1 yesl yeεquwb elli idrari n laban eqqaren: «yeεquwb yawi elli γer daddeθne elkul, wahen elkul yegi seg egli n daddeθne.» 2 yezre yeεquwb elli elmuεamleθ n laban iyδes teθbeddel f qebl. 3 elweqθes yen rebbi yyeεquwb: «erjeε yelqeεεeθ n midnex dleεbeδex uneč iyδex.» 4 yezen yeεquwb y raHiyl dleyye bac e seddasneθ y ijiyman meni iyeqqiym s esεiys, 5 yennasneθ: «daddexmeθ yembeddel f elli ykan qebl, emme erreb n dadde ykan iyδi. 6 uxemmiyθi tessenmeθ elli xδeme daddexmeθ s ejjehδiyw elkul, 7 yemenni daddexmeθ yeγδer essi ibeddel tejernetiyw εecre merraθ. emme rebbi eθyedjiyc eyyeg Haje. 8 max eyen: <imneqĎen tejernetex.> eδeruwneθ elkul δimneqĎen, ziyγ eyen, <imxeTTeTen tejernetex.> eδeruwneθ elkul δimxeTTeTen. 9 yawi rebbi esεi n daddexmeθ yucintiyδ y neč. 10 g elweqθ n eTriyδeθ ettirjiyθe ijeδεan lefHuwl elkul δimxeTTeTen udimneqĎen. 11 yenniyδ elmlax n rebbi g unuddem: <yeεquwb.> enγes: <enεem.> 12 yen: <qam tiTTewinex terqbeδ. ijeδεan elkul δimxeTTeTen dimneqĎen, εlexaTer zriyγ elli yegi δiyx laban elkul. 13 neč δerreb n biytiyl meni iθesbeddeδ tγaγet tenγleδ felles uwδi y neč, tuεeddiyδ s elweεδeθ. uture ekker effeγ seg elqeεεeθe teδwleδ y elqeεεeθ meni iθemmarweδ.>» 14 erreneθ felles raHiyl dleyye: «endre yeqqimane elbay g etterxeθ n daddeθne? 15 exenyeHsiybc ettiberreniyyin γers, yezzenzane yeč essumenne? 16 erzi elkul elli yekkesθi rebbi seg daddeθne yuwcin icex δegliynne nečin didreriynne. eg emmax i xyenne rebbi.»

17 yekker yeεquwb yessin idreriys delwacunes f ileγman, 18 ysuq esεiys elkul d elli yemlexθ ylemmeδti g teHmiylt n eram elkul, yexDem yetwali daddes isHaq g elqeεεeθ n kenεan. 19 laban ykan yexDem ylessi g tettnes diεelleces, taxer raHiyl leSnam n daddes. 20 yexδeε yeεquwb laban elerami wesyenniyc s werweles. 21 yerwel s elli γers elkul, yeqĎeε elfuwrat yexDem yeddehreθ n jilεad.

