yelle eryaz esmiθes yeεquwb. yuwγeδ engluws ysemmaθi yuwsef.

1 yeεmer yeεquwb g elqeεεeθ n kenεan, meni iyeεmer daddes. 2 utah elHkayeθ n elεiyleθ n yeεquwb. ykan yuwsef δeεezri elεemres sebeεtac n εam ykan iserreH esεi dyeθmes idrari n belheh dzelfeh elwacun n daddes. iHerrec yuwsef f eyeθmes y daddes f elli tegen δiys. 3 ykan yeεquwb yexs yuwsef exθer n idreriys iddiyn εlexaTer yuwγeδti g elkebres, yegayes ekebbuwĎ δimzeyyen. 4 max i zriyn eyeθmes elli daddensen yexsi exθrensen elkul eδwlen eθγisenc ernin dukken felles s edwi yuwHec.

5 yezre yuwsef as iyjen tirjiyθ δeggiyδ yeHkat f eyeθmes, eδwlen eθγisenc exθer n eqbel. 6 yenneyasen: «esleθ θahen tirjiyθ elli ezriyxt, 7 ezriyγ emelli n teqqen g tixniyqin g ujiymi. tay eθbed elxenqθiyw, enneDneθ felles elxenqeθewwem welbeεδ erkeεentes.» 8 ennanes eyeθmes: «etterriyδ imenex δexentemlxeδ uδeθeHkmeδ δiyne.» seg tirjiyθines dedwiys ernin eθγisenc exθer n eqbel. 9 yettirjiyθ tirjiyθ xlaf yeHkat f eyeθmes yenne: «ezriyγ tirjiyθ xlaf, emelli tefuwθ etteziyri deHdac δiθran erkeεniyδ.» 10 max i tyeHke f daddes dyeθmes yeθγeccec felles daddes yennayes: «δmat tirjiyθe θahen elli tezriyδ! δednes neč dyemmex deyeθmex δexnerkeε g elqeεεeθ?» 11 enγaren essis eyeθmes yemenni daddes yeHrez edwiye g ules.

12 emreqen eyeθmes serHen g esεi n daddensen ezzaθ ckiym. 13 yenne yeεquwb y yuwsef: «eyeθmex serHen g esεi g eckiym. est exazne etwelinsen.» yerrayes yenne: «wa, δemerqe.» 14 yennayes yeεquwb: «emreq tenziyδ eyeθmex desεi welbeεδ eδwel θendiyδ mat leHwelensen.» yemreq seg wesuwf Hebruwn, elmi iyiweD yeckiym. 15 yeεreDti eryaz yuwfi δerrayeH g essewweθ. yenceδti: «f mat itHewmeδ?» 16 yerrayes: «etHewme f eyeθme. eθegeδ elmziyyeθ, enniyδ meni yserHen g esεiynsen.» 17 yennayes eryaz: «rahu emreqen esyah. esliyxθen eqqaren, <eyye, enemreq yduwθan.>» εaδ yemreq yuwsef δeffer eyeθmes elmi intyuwfe. 18 eddebelli zrinti s lebεiyδ weqbel esenyaweδ, emfahmen felles δeθenγen. 19 ennan jerasen: «taye iθbab n tirjiyθin yuseδ. 20 eyye eθnenγ eθenĎeyyec g wanu. usinc enen <θeči elhayceθ yuwsef.>, usinc enenzi δmat δesegneθ tirjiyθines.»

21 max i yesle ruwban edwiynsen yekker δeθimenneε s ifesnensen yenne: «ettenγemc 22 bac wetwesxemc ifesnenne s iδemnes yemenni lewHemti g wenuwye g essewweθ.» yenne ruwban sah bac eθisemneε seg ifesnensen usinc eθyer y daddes. 23 max i yiweD yuwsef y eyeθmes, ekkesnes ekebbuĎes imzeyyen elli yireDti. 24 iwyenti δeycenti g wanu. anu ykan δelfareγ seg wamen.

25 welbeεεeδ nihnin tetten, qamen ixfewnensen, zriyn elqafleθ n ismaεiyliyyen lebεiyδ tuseδ seg jilεad g webriδes y miSr wileγmenensen εebben s elfeH duwδi dlaδen. 26 yenne yehuwδa y eyeθmes: «imat enenγ yuwweθne usinc eneqqiym enHerrez g iδemnes? 27 eyye, eθnezzenz y ismaεiyliyyen unetwessexc ifesnenne s iδemnes εlexaTer nette δyuwweθne useg iδemnenne.» elweqθes sliyn eyeθmes edwiys. 28 max i qerben essisen ibeyyaεen imedyaniyyen wesmiθensen zade ismaεiyliyyen, sulyen yuwsef seg wanu welbeεδ zenzenti seg εicriyn δelfeTTeθ ewyenti ymiSr.

29 max i yeδwel ruwban y wanu yemenni elyufiyc yuwsef g wanu. icerrex edbeces. 30 yeδwel y eyeθmes yenneyasen: «engluws eHebbec. uneč ture elmani δemerqe umax δeqable dadde?» 31 qamen ekebbuwĎ n yuwsef, eγersen iyγiδ egen sah γeTsen ekebbuwĎ g iδammen. 32 iwyenti y daddensen ennanes: «rahu n ufaθ ekebbuwĎe. enzi δegli n memmiyx uneγ ehhe?» 33 yuxezθi yeεquwb yen: «wah δekebbuwĎ n memmi. elhayceθ θeči. θebbiyθi δleδraf.» 34 icerrex edbeces, welbeεδ yireD ezeTTaf f lejnebes, ikezzem f memmis liyyameθ egget. 35 max i kren idreriys elkul δeθεezzen, elyeqqiylc eyεezze yen: «δemerqe ymemmi y elli emmuwθen etεeyĎeγ f memmi.» yerw felles yeεquwb.

36 g ellexxer zenzen ibeyyaεen yuwsef g miSr y fuwTiyfar errayes n iεessasen n ferεuwn.