emlaqi n yeεquwb dεiysuw
1 yqam yeεquwb ixfes yezer εiysuw jay wiyδes erbεe myat rajel, izuwn idreriys f leyye draHiyl etxeddamin lessent. 2 iHuT tixeddamin didrarinsneθ δimezwaren, usiyn leyye didreriys, usiyn raHiyl dyuwsef δellexren. 3 emme nette yesbeqθen yesjeδ f elqeεεeθ sebεe merraθ elδeyeqreb yenjes. 4 yezzel εiysuw yeεreDt yeθHemmelt ikubbi. ekkeren tεeyĎen lessen. 5 yqam εiysuw tiTTewines yezer elwacun didrari yen: «δ wiyn iyhen?» yer felles yeεquwb: «iyhen δidrari elli yenεem essisen rebbi felle neč elεebδex.» 6 elweqθes zewweδneθ tixeddamin didrarinsneθ esejδen. 7 usiyn tzewweδ leyye didreriys esejδen usiyn izewweδ yuwsef draHiyl esejδen. 8 yen εiysuw yyeεquwb: «δmette iθexseδ eθenneδ s icellagene elli eεrDaθen?» yennes: «bac e θerDiyδ felle ya siydiy.» 9 yen εiysuw: «γeri egget eyenje. edj γerx egliyx.» 10 yen yeεquwb: «la, kan terDiyδ felle eqbel elhδiyyeθiyw. εlexaTer max i zriyγ uδmex emmax zriyγ uwδem n rebbi terDiyδ felle. 11 eqbel s γeri elhδiyyeθiyw elli useδγex essis. rebbi yenεem felle uγeri kul cey.» imelges elδeyeqbel.
efareq n yeεquwb dεiysuw
12 yen εiysuw: «edj enerHel jmiyε, tay δeθuyuwre ezzeθex.» 13 yer felles yeεquwb: «ya, siydiy tesseneδ elli idrari Dεefen, wesεi difunasen essesfan, kan esseεyiyxθen s teyuwriθ Hette as berk δejafen elkul. 14 esbqiyδ ya siydiy, uneč δexeθbεe f teyuwriθ n esεi elli tsuqqe δiys etteyuwriθ n idrari, elδeθewDe fellex g esεiyr.» 15 yennes εiysuw: «emmale δedje iyδex qiqqi n iryazen elli iyδi.» yen yeεquwb: «imette? eθerDiyδ felle yezzi.» 16 esses yeδwel εiysuw y sεiyr. 17 yerHel yeεquwb y sekkuwt, yebne elHuwc y imenes, yeg tigriycin yesεi. heδake εlac yemsemme emxandiyn sekkuwt.
aweD n yeεquwb y eckiym
18 max i yedduwse seg teHmiylt n eram, yiweD yeεquwb labas y temuwreθ n eckiym elli g elqeεεeθ n kenεan. yenSeb tixyemines elberre n temuwreθ. 19 yeseγ elqeεεeθ elli yenSeb δiys s emyat qeTεe n elfeTTeθ s γer idrari n eHmuwr daddes n eckiym. 20 yeg diyn elmeδbeH ysemmaθ iyl, erreb n israYiyl. (meεnahe erreb n yeεquwb.)