1 yeHδef yuwsef imenes f daddes yeqqiym iθerw yetkub δiys. 2 welbeεδ yufley yuwsef yixeddemnes iĎbiyben bac e sHenĎen daddes. 3 ekehew eqqiymen etHenĎen δiys erbεiyn yuwm elmi kemlen. eqqiymen imiSriyyen terwen felles sebεiyn yuwm. 4 umax i δuwqen liyyam n ukezzem yenne yuwsef y elHuwc n ferεuwn: «iδekan texsmi belHeq uflayeθ y ferεuwn tenmes, 5 rahu dadde yesθedjuwlli uyenne, neč qriyb emmuwθe werδmi g wenil elli eHfrexθi y imeniyw g elqeεεeθ n kenεan. edji emerqe ereδme dadde welbeεδ eδuwle.» 6 yenne ferεuwn: «emreq terδmeδ daddex max i yesθedjuwllex.» 7 ubeεεeδ yemreq yuwsef δeyerδem daddes. yemreq iyδes elHuwc n ferεuwn elkul dleεbaδ imeqqaren n miSr. 8 emreqen iyδes leεyeles zade ewmeθnes dleεyelensen delHuwc n daddes. welledjiyn δefrensen g elqeεεeθ n jasan kan δidreriynsen desεiynsen. 9 emreqneθ iyδes tikerriytin s elεesker dixeyyalen eglinsneθ elmi iδuwlen emeljiyc. 10 umax i DiwDen ibeyder n eTad g eljneb n eccerq n wesuwf n elurdun eruwiyn felles egget uyegayes yuwsef eznazeθ edzuwγeb. eqqiymen etnewHen felles sebεe eyyam. 11 umax i zriyn ikenεaniyyen elli εmeren diyn eznazeθ g beyder n eTad ennan: «eznazeθe temeqqarθ θahen δegli n imiSriyyen.» heδake εlac semman elqeεεeθ elli g eljneb n elurdun <miSrayim>. (meεnahe eznazeθ n imiSriyyen.) 12 usahen egiyn idrari n yeεquwb max i ntiweSSe daddensen. 13 iwyenti y elqeεεeθ n kenεan welbeεδ erδmenti g elmraH n ujiymi n elmekfiyle elli iqabel memra welli yesγi ibrahiym n ette dujiymi n εefruwn elHeθθi bac e θeδwel ettejebbent n elεiyleθ. 14 ubeεδ iyerδem yuwsef daddes, yeδwel nette dewmeθnes delli mreqen iyδsen elkul y miSr.

15 umax i zriyn ewmaθen n yuwsef elli daddensen yemmuwθ ennan: «belekc yuwsef yebδe ykerreh δiyne ture usinc exenyer temeεfunt elli negeyast qebl.» 16 welbeεδ uzennes emersul ennanes: «daddex yweSSe qebl eyemmuwθ yenne, 17 sah enneθ y yuwsef, sameH eyeθmex f eδnubensen delγelTensen lexaTer nihnin eginex θemuwHacθ. uture sameH ixeddamen n rebbis n daddex f elγelTTensen.» max i yiweD edwiye y yuwsef yekker iθerw. 18 esδen ewmeθnes erkεen ezzeθes ennen: «rahu nečin δixeddemnex.» 19 yemenni yenneyasen: «eθukδemc yaxi neč δrebbi? 20 xenyum θenwami eccer, yemenni rebbi yerre eccer δelxiyr bac e yeg δmat iyejre asse usinc eysedder leεbaδ egget. 21 eθukδemc rahu neč δexenεawen xenyum didreriywwem.» yεezzaθen yTeyyeb elxeĎrensen. 22 yeεmer yuwsef g miSr nette delHuwc n daddes. yedder yuwsef miyye uεecre sniyn 23 elmi yezre idrari n idrari n efrayim didrari zade n makiyr memmis n menesse elli yγemmerθen yessuδefθen g elwerθes emidreriys max i mmarwen. 24 yenne yuwsef yewmeθnes: «neč qriyb emmuwθe yemenni rahu rebbi δexenyesfekker usinc exenysuwfeγ seg elqeεεeθe welbeεδ δexenyer yelqeεεeθ elli yedjul δetyuc y ibrahiym disHaq dyeεquwb.» 25 yufley yuwsef y idrari n yeεquwb yenneyasen: «edjulmi elqulli exenyesfekker rebbi usinc exenyazen ytemuwreθ xlaf eθawyem iγSeniyw iyδwem.» 26 yemmuwθ yuwsef max i yiweD elεemres miyye uεecre sniyn. HenĎenti welbeεδ HuTTenti g ettabuwt g miSr.