22 beεεeδ tlaθe eyyam yesle laban s warwel n yeεquwb, 23 yawi ewmeθnes yexDem δefres teyuwriθ n sebεe eyyam eδeyaweδ felles g eddehreθ enjilεad, 24 yeseδ rebbi y laban elerami g tirjiyθ g δeggiyδ yennes: «er elbalex esθuθlayeδ y yeεquwb s elxiyr ziyγ s eccer.» 25 max i yiweD laban f yeεquwb yafi yenSeb texyemtes g tiwni, yenSeb laban Hette nette dewmeθnes ixyemnensen diyn. 26 yen laban y yeεquwb: «δmette wahen ittegiyδ? texδeεδiyδ tsuqqeδ tifrexiyw emmax g elHerb, 27 wimette iθerwleδ bejjeHde weyθenniyc kanhake elliyγ ceyyeεγex s tiγraθin eTTebbelt etγeyyeT? 28 eyθedjiyc Hette ekubbe tifrexiyw didrarinsneθ, teθSerfeδ beγbawe. 29 uture egedde exDurre emme erreb n daddeθwem yuθleyiyδ iDennat δeggiyδ yenniyδ: <er elbalex eθuθlayeδ y yeεquwb s elxiyr ziyγ s eccer.> 30 ucex texDemeδ s γeri εlexaTer tesθaHceδ elHuwc n daddex, emme imette iθuxreδ leSnemiyw?» 31 yer f elles yeεquwb: «εlexaTer ukkuδe eyeθfukkeδ tifrexex, 32 emme leSnemex, iδekan tufiyt δiyjen essiyne yelzem eyjaf. θebbeθ δmette iγerx γeri ezzaθ n ewmeθnenne tewyet.» ture yeεquwb elyessiync elli raHiyl tuxer erreb n laban. 33 yaδef laban texyamt n yeεquwb ettexyamt n leyye ettexyamt n tixeddamin lessent, yemenni welyuwfi Hette cey. yeffeγ seg texyamt n leyye yaδef y texyamt n raHiyl. 34 raHiyl tkan tiwi leSneb tHuTTiyneθ g eθHawiθ n welγem teqqiym felles. iferkes laban texyamt elkul welyuwfi cey, 35 ten raHiyl y daddes: «eθeθγeccec felle y a siydiy, εlexaTer felle eTriyq n weyyuwr welgeddac ekre ezzeθex.» welyufiyc laban leSnemes elli yHewwem fellasneθ. 36 yeθγeccec yeεquwb yemεarex dlaban yennes: «mette igiyγ bac e yθeθbεeδ sahen liyhliyh? 37 tferkseδ edbeciyw elkul, mette iθuwfiδ seg elbegaj n elHucex? kan tufiyδ Haje HuTTi dahen ezzaθ n ewmeθniyw diryeznex bac e Hekmen binatne. 38 γeri εicriyn sne iyδex, la ettetnex δreHneθ ula δelHiwanex, wellečiyγc seg lekbecex 39 elli kanneθ elhwayec tetneθ δiys exedduwγiyγ felles Hette elεlameθ, kane etteθHemmale elxsareθ weHδi, ucex tkaneδ etĎelabeδ deyye essisen, yemmaxer g dugges ziyγ g δeggiyδ. 40 θečayiyδ esxaneθ g dugges, weSqiyε g δeggiyδ, wenuddem yerwel seg tiTTewiniyw. 41 γeri εicriyn sne g elHucex, xδemγex erbeεtac sne bac e yθuwceδ tifrexex lessentiyn usette sniyn bac e yθuwceδ esεiyx, weθbeddeldiyδ tejernetiyw εecre merraθ. 42 ulukan muc erreb n dadde, erreb n ibrahiym delxuwf seg isHaq kanen iyδi, rahu telliyδ ture tgellebδiyδ menγiyr eyθuwceδ Hette cey. emme rebbi yerqeb yetteεbiyw decqe n ifesniyw yeεrxax iDennat δeggiyδ.»

43 yer felles laban: «tifrax ettifrexiyw widrari δidreriyw wesεi δesεiyw welli tzerreδ δiys elkul δegliyw, w meδemni elgedde ege Hette cey bac e rre tifrexiyw didrarinsneθ elli irwentent? 44 est enemεaheδ, neč dcex, enHuT eccaheδ mabinatne.» 45 eyendeγ yqam yeεquwb tγaγet yegiθ δezeεnuwn. 46 yen y iryeznes: «laymeθ tiγuwγe.» laymen tiγuwγe egentent δelkuδes ečen δenyes. 47 ysemmaθ laban yejer sehduwθe, wisemmaθ yeεquwb jelεiyd. (meεnahe elkuδs n eccehδeθ binatne s elluwγeθ n eram delluwγeθ n εibriyye.) 48 yen laban: elkuδse δeyeδwel δeccaheδ mabinatne asse.» heδake εlac yemsemme jelεiyd. 49 uyemsemme xlaf elmiSfat, εlexaTer laban yenne: «eySafe rebbi mabinatne max enemtegge f beεDne.» 50 iδekan tmermδeδ tifrexiyw ziyγ tuγiyδ fellasneθ, exyzer Hette Hed essiyne, emme rebbi δeccaheδ mabinatne. 51 yen xlaf: «wahen δelkuδes uwahen δezeεnuwn elli θegit mabinatne 52 lessen elkuδs duzeεnuwn δeccuhhaδ bac e tteθεeddiyγc fellex, ucex etteθεeddiyc felle. 53 erreb n ibrahiym derreb ennaHuwr eHekmen mabinatne.» yeθjul yeεquwb s elxuwf n daddes isHaq, 54 yeγres ecwiyheθ g eddehreθ, inabe y iryeznes ečen enεsen g eddehreθ. 55 elweječe bekri ikub laban tifrexes didrarinsneθ ibarexθen yrewweH y elHuces.