As 10 parábolas mais importantes de Jesus

2,3 Na yeangyɛ biala yɛɛ menli dɔɔnwo bie yiale ɛke ne a, Ɔvole ɔhɔle ɛlɛne nu na ɔhɔdɛnlanle aze wɔ nu na ɔhilehilele bɛ debie wɔ melɛ mɔɔ menli ne mɔ gyinlegyinlanle ɛnwea kpane ne azo bɛdiele ye la. Na ɔdendɛle dɔɔnwo ne ala ɔhilele bɛ wɔ mrɛlɛbulɛ nu ɔzele kɛ: "Ɛyazonlɛnli bie hɔluale ma wɔ ye ɛya nu. 4 Na melɛ mɔɔ ɔkponde ma ne wɔ ɛya ne anu la, bie mɔ guale adenle ne anloa, na nloma rale rasusole. 5 Bie noko guale awozaka nu, ɛleka mɔɔ azɛlɛ ekyi bie yɛɛ aheda awolɛ ne azo la; ma ne fifile nyinle wɔ azɛlɛ ɛhye azo, 6 na ewia henlema ne bɔle bɛ maanle bɛnwosonle na bɛwule, ɔluakɛ bɛ ndinli ne mɔ anzo. 7 Ma ne mɔ bie mɔ noko guale mbowule nu, na mbowule ne nyinle na ɔmiemianle bɛ. 8 Bie mɔ noko guale azɛlɛ kpalɛ zo, na bɛzole ma dɔɔnwo. Bɛzole abulasa, abulasia nee ɛya mɔnwo mɔnwo ne ala kɛmɔ ɔkpondenle bɛ la. 9 Mɔɔ lɛ ɛnzolɛ la ɛdie!"

Samɛleanli atiakunlukɛnlɛma ne

25 Na ɔrale kɛ, kenle ko bie Mosisi mɛla kɛlɛhɛlɛvolɛ benlera ko bie rale razɔle Gyisɛse ye nrɛlɛbɛ kpole ne nleanle, na ɔbizale ye kɛ, "Kilehilevolɛ, duzu a ɔhyia kɛ sonla yɛ amaa ɔlua zo yeanyia damɛnlangoate ngoane wɔ Anwuma belemgbunli maanle ne anu a?"

26 Gyisɛse buale ye zele kɛ, "Duzu a Mosisi mɛla ne ka mɔɔ fale ɛhye anwo a?"

27 Ɔbuale ɔzele Gyisɛse kɛ "Mɛla ne ka ye kɛ, Fa wɔ ahonle muala, ɔ nee wɔ ɛkɛla muala, ɔ nee wɔ anwosesebɛ muala, ɔ nee wɔ adwenle kɔsɔɔti kulo wɔ Awulae Nyamenle ne. Eza kulo ɛ gɔnwo kɛ ɛdawɔ ɛ nwo ala la pɛ."

28 Gyisɛse zele ye kɛ, "Wɔbua boɛ! Yɛ ɛhye na ɛbanyia ngoane mɔɔ ɔnlɛ awieleɛ!"

29 Nrenyia ne, yemɔ ɔhulole kɛ ɔkɛbu ɔ nwo benle, ɔti ɔbizale Gyisɛse kɛ, "Na me gɔnwo mɔ a le nwane?"

30 Gyisɛse bule ɛrɛlɛ vale yele ɛhye anloa ɔzele kɛ: "Kenle ko bie ɛnee Dwuunli bie ɛlɛtu adenle vi Gyɛlusalɛm yeahɔ Gyɛleko. Na ahodiawu bie tetale ye wɔ adevinli ne. Bɛkpolole ɔ nwo adɛladeɛ kosooti, bɛzale ye bɛliele ye ezukoa mɔɔ wɔ ɔ nwo la amuala, na bɛbole ye bɛbodɛbodale ye sesakaa ne ala, na akee bɛgyakyile ye wɔ ewule nee ngoane avinli wɔ adehanle ne.

