1 ibarex rebbi nuwH didreriys yenneyasen: «arweθ, texθrem, tεebbem eddunyeθ 2 rahu δeyukkeδ essiywem elhuwc n elqeεεeθ diciciywen n ujenne dkul cey yetteθHerrex f elqeεεeθ delHuwθ n iylel. uδeθeδwel elkulhe yxenyum. 3 usinc eyeδwel kul cey yetteθHerrex δeče y xenyum, eθečem kul cey max i ttetem ezzerriyεeθ delxuDreθ teziyzewθ elli uciγawem. 4 yemenni eθečemc exsum s iδemnes. 5 uneč eHamiyγ fellawem s leεbaδ delhuwc uzade enecδe elεebδ f erruwH n yuwwes. 6 welli eyenγ texrumt, eyemmenγ lexaTer erruwH n elεebδ δegliyw uneč elli exelqexθi. 7 xenyum arweθ, texθrem, tεebbem eddunyeθ.»

8 yufley rebbi y nuwH didreriys iyδes yenneyasen: 9 «neč δexenεahδe xenyum didreriywwem. 10 uzade eεahδe iyδwem kul cey yetteθHerrex f elqeεεeθ seg iciciywen delhuwc delli yeffeγ iyδwem s tefluwkθ. 11 exenεahδe elli eTTuwfan meεεač eyemHeq Hette iyjen, umeεεač eseybe eTTuwfan eyemHeq elqeεεeθ.» 12 yenne rebbi: «wahen δellemareθ n elεehδiyw elli egiyxθi iyδwem delhuwc zade ellemareθ θahen δeθeqqiym diyme. 13 eHuTTe elquws n erxe g ujenne δellemareθ n elεehδiyw iyδwem. 14 max eyγeyyem esHab. usinc ayben elquws n erxe. 15 rahu ettesfekkare g elεehδiyw iyδwem delhuwc elkul zade, elweqθes liδukkelc amen δeTTuwfan eyemHeq kul cey yetteθneffes g elqeεεeθ. 16 max eyeffeγ elquws n erxe g esHab, eθezre esfekkre elεehδiyw elli δeyeqqiym diyme iyδwem dkul cey yetteθHerrex f elqeεεeθ.» 17 yenne rebbi y nuwH: «θahen δellemareθ n elεehδiyw elli egiyxθi iyδwem dkul cey yetteθneffes f elqeεεeθ zade.»

18 idrari ennuwH elli effeγen iyδes s tefluwkθ nihnin sam, Ham dyafeθ. Ham wahen eyendeγ daddes n kenεan. 19 iyhen δidrari ennuwH tlaθe elli usiynd essisen leεbaδ elkul.

20 yexδem nuwH g elflaHeθ yezzu elεneb. 21 yeg sah yeswe ecrab elmi yesxer, yemεerre g wexyemes. 22 yezre Ham daddes n ikenεaniyyen nuwH δeεeryan, yeffeγ yen y ewmeθnes elli elberre. 23 elweqθes yqam sam dyafeθ edbac HuTTenti f lekθefensen ebδen egguwren timδefriyn etwali exyem, irDen daddensen welsundenc uδmewnensen bac e θzerrenc δeεeryan. 24 max i yekker nuwH yesle mat iyege δiys memmis emezyen. 25 yenne: «rebbi eyelεen kenεan, memmis n Ham, usinc eyeδwel exemmes n ixemmasen n ewmeθnes.» 26 welbeεδ yenne: «eybarex rebbi sam, usinc eyeδwel kenεan δexemmes n sam. 27 rebbi eywesseε f yafeθ usinc eyeεmer g ixyamen n sam ukenεan eyeδwel δexemmes n yafeθ.» 28 yedder nuwH beεδ eTTuwfan tlaθe miyye uxemsiyn εam. 29 yemmuwθ nuwH welεemres tesεe miyye uxemsiyn εam.