1 yeδwel ibrahiym yaγ temeTTuwθ ellesmes qTuwreh. 2 taγδes zimran deyeqcan demdan demedyan deyecbaq 3 uyeqcan yuγeδ caba δdedan. wezzerriyεeθ n dedan: iccuwriyyen dilTuwciyyen dilimmiyyen. 4 widrari n midyan nihnin: εeyfeh diεifr deHnuwk debiydaε deldeεeh. wiyhen elkul usiynd seg qTuwreh. 5 yuwc ibrahiym elli γers elkul yisHaq. 6 emme idreriys seg hajer deqTuwreh yuceyasen elhδaye yezenten max elyuwc yedder y etwali elqeεεeθ n eccerq y ebεeδ f memmis isHaq.

7 yedder ibrahiym miyye uxemse usebεiyn sne. 8 beεεeδ i yedder egget, yjaf merθaH yaweD f ihelli esebqent. 9 erδment idreriys isHaq dismaεiyl g tiyriθ n temekfiylt g ujiymi n εefruwn memmis n SuwHer elHeθθi g weqqeS n tefuwθ n memra. 10 ejimidiyn wediyn elli yesγi ibrahiym seg iHeθθiyyen uδiys yemmerδem ibrahiym dliweces sarreh. 11 beεεeδ ejafi n ibrahiym ibarex rebbi isHaq memmis, yedder isHaq yetwali biyr leHeyruYiy.

12 emme idrari n Yismaεiyl emmiys n Yibrahiym elli θiruθi hajer θemiSriyθ texeddemt n sarreh, 13 iyh elliseminsen seg umeqqar yumezyan: nbayuwt emenzu n Yismeεiyl, dqiydar dYedebYiyl dmibSam 14 dmicmaε dduwme dmesse 15 dHidar dtiyma dyeTuwr dnafiyc dqidme. 16 iyh eyendeγ idrari n Yismeεiyl wiyh elliseminsen f elHseb n leHwecensen, unihnin eθnac δerruyyas g elqbeylensen. 17 ukanen leεwam elli yedderθen Yismeεiyl miyye usebεe utleθiyn esne, welbeεεeδ yemmuwθ yexleĎ f midnes. 18 ukanen εemren seg Hwiyle y cuwr, g eccerq n miSr g webriδ y cuwr usah yeεmer Yismeεiyl twali ewmeθnes.

19 tah elHkayeθ n elεiyleθ n isHaq memmis n ibrahiym. 20 w ykan isHaq γers erbεiyn sne max i yuγe rifqeh yelliys n ebtuwiyl elerami, uweltmas n laban, seg teHmiylt n eram. 21 εlexaTer rifqeh tkan ettelεagerθ, isHaq yezzal y rebbi f elxeĎres. yeqbel rebbi s γers teδwel rifqeh δeθaru. 22 emεarxen etwame g teδisθes ten: «kan elHkayeθ sahen, imette neč eHeble εaδ?» texDem δeθenceδ rebbi. 23 yennes rebbi: «teδisθem δiys sent ettimuwre, δeyeffeγ essis sen δlenwaε n leεbaδ, iyjen δeyeδwel eqwe n wissen, emeqqar deyexδem emezyen.» 24 as n warew tuγeδ etwame. 25 emezwar yuseδ dezukkeγ welbeδnes emnuwber, emmale semmant εiysuw. (meεnahe imceεεer.) 26 ubeεεeδ yeffeγ enjes yeTTef g elεerqubes, emmale semmant yeεquwb. max i θiru rifqeh, isHaq ykan δmemmis n settiyn sne.

27 ekebren idrari, yeδwel εiysuw δeSeyyeδ yessen egget uyexs ijiyman, uyeεquwb ykan δelεaqel yexs kan δexyam. 28 yeδwel isHaq yexs εiysuw εlexaTer yeεjebθ elli yetteSSaD δiys, emme rifqeh texs yeεquwb.

29 yelle as yeεquwb iĎeyyeb eče, yrewweH εiysuw seg ijiyman unette yelluwz egget 30 yennes yyeεquwb: «uciyδ eče seg eliδame ezukkaγ εlexaTerni elluwze egget.» emmale yeδwel etnebanes eduwm. 31 yennes yeεquwb: «ezzenziyδ qebl temenzuyθex.» 32 yer felles εiysuw: «neč εuddi δejafe s elez, δme δeyθeg temenzuyθiyw?» 33 yennes yeεquwb: «eθjulli qebl.» yeθjulles, yezzenzes temenzuyθes. 34 yuwces yeεquwb y εiysuw eγrum delεδe n tiniyfin, yeč yesw yekker yexDem. usah yeHqer εiysuw temenzuyθes.