31 "Yeangyɛ biala, Dwuunli sɛlɛvolɛ bie ravale zɔhane adenle ne azo; na mɔɔ ɔnwunle nrenyia ne kɛ ɔla ye kagyaa la, ɔpɛle ɔlile adenle ne foa ko nehane na ɔzeanle ɔ nwo ɔhɔle ye ɛleka bie. 32 Livaenli bie noko radwule ɛkɛ la, ɔdaye ɔnwunle ye; ɔbikyele nrenyia ne, na ɔnleanle ye koonwu na akee ɔbule adenle ne foa ko ɔhɔle.

33 "Akee Samɛleanli bie mɔɔ ɔdaye ɔlua ye adenle la radwule ɛleka mɔɔ nrenyia ne la la; na mɔɔ ɔ nye bɔle ɔ nwo zo ala la, ɔ kunlu yelɛyelale ye somaa ne ala. 34 Samɛleanli ne hotole ɔ nwo ɛkɛ, ɔmiemianle ɔ nwo nganle ne mɔ, na ɔvale ayile ɔguguale nu na ɔkyekyele ye gyɛlɛɛnye. Ɔvale ye ɔdɛnlanle ɔdaye ye afunlumu mɔɔ ɛnee ɔde zo la azo bɛdiale bɛtɛbɛtɛ kɔkpula kɛ bɛradwule sua mɔɔ nyɛvosua wɔ ɛkɛ ne a, na ɔnleanle ye. 35 Aleɛ hyenle la, ɔyele menli nwiɔ kenle ko ahatualɛ ezukoa ɔmaanle nyɛvosua menle ne na ɔzele ye kɛ, ‘Nea nrenyia ye boɛ maa me. Saa ɔ nwo kakɛ bo mɔɔ meva megyakyi wɔ la azo a, kenle biala mɔɔ menwɔzia menwɔra la mebadua meamaa wɔ.’

36 "Menli nsa ɛhye mɔ nuhua boni agɔnwo a le nrenyia ne mɔɔ dɔle ahodiawu sa nu la?"

37 Nrenyia ne zele kɛ, "Nuhua ko ne mɔɔ zele nrenyia ne anwunvɔne la ɔ."

Akee Gyisɛse zele ye kɛ, "Wioo, kɔ na ɛdawɔ noko kɔyɛ zɔhane ala."

3,4 Ɛhye ati Gyisɛse bule ɛrɛlɛ ɛhye hilele bɛ: "Bɛ nuhua ne boni a saa ɔlɛ mboane ɛya ko na bɛ nuhua ko minli a, ɔnrɛhɔkpondɛ ko ne mɔɔ ɛminli la kɔkpula mekɛ mɔɔ ɔkɛnwu ye la a? 5 Na saa ɔnwu ye a asoo ɔnrɛzoa ye ɔ kɔme zo ɔnrɛra sua zo ɔnrɛli nwolɛ fɛlɛko ɔ? 6 Na saa ɔba suazo noko a asoo ɔnrɛvɛlɛvɛlɛ ɔ gɔnwo mɔ nee ye aako nu amra kɛ bɛ nee ye ɛrali fɛlɛko, ɔluakɛ yenwu ye boane ko ne mɔɔ minlinle la ɔ?

7 "Nɔhalɛ nu, zɔhane ala noko yɛɛ anwuma maanle ne bali fɛlɛko wɔ ɛtanevolɛ ko mɔɔ kɛzia kɛra Awulae ɛkɛ ne la anwo, tɛla abulahɔnla nee ngɔnla mɔɔ ɛtɛminlinle la anwo a!

11 "Nrenyia bie lɛ mralɛ mrenyia nwiɔ. 12 Na nuhua ekyi ne rale razele ɔ ze kɛ, ‘Egya, kyɛ wɔ agyapadeɛ ne anu na fa me afoa nu deɛ mɔɔ saa ɛwu a ɔkɛyɛ me deɛ la maa me!’ "

Amgba noko ɔhyɛle ye agyapadeɛ ne anu na ɔvale ye afoa nu deɛ ne ɔmaanle ye.

