 yer felles: «θiyhen sebεe exse entewyeδ ettifĎiymin exenttuwce δeccehδeθ s γeri elli neč eHfere enuwe.» 31 usahen elεebδ eysemme emxandiyn *biyr sebεe εlexaTer ibrahiym debiymalek eθjullen diyn lessen. 32 ubeεεeδ egiyn elmiθaq g biyr sebεe, yekker ebiymalek dfiykuwl elqayeδ n eljices erjεen y elqeεεeθ n ifilesTiyniyyen. 33 yezzu ibrahiym eccejreθ neθθel g biyr sebεe, yeδεu s ellesmes rebbi elli diyme yedder. 34 yedder g elqeεεeθ n ifilesTiyniyyen elfetreθ tiTwilt.