1 beεεeδ wahen elkul rebbi yuseδes y ebram emtirjiyθ yennes: «eθukδec, ebram, δeεusse fellex, ellejrex δemeqqar egget.» 2 yennes ebram: «ya rebbi siydiy, δmette δeyθuwceδ w neč elγriyc idrari welli δeyuwreθ nette δeliyεazer eddimecqiy?» 3 yennayes xlaf: «eyθuwciyδ Hette efruwx, utay exeddam yemmaru g elHuciyw ennette δeyuwreθ beεδ emmuwθe.» 4 yennes rebbi: «eryaz exywerreθc, emme elli δexyemmaru nette elli δexyuwreθ.» 5 yessufeγθ rebbi elberre yennes: «erqeb lennej teHsbeδ iθran, iδekan eθgeddeδ enteHsbeδ. idreriyx δekuwnen siyn.» 6 yuwce eθθiyqeθ y rebbi elli yeHsbest δelHesneθ. 7 yennes: «neč δerreb elli yuγeδex seg uwr n ikeldaniyyen bac e xuwce elqeεεeθe bac e ttemlxeδ.» 8 yaxi yenceδt: «ya rebbi siydiy, max δesne elli neč δettemlxe?» 9 ijewebθ rebbi: «eγδiyδ teyenduwzθ ettixsi delkebc elεemrensen tlaθe sniyn etmelle etteδbiyrθ temezyent.» 10 yeγetten yeγresθen elkul yzuwnin f sen yHuT kul ezyen yqabel wissen. kan δizenniwen ennizuwnc. 11 umax i bδen elεgabaθ ettegzen bac e čen, ygellebθen ebram. 12 umax i θebδe tefuwθ δeθeggez, ebram yeγlebθ enuddem, usiyn tireDt tsellesθ δtimδellemt egget uθessekkeδ. 13 yennes rebbi: «yelzem eθesneδ elli idreriyx δeθγerben g elqeεεeθ muc δeglinsen uδebδan δixδiymen diyn uδagen δiysen erbεe myat sne. 14 uδesubbe ihelli sθeεbδenten, usiyn δefγen s elmelx egget. 15 emme cex eθedreδ egget, ubeεεeδ i θjafeδ usiyn etemmerδmeδ merθaH. 16 unihnin δeδuwlen eldahen g eljiyl errabeε εlexaTer elγeldeθ n leεbaδ elli edderen dah eltuwc eltuqiyc bac e ntHakme.» 17 ubeεδ iθeggez tefuwθ tessulles eddunyeθ, yaxi ebram yezre elxanuwn dulehlab n elεafyeθ ečuwq g leĎruwfdiyn. 18 esses yeθfahem rebbi debram yennes: «δeδuwce y idreriyx elqeεεeθ seg esuwf n miSr (n elεeriyc) elwesuwf emeqqar, esuwf n elfuwrat: 19 elqeεεeθ elli εmeren δiys iqeyniyyen diqenziyyen diqedmuwniyyen 20 diHeθθiyyen diferziyyen direffiyyen 21 dimuwriyyen dikenεeniyyen dijerjeciyyen dibuwsiyyen.»