13 "Na yeangyɛ biala, kpavolɛ ne zoale ye ninyɛne ne dule adenle hɔle moamoa. Na ɔzɛkyele ye ezukoa nee ɔ nwo ninyɛne muala wɔ huhunli nyɛleɛ nee ɛbɛlabɔlɛ ɛtane nwo. 14 Zɔhane mekɛ ne anu ala, ɛhɔne totohyia bie noko zile maanle ne anu. Kpavolɛ ye ɛhye mɔɔ ɛwie mia a! Ɛhɔne nee alɔbɔlɛ ngome ɛmaa ɔ nwo ɛli kɛ silikoko. 15 Ɔvale ɔ nwo ɔhɔbetanle maanlema ne mɔ bie mɔɔ sie agbolike la anwo. 16 Ɛhɔne anyezota ngome maanle ɔ nye bolole agbolike ne mɔ aleɛ mgbane ne bɔbɔ; noko nwane a amaa ye debie a?"

17 "Na nzinlii mɔɔ awieleɛ ne wiele ye la, akee ɔzele ɔ nwo kɛ, ‘Anzɛɛ Egya ɛnlɛ ngɛkɛlɛ dɔnwo bɛnli aleɛ ɔmbo bɛ nwo zo mɔɔ akee mame mela ɛke ɛhɔne ku me ado me lɔ a! 18 "Mebahɔ egya anwo lɔ, na meahɔze ye kɛ, Egya; meyɛ ɛtane metia anwuma nee aze wɔ ɛ nyunlu, 19 na mendwu kɛ ɛkɛvɛlɛ me ɛ ra bieko bɔbɔ; emomu mesɛlɛ wɔ, fa me yɛ wɔ ngɛkɛlɛ ne mɔ anu ko ala." ’ "

20 "Ɔti amgba noko ɔzile nu kɛ ɔsia yeahɔ sua nu. Na mɔɔ ɛnee ɔtɛdua moa lɔ la, yɛɛ ɔ ze nwunle ye a. Na ɔvale ɛhulolɛ nee anwunvɔnezelɛ ɔnriandinle ɔhɔyiale ye, na ɔyɛle ye awawaatuu, na ɔvole ɔ nloa anwo.

21 "Na ɔ ra ne zele ye kɛ, ‘Egya, meyɛ ɛtane metia anwuma nee aze wɔ ɛ nyunlu; na mendwu bɔbɔ kɛ bɛkɛvɛlɛ me ɛ ra bieko.’

22 "Noko ɔ ze ammaa ɔ nloa andɔ bɔbɔ. Ɔvɛlɛle ye ngɛkɛlɛ ne mɔ bie na ɔzele bɛ kɛ, ‘Bɛmaa bɛ nwo ɛyɛ ndɛ! Bɛva aboka ngɛnlɛma kpalɛ ne ko bɛraheda ye! Eza bɛva mgbɔdelera bɛrawula ɔ sa; na bɛva mgbɔlaboa bɛrawula ɔ gyakɛ! 23 Na bɛhu nlankɛ mgbole ne mɔ mɔɔ ɛlɔ kpalɛ la anu ko bɛmaa yɛva yɛlie yɛ nye. 24 Ɔboalekɛ, me ra ɛhye, yemɔ nɔhalɛ nu, ɔwule, yɛɛ eza yezia yera ngoane nu a. Ɔminlinle bɔkɔɔ, yɛɛ eza yɛnwu ye a!’ Ɔti amgba noko bɛbɔle pilasilililɛ ne abo.

25 "Mekɛ ɛhye anu, ɛnee ɔ ra kpanyinli ne ɛlɛyɛ gyima wɔ ɛya nu lɔ. Na mɔɔ ɔwiele, na ɔba sua nu la, ɛnee ɔte kɛ anyelielɛ ɛmaa aako ne anu ɛkpudwu kɛ mgbudwu zɛhae ala. 26 Ɔti ɔvɛlɛle ngɛkɛlɛ ne mɔ ko na ɔbizale ye kɛ, ‘Na duzu edwɛkɛ a ɛzi ɛke a?’

27 "Na akɛlɛ ne buale ye zele kɛ, ‘Ɛ diema ne ɛzia ɛra bieko, yɛɛ ɛ ze ɛmaa bɛhu ɛnlankɛ bedevinli kpalɛ ne bɛlɛto ye ɛkponle a; ɔboalekɛ ɔse, ɔyɛ ye fɛ kɛ debie anyɛ ye ɛmaa yeva ɔ nwo kɔlɔɔnwo yezia yera anzondwolɛ nu a.’

