1 w sahen yekmel exlaq n esmawaθ d elqeεεeθ d elli δiysen elkul 2 uggas essades ykemmel rebbi elli ykan yθeg δiys, uggas essabeε yerθaH. 3 ybarex rebbi as essabeε yqeddesθ, εlexaTer ykemmel δiys elli yexleqθ elkul. yerθaH essis seg w exlaq.

4 sahen esmawaθ d elqeεεeθ emmexleqneθ. 5 leHebbe la eccejer la elHec g elqeεεeθ, εlexaTer rebbi elyuwc elyuziync amzer, uleHebbac δ wiyn δeyexδem elqeεεeθ. 6 emme eθkan telle telmuyθ ettali seg elqeεεeθ tesseswe kul cey. 7 yeg rebbi elεebδ seg ecal yenfex g elxecmes ennesmeθ n weddar, yeδwel adem δ elεebδ yedder. 8 yeg rebbi ejjenneθ g εeden yetwali aqqes n tefuwθ, iHuT d iyn adem elli yexleqθ. 9 yexleq rebbi lenwaε elkul n eccjer g elqeεεeθ elmenDrensen yebhe w ettarwen elγelleθ teHle, uggemmes n ejjenneθ yexleq eccejreθ n weddar d eccejreθ n wassen n elxiyr d eccer. 10 ykan yelle esuwf yeffeγ seg εeden bac e yessesw ejjenneθ, esyiyn eyemzuwn f erbεe. 11 emezwar ellesmes fiycuwn, esuwf elli yenneD f elqeεεeθ n eHwiyle elli δiys uwreγ. 12 uwreγ n elqeεεeθdiyn yebhe, yelle zade ejjuwher d elεqiyq. 13 esuwf eθθani ellesmes jiyHuwn, wahen yenneD f elqeεεeθ n kuwc elkul. 14 esuwf eθθaleθ ellesmes dejle, yegguwr g eccerq n cuwr. esuwf errabeε δ elfuwrat.

15 yawi rebbi adem iHuTTi g ejjenneθ n εeden bac e tyexδem yelhe essis. 16 yennes: «eθgeddeδ eθečeδ seg eccejreθ elkul elli texseδ, 17 kan d eccejreθ n assen n elxiyr d eccer, as elli eθečeδ essis rahu eθemmuwθeδ.»

18 yen rebbi: «elyebhiyc edje adem yedder weHδes, yelzem esexlqe iyjen m nette bac e θiεawen.» 19 yawi rebbi ecal yeg essis elhuwc d izanniwen elkul. w beεεeδ yexleq adem yewiyθen y etweliys bac e yerqeb max δennisemme, usahen iwiyen elkul elliseminsen. 20 inabe adem elhuwc d izanniwen d elhwayec elkul s elliseminsen. yaxi elyufiyc essisen bac e θiεawen. 21 yessenεes rebbi adem g enuddem δ emeqqar, yawi iyjen seg iγesγisnes iεebbe uggemxenes exsum. 22 yeg seg eγesγisdiyn elli yiwiθi seg adem temeTTuwθ, yeγet y etwali adem. 23 yen adem: «θahen ture δ iyγeS seg ixseniyw d wexsum seg exsumiyw. θahen δ eθemsemme temeTTuwθ* εlexaTer temmawi seg eryaz.» 24 heδake εlac eryaz eyedj daddes d yemmes yelSeq g liweces eδwlen iyjen. 25 adem d liweces kanen lessen δ iεeryanen, w elleθHecmenc.