1 inabe yeεquwb y idreriys welbeεδ yenneyasen: «asδeθ etweliyw exennenne δmat δexenyejre g edduniθewwem. 2 lemδeθ imenewwem teslem ha y idrari n yeεquwb, esleθ y daddeθwem yeεquwb. 3 ruwban cex memmi emezwar. cex elqewθiyw. essix bane δeryaz ezzaθ n leεbaδ. δeθeqqiymeδ teεliyδ welqeδrex exθer n iddiyn. 4 yemenni maδamek emwamen eθheddreδ eltγelbec diyme lexaTrek θezniyδ dzelfeh liweciyw g esririyw. 5 cemεuwn dlawi δewmaθen teĎlemem s lesyufennum leεbaδ. 6 ha yeεquwb! eθeδfec yelmejles n erδiltensen weθemrqec meni itqiymen. lexaTer max i θγeccecen enγiyn eryaz welqulli tiraren s ezeHfen efunes. 7 elleεneθ f elγuccensen lexaTer yuwHec witDur. entbeεδe f beεDhum g temuwreθ n yeεquwb usinc entferqe zade f beεDhum g temuwreθ n israYiyl. 8 yehuwδa, ewmeθnex etqeddernex egget widrari n daddex δexerkεen icex lexaTer essifex diyme f texrumt n elεδewwex. 9 yehuwδa δmemmis n uyerniz. f elfrisθex tekkereδ ha memmi, welbeεδ tesbeleδ tenεseδ emuyerniz. δ wiyn eyged exyHareb? 10 elHukmeθ δeθeqqiym diyme g ifassen n yehuwδa elmedyes ciyluh elli δeθĎewεen leεbaδ egget. 11 uδeyeqqen eγyules g eθεenbeyθ usinc eyeqqen ejjeHces g eθεenbeyθ tebehhayθ. s ecrab eysiyreδ edbeces useg wamen n elεneb eysiyreδ imeryeles. 12 tiTTewines ettizukkaγin emecrab wisennuqnes δimellalen emelHliyb.

13 cex zebuwluwn δeθeεmreδ g eccafeθ n iylel. etweliyx δeddesneθ tifluwkin bac e rθaHneθ. δeθezleδ ifesnex elmeδewδen Seyda. 14 yessaker δeγyuwl yeqwe yesbel g elkuwri. 15 max eyzer eSSabeθ n elqeεθes tebhe eyεerreD exrumes yuqami n eδqel usinc eyeδwel δelεebδ n elxeδmeθ bessiyf. 16 dan δelqaDi f ecceεbes emiyjin seg leεruwc n israYiyl. 17 dan δetεaben g eccafeθ n webriδ wettelefse g elmesreb eθenber eεerqub n elHSan bac e ssender errekbes eldeffer. 18 neč etrajiyγ δiyx, ha rebbi bac e yeθmenεeδ. 19 jad, δeγaren felles leεδas, yemenni δentyeγleb usinc entiHaSer. 20 eče n eciyr yebhe wexsenti elHukkam egget. 21 n eftali etteγzelt ettimseyyebθ eθaru ezzerriyεeθ tebhe. 22 yuwsef emteεenbeyθ temmezzu g eljneb n tiT n wamen, etteεenbeyθ ettaru egget uleεrefes uliyen f elHiyĎ. 23 leεδas exsen eθenγen unihnin diyme ečaθen δiys s elγuc. 24 yemenni iγelnes δeqqiymen emmezlen ezzaθ n leεδas uδeyerni eyeqwe lexaTer elquδreθ n rebbi n yeεquwb iyδes uδeyeδwel δeniylti uδelHegfeθ n israYiyl. 25 rebbi δexibarex uδexyuwc amzer s ujenne wamen s isaffen usinc δeyerni eybarex ezzerriεθex. 26 elberxeθ n daddex eεle n edhari uxiyr n eddunyeθ. elberxeθ θahen elkul δeθeggez f yuwsef, yuwsef eSSaleH g ewmeθnes. 27 benyamiyn δuccen yuεer, talji eyeč eDHeyθes uδeggiyδ ettiyzun.»

28 iyhen elkulhum eyendeγ elHukkam leθnac egli n israYiyl. uwahen eyendeγ edwi elli yenneyesenti daddensen wibarexθen essis. ukul iyjen ibarexθi max i yettesθahel. 29 welbeεδ iweSSaθen yenneyasen: «neč qriyb erewHe y midniyw. erδemmi g eljenbensen g weHric n ujiymi n εefruwn elHeθθi. 30 elli g ujiymi n elmekfiyle elli tqabel memra g elqeεεeθ n kenεan. elmraH elli y esγi ibrahiym nette n ujiymi seg εefruwn elHeθθi bac e yeδwel ettejebbent n elεiyleθ. 31 δiys yemmerδem ibrahiym dliweces sarreh welbeεδ isHaq dliweces rifqeh uzade erδeme diyn leyye. 32 uyesγe ibrahiym ejiymi delmraH elli δiys seg iHeθθiyyen.»

33 max i ykemmel yeεquwb seg eweSSi n idreriys yemmezzel f esriyr, yeg sah ilemmeδ ikreεnes ibeεDhum tali erruHes yexleδ f midnes.