28 "Ɛhye yɛle ɔ diema kpanyinli ne ɛya totohyia, ɔti ɔkpole kɛ ɔkɛhɔ sua nu bɔbɔ. Na ɔ ze rale rabodole ye dedee la, 29 ɔzele ɔ ze kɛ, ‘Asoo ɛdawɔ nea kɛ mezi meyele me nwo mezonle wɔ wɔ ɛvolɛ dɔɔnwo ɛhye mɔɔ ɛze ɛhɔ la anu a; kenle ko bɔbɔ ɛnle ɛkɛ, mɔɔ mendule me gye wɔ wɔ ɛzoanlɛ nwo a. Noko ɛtɛsele me kɛ, Fa abɔnkye ralɛ ɛhye bɔbɔ ɛ nee ɛ gɔnwo mɔ bɛva bɛlielie bɛ nye ɛlɛ. 30 Noko akee ɛ ra ɛhye mɔɔ yehɔzɛkye wɔ ezukoa wɔ mraalɛ nee ɛbɛla funli nwo la, kɛ yemɔ ɔdwu ɛke ala la, wɔmaa bɛhu ɛnlankɛ bedevinli kpalɛ ko ye mɔɔ wɔ ɛke la bɛmaa ye.’

31 "Na ɔ ze buale ye zele kɛ, ‘Awolɛ, wɔmɔ a dahuu me nee wɔ de a, ɛhye ati mɔɔ melɛ ye biala la le wɔ deɛ. 32 Noko ɔfa adenle nu kɛ yɛkɛli pilasili ɛhye. Ɔboalekɛ ɛ diema ɔ; ɔwule, yɛɛ yezia yera ngoane nu bieko a! Ɔminlinle, na yɛnwu ye!’ " 

45 "Bieko, Anwuma belemgbunli maanle ne le kɛ agundeɛ guadivo bie mɔɔ anye dedɛdeda alie nwo kpondɛ agudeɛ ngɛnlɛma ngɛnlɛma la. 46 Ɔnwunle bie mɔɔ ye bolɛ le kpalɛ, agudeɛ mɔɔ sonle bolɛ kpalɛ la na ɔdɔnenle debie biala mɔɔ ɔlɛ ye la na ɔvale ɔdɔle.

9 Akee ɔhanle ɛhye ɔhilele bɛdabɛ mɔɔ bɛbu bɛ nwo kɛ bɛle tenlenema, na bɛtoto awie mɔ anwo nyɛlɛ la kɛ:

10 "Mrenyia nwiɔ hɔle asɔne sua nu kɛ bɛkazɛlɛ. Ko le Falasiinli, mɔɔ mgbanyizonle nee amemaabɛnwozo ɛhu ye kuu, yɛɛ ko ne noko le adwuledievolɛ nzisivo. 11 Falasiinli ne ‘zɛlɛle’ kɛ: ‘O, Nana Nyamenle, meyɛ wɔ mo kɛ menle ɛtanevolɛ kɛ menli mɔɔ ɛha mɔɔ bɔ apo, na bɛnli pɛlepɛle, na bɛsɛkye agyalɛ, bɔbɔ kɛ adwuledievolɛ ne mɔɔ gyi nehane la; 12 mekye ɛhɔne kenle nwiɔ wɔ dapɛne ko anu, yɛɛ debie biala mɔɔ melɛ ye la, mekyɛ nuhua bulu mefa ko megua asɔne gya ne anu.’

13 "Na adwuledievolɛ ne mɔɔ nzisi ɛhu ye kuu la, noko gyinlanle moamoa na ɔzile ɔ ti aze, na ɔvale ɔ sa ɔbilebilale ɔ kɛnra azo wɔ anwoazehanlɛ nu ala na ɔzele kɛ, ‘Nana Nyamenle, nwu me anwunvɔne, ɔluakɛ mele ɛtanevolɛ.’ 14 Na meka meahile bɛ wienyi kɛ, adwuledievolɛ ɛhye nyianle ɛtanefakyɛ wɔ Nana Nyamenle anyunlu gyakyile Falasiinli ne! Ɔluakɛ awie biala mɔɔ kɛmemaa ɔ nwo zo la, bɛkɛbɛlɛ ye aze, na awie biala mɔɔ kɛbɛlɛ ɔ nwo aze la, bɛkɛmaa ye zo."

