1 rebbi (elli diyme nette) yennayes y ebram: «qam imenex tedjeδ elqeεθex d midnex delHuwc n daddex. temreqeδ y elqeεεeθ elli δxessexne. 2 δege essix midden egget uδebarxe δiyx edje ellesmex δemeqqarθ ufelxaĎrex δebarxe g leεbaδ xlaf. 3 δebarxe g ihelli etberexnex uδeleεne ihelli etsubben δiyx, wessix δcex δebarxe g leεbaδ n eddunyeθ elkul.» 4 yerHel ebram emmax i syenne rebbi, elweqθes ebram γers xemse usebεiyn sne max i yeffeγ seg Haran. 5 yawi iyδes saray liweces dluwT memmis enjenjwes delli layment elkul dleεbaδ elli γersen g Haran. exDmen y elqeεεeθ n kenεan. max i θiwDen diyn, 6 ebram yuyuwr g elqeεεeθ eδeyaweδ y eccejreθ temeqqarθ n muwre g eckiym. elweqθes ikenεaniyyen εemren g elqeεεetdiyn. 7 yeffeγes rebbi y ebram y ennes: «y idreriyx δeθuwce elqeεεeθ.» yebne ebram emxan n waγres y rebbi g wemxan elli yeθheyYes δiys. 8 esyiyn yexDem y edhari g eccerq n biytiyl. yenSeb exyemes mabiyn biytiyl seg eggaz n tefuwθ uεay seg aqqes. yebne diyn elmeδbeH y rebbi. yeδεu s ellesmes.✝ 9 yeqqiym yreHHel y etwali eSSeHreθ n enneqeb.

10 teseδ elmejaεeθ g kenεan, yeggez ebram y etwali miSr bac e yedder lewse diyn εlexaTer elmejaεeθ teqSeH egget. 11 max i yiweD y etwali miSr y ennayes y liweces saray: «tesseneδ elli cem tebhiyδ. 12 umax emezren imiSriyyen δennen, <θahen δliweces.> usiyn δeyyenγen edjnem cem 13 eg elmziyyeθ ennasen elli cem δweltme* f elxeĎrem δeyyedjen eddere uδeyεamlen belgde.» 14 max i yuwδef y miSr, imiSriyyen zriyn elli netteθ δtemeTTuwθ tebhe egget. 15 ixeddamen n ferεuwn zrint zade ecxerent y etweliys ewyent y elHuces. 16 f elxeĎres ferεuwn yεamel ebram belgde yeδwel γers esεi difunasen diγyal ettiγyal dixeddamen etxeddamin dileγman. 17 emme rebbi yesebben egget ferεuwn dmidden n elHuces f elxaĎer n saray liwec n ebram. 18 inabe ferεuwn ebram yennes: «δmette iθegiδ? imette eyθenniyc elli netteθ δliwecex? 19 imette iθenniyδ elli netteθ δweltmax? ewiyt bac e θeδwel δliweciyw. tayet liwecex ewiyt texDmeδ.» 20 yweSSe ferεuwn ixeddemnes f ebram ceyεent nette dliweces delli γers elkul.