1 saray liwec n ebram tkan etteruwc. weθkan γers texeddamt temiSriθ esmiθes hajer. 2 saray tennayes y ebram: «esseγδ ture, rebbi yeHremi seg idrari. aδef f eθxeddemtiyw balek eyθaru idrari.» ebram yesle edwiys. 3 usahen saray tuwce texeddemtes temiSriθ hajer y weryazes ebram beεεeδ yedder εecre sniyn g elqeεεeθ n kenεan.

4 yxaleδ ebram hajer umax i θfeq s imenes δeθaru teHqer lelles. 5 saray tennayes y ebram: «cex δemeshul f elliheneθe elli tejrayiδ. uciyγex texeddemtiyw umax i θezre imenes δeθaru teHqriyδ. rebbi eyeHkem mabinatne.» 6 y er felles ebram: «texeddemtem uggefusem eg δiys mette iθexseδ.» teδwel saray etteg g texeddemtes elδeθerwel sγers.

7 tiweD g eSSeHreθ y etwali elεiyn n wamen uggebriδ elli yettawi ycuwr. yafiθ elmlax n rebbi. 8 yennes: «hajer, texeddamt n saray, s meniys eθedduwsiδ? welmani δeθexDmeδ?» tennes: «erwele seg lelle saray.» 9 yennes elmlax n rebbi: «eδwel y lellem teqqiymeδ eddu efuses.» 10 yennes xlaf: «δerre idreriym egget Hette iyjen weliged enyeHseb.» 11 yerniyyes xlaf: «tay cem δeθerweδ efruwx uδetsemmiyδ ismaεiyl εlexaTer rebbi yesle elli etεaniδ. 12 Hette iyjen welyetged eθyesθeεbeδ g elεeks n leεbaδ elkul, uleεbaδ elkul g elεekses. δeyedder δimeθεerex nette demmeθnes elkul.» 13 tnabe ellesm n rebbi elli yuθlayes, «cex δrebbi elli izer δiyye.» εlexaTer tenne: «endre mbelHeq ezriyγ elli izer δiyye?» 14 usahen yemsemme esuγ, <biyr leHeyruYiy>*. mabiyn qadec dbared. 15 taru hajer efruwx y ebram. ysemme ebram memmis, ismaεiyl. 16 max i θiru hajer ismaεiyl ebram ykan elεemres sette weθmenyiyn.