1 esyiyn yerHel ibrahiym y etwali elqeεεeθ n enneqeb yeεmer mabiyn qadec dcuwr yeθγerreb g ejrar. 2 yen yleεbaδ f sarreh liweces elli netteθ δweltmas. y axi yuzenes ebiymalek elmlek n ejrar yeγet y etweliys. 3 yesδes rebbi y ebiymalek g tirjiyθ g δeggiyδdiyn yennes: «δeθjafeδ f elxaĎer n temeTTuwθ elli tiwyet, rahi δliwec n weryaz.» 4 ebiymalek elyuwc ettilemmesc, yen: «ya, siydiy! δeθehelxeδ leεbaδ ellegiyn Hette cey? 5 eyyenniyc elli netteθ δweltmas? unetteθ biyδhe eyθenniyc elli nette δyuwwes? enniyθiyw etteSSafiθ wellegiyγ Hette cey yuwHec.» 6 yer felles rebbi: «neč biyδi essene elli θegiyδ wediyn s enniyyeθ etteSSafiθ. wenneč elli exedjixc eθeγldeδ g elHeqqiyw. wahen εlac exedjixc etlemseδ. 7 ture, rejjeε y weryaz liweces εlexaTer nette δenbi uδeyezzal f elxeĎrex uδeθedreδ. urahu δeθjafeδ cex delli δegliyx elkul iδekan etetrejεec.» 8 talji bekri ebiymalek inabe ixeddemnes elkul yeHkeyasen kul cey. ukδen egget iryazen. 9 ubeεεeδ ebiymalek inabe ibrahiym yennes: «mette ixentegiyδ? mette ixegiyγ bac e θeddaγeδ elγeldeθ ettemeqqarθ y neč ettemurθiyw? θegiyδ g elHeqqiyw elHajaθ mayelzemc emmegneθ.» 10 yenceδt ebiymalek: «g mette iθkaneδ etxememeδ bac e θegeδ elHajeθ emtah?» 11 yennes ibrahiym: «egiyγ wahen εlexaTer etteεlake leHebbac e lxuwf seg rebbi g wemxane elkul. ukδe eyyenγen f elxaĎer n liweciyw. 12 unetteθ *δweltme mbelHeq, yelliys *ndadde, umuc δyelliys n yemme, eγet. 13 umax i ysuwfeγ rebbi seg elHuwc n dadde enniyγes <elmeniy enexDem en elli neč δyuwwem, θahen elHajeθ tebehhayθ eyettegeδ.>» 14 yeTTef ebiymalek esεi difunasen dixeddamen etxeddamin yuwcin y ibrahiym yerres sarreh liweces. 15 yennes: «tay elqeεθiyw ezzeθex, eqqiym meni exyeεjeb.» 16 yennes y sarreh: «tay δesuwce yuwwem *elf qeTεe n elfeTTeθ bac e snen leεbaδ elli iyδem elkul elli cem eltegiyδ Hette cey yuwHec. welHeqqem yerjeεem.» 17,18 rebbi ykan yerre elwacun n elHuwc n ebiymalek etteruwnec f elxaĎer n sarreh liwec n ibrahiym. yeδεu ibrahiym rebbi ysebre ebiymalek dliweces ettixeddamines δwelneθ etteruwneθ.