1 yerHel yeεquwb nette delli ennes delli γersen elkul umax i yiweD g biyr sebεe yeγres eDHeyyeθ y rebbis endaddes isHaq. 2 yennayes rebbi δeggiyδ g elmnam: «yeεquwb! yeεquwb!» yerrayes yenne: «taye neč dah.» 3 yen rebbi: «neč δrebbi, rebbi n daddex. eθukδc seg wemreq y miSr. neč δexerre cex didreriyx ettemuwreθ ettemeqqarθ. 4 neč δemerqe iyδex y miSr uneč elli δexerre y temurθex uyuwsef δexiγemmeD tiTTewinex max eθemmuwθeδ.» 5 yekker yeεquwb seg biyr sebεe. qamenti idreriys emmax i qamen idreriynsen δelwacunensen f eθkerriytin elli yuzentent ferεuwn bac e ntewyen. 6 ewiyen iyδsen elhucensen delli exsbenti elkul g elqeεεeθ n kenεan emerqen elkulhum y miSr. 7 yemreq nette didreriys didrari n idreriys dyessis dyessis n idreriys y miSr.

8 θiyhen δellisami n idrari n yeεquwb elli usiynd y miSr. yeεquwb didreriys, ruwban eyendeγ emenzu n yeεquwb.

9 wiyhen δidrari n ruwban: Henuwk, felluw dHeSruwn dkermiy. 10 wiyhen δidrari n cemεuwn: yemaYiyl dyamiyn duwhed dyakiyn dSuwHer dcawuwl memmis n tekenεaniθ. 11 wiyhen δidrari n lawiy: jircuwn dqehat dmerariy. 12 wiyhen δidrari n yehuwδa: εiyr duwnan dciyla dfareS dzareH. yemmuwθ εiyr duwnan g elqeεεeθ n kenεan. yemenni idrari n fareS eyendeγ HeSruwn dHamuwl. 13 wiyhen δidrari n yessaker: tuwlaε dfuwwe dyuwb dcemruwn. 14 wiyhen δidrari n zebuwluwn: sarid diyluwn dyeHliyl. 15 wiyhen δidrari n leyye elli tiruθen y yeεquwb g ijiyman n eram wiyδes yelliys diyna. unihnin elkulhum tlaθe wetleθiyn.

16 wiyhen δidrari n jad: Sefyuwn dHejji dcuwni deSbuwn dεiyri deruwdi deriyliy. 17 wiyhen δidrari n eciyr: yemenna dyecwe dyecwi dberiyεe dweltmensen sareH. wiyhen δidrari n beriyεe: Habir dmelkiyyil. 18 wiyhen δidrari n zelfeh elli yuwcit laban y yelliys leyye. unihnin elkulhum settac.

19 idrari n raHiyl liwec n yeεquwb: yuwsef dbenyamiyn. 20 yuwγeδ yuwsef: menesse defrayim g miSr. tirwasθen esnat yelliys n fuwTiyfar elkahen ennuwn. 21 wiyhen δidrari n benyamiyn: baleε dbaker decbiyl djiyra dneεman diyHi druwc dmuffiym dHuffiym derd. 22 wiyhen δidrari n yeεquwb seg raHiyl: unihnin elkulhum erbeεtac.

23 uHuwciym eyendeγ memmis n dan. 24 wiyhen δidrari enneftaliy: yeHSayil djuwni dyeSr dcelliym. 25 wiyhen δidrari n yeεquwb elli tirwasθen belheh texeddamt n raHiyl elli yuwcit daddes laban y yelliys. unihnin elkulhum sebεe.

26 tiweD elεiyleθ n yeεquwb elli temreq y miSr sette usettiyn menγiyr elwacun n idreriys. 27 uyuwsef yuwγeδ g miSr sen δidrari usah tiweD elεiyleθ n yeεquwb elli temreq y miSr sebεiyn.

28 yuzen yeεquwb yehuwδa qebles y yuwsef bac e ntilaqe g elqeεεeθ n jasan. 29 umax i DiwDen yerkeb yuwsef f eθkerrittes yemreq δeyeεreδ daddes g jasan. umax i θyezre yeqqiym elberceθ iθerw unihnin emγemmren. 30 yenne yeεquwb y yuwsef: «edj emmuwθe ture beεδ izriyγ uδmex ucex eltuciyδ θeddereδ.»

31 yenne yuwsef y ewmeθnes delbaqi n elεiyleθ n daddes, «neč δemerqe ture y ferεuwn bac e senne, ewmeθniyw delεiyleθ n dadde elkul elli kanen εmeren g elqeεεeθ n kenεan useδen etweliyw. 32 unihnin δessurraH n esεi uγersen elhuwc egget. nihnin uγiynd esεiynsen difunesnensen delli γersen elkul. 33 elweqθelli exenynabe ferεuwn usinc exenyenceδ <δmat iθxedmem?> 34 enmes, ixeddemnex δessurraH n esεi s elli δimezyanen elture. nečin dmidnenne. usahen ykan daddeθne dbabeθne. bac e θeεmreδ g elqeεεeθ n jasan lexaTer imiSriyyen Heqren essurreH n esεi.»