1 max i xeθren leεbaδ, yrewen tingluwsin egget. 2 esmaHneθ tingluwsin n leεbaδ g TiTTawin n idrari n imeqqaren elweqθes, egiyn delwacunensen max i xsen. 3 yenne rebbi: «erruHiyw etqimiyc diyme etterre g leεbaδ f elli yuwHec, nihnin δemmuwθen uliyyemensen eltrenniyc exθer n miyye uεicriyn.» 4 g elweqtdiyn wediyn yelle iryazen δelεuttay egget. beεδ iδuwδfen idrari n imeqqaren f tingluwsin n leεbaδ yemmerwasen idrari, eδwlen idreriye iyhen eyendeγ imeqqaren n elqeεεeθ. leεbaδ elkul esnenten.

5 yezre rebbi elli elεmayel n leεbaδ xθerneθ g eddunyeθ w elli ettuxmemensen δettuxmem n ecciyĎan. 6 ikezzem rebbi yendem egget εlexaTer yexleq leεbaδ. 7 yenne rebbi: «δemeHqe elεebδ elli exelqexθi s uwδem n elqeεεeθ w iyδes leεbaδ elkul delhuwc emeqqar dumezyen detεaben diciciywen lexeTerni endeme elli exelqexθi.» 8 yemenni rebbi yeqqiym yexs nuwH.

9 utahen δelHkayeθ ennuwH: ykan nuwH δenbi δeSSaleH uyessen rebbi egget. 10 yirew nuwH tlaθe δidrari unihnin sam, Ham dyafeθ. 11 max i xθerneθ elεmayel n leεbaδ, 12 yezre rebbi elli eddunyeθ tefseδ lexaTer leεbaδ ebδen ečaθen g beεDhum. 13 yenne rebbi y nuwH: «ellaxreθ n leεbaδ tiweD, lexeTerhum εebben eddunyeθ selεmeylensen ture δentemeHqe s elqeεεeθ. 14 eg y imenex tefluwkθ δtemeqqarθ egget seg elluwH n esserwel tegeδ δiys tizeqwin enteδhneδ s ezzeft s ejjaj desberre. 15 tegeδ max exenneγ: eTTules tlaθe myat δraε w elεerDes xemsiyn δraε w elεelwes tleθiyn δraε. 16 eges eccebbax eγil s eddu n esqef delbab g eljneb n tefluwkθ. utefluwkθe θahen egiθ f etlaθe δeTTiyqen eTTeq elweddey w eTTeq g wemmes w eTTeq lennej. 17 rahu neč δeseγerqe eddunyeθ s eTTuwfan n wamen bac e meHqe elli yetteθneffes s eddu ejenne usinc enγe elli yedder enni elqeεεeθ elkul. 18 yemenni neč δemεahδe iyδex: aδef cex didreriyx dliwecex delwacun n idreriyx y tefluwkθ. 19 awi iyδex g tefluwkθ elzuwz edxer dennaθi seg elhuwc elkul bac e θemneε usinc eθedder beεδ eTTuwfan. 20 suwδef iyδex sen seg kul ennuwε s lenwaε n elhuwc usen seg kul ennuwε s lenwaε n etεaben usen seg kul ennuwε s lenwaε n iciciywen bac e ntmenεeδ iyδex usinc edderneθ diyme. 21 teHrzeδ y imenex delli iyδex eče. texznetti γerx bac e ttegeδ δelεwin.» 22 yege nuwH max i syenne rebbi.