14 "Bieko, Anwuma belemgbunli maanle ne le kɛ adawu ne mɔɔ fale nrenyia bie mɔɔ ɛlɛtu adenle ahɔ maanle gyɛne bie anu, na ɔvɛlɛle ye sonvolɛma ne mɔ amuala bɛyiale, na ɔbɔle bɛ bosea kɛ bɛva bɛzi kongo wɔ melɛ mɔɔ yemɔ yehɔ la.

15 "Na ɔmaanle bɛ nuhua ko talɛnte nnu, ko noko nwiɔ, yɛɛ ko noko ko, kɛmɔ bɛ muala bɛ anwosesebɛ de la, na akee ɔdule ye adenle ne. 16 Nrenyia ne mɔɔ asa hanle talɛnte nnu ne la ndɛndɛ ne ala hɔle, na ɔvale ɔhɔlile gua, na ɔnyianle nwolɛ nvasoɛ talɛnte nnu bieko. 17 Zɔhane ala noko yɛɛ mɔɔ nyianle talɛnte nwiɔ ne la, noko nyianle nwolɛ nvasoɛ talɛnte nwiɔ a.

18 "Na nrenyia ne mɔɔ nyianle talɛnte ko ne la, yemɔ ɔhɔle na ɔhɔvunvunle azɛlɛ nwo, na ɔvale ɔ menle ne ezukoa ne ɔziele ɛkɛ ne twele.

19 "Nzinlii mɔɔ melɛ ne hɔle bie la, bɛ menle ne ziale rale na ɔvɛlɛvɛlɛle bɛ kɛ bɛrabu ye ezukoa ne anwo mgbonda bɛmaa ye. 20 Nrenyia ne mɔɔ ɔmaanle ye talɛnte nnu ne la yɛle mgbonda talɛnte bulu maanle ye.

21 "Ɔ menle ne yele ye ayɛlɛ kpole wɔ ye gyima kpalɛ ne mɔɔ ɔyɛle la anwo na ɔzele ye kɛ, ‘Sonvolɛ kpalɛ, wɔli nɔhalɛ wɔ ezukoa ekyi ɛhye mɔɔ menvale memaanle wɔ la anwo, ɛhye ati mebava gyima mgbole dɔɔnwo meawula ɛ sa. Yɛ gyima fɛlɛko ɛhye mɔɔ meva mewula ɛ sa nu la.’

22 "Nzinlii nrenyia ne mɔɔ nyianle talɛnte nwiɔ ne la ɔdaye ɔrabule ye mgbonda ɛdeɛ ne, na ɔzele kɛ, ‘Yɛmenle, ɛmaanle me talɛnte nwiɔ kɛ menva menli gua, na menyia ye mɔnwo bɔbɔ.’

23 "Ɔ menle ne yɛle ye mo na ɔzele ye kɛ, ‘Ɛle sonvolɛ kpalɛ na eza ɛdi nɔhalɛ. Wɔli nɔhalɛ wɔ ezukoa ekyi ɛhye mɔɔ menvale memaanle wɔ la anwo, ɛhye ati mebamaa wɔ dɔɔnwo.’

24,25 "Akee nrenyia ne mɔɔ nyianle talɛnte ko ne la rale, na ɔrazele ye kɛ, ‘Yɛmenle, kɛmɔ meze kɛ ɛ ti anu yɛ se la ati, na mesulo kɛ ɛkɛsisi me wɔ me nvasoɛ mɔɔ mebanyia ye la anwo la ati, menvunle kuma na menvale wɔ ezukoa ne menveale nu; ɔti wɔ ezukoa ne ɛne, die!’

26 "Na ɔ menle ne buale ye kɛ, ‘Nrenyia atisesebɛvo! Sonvolɛ mgbovonle! Kɛmɔ ɛze kɛ mebaza wɔ mealie wɔ nvasoɛ ne la, 27 anrɛɛ ɔwɔ kɛ ɛnwu nrɛlɛbɛ ɛfa me ezukoa ne ɛkɔsie ezukoaziele ɛleka ne, amaa meanyia mpaefoa ekyi bɔbɔ wɔ zolɛ. 28 Bɛza nrenyia ɛhye bɛlie ye ezukoa ne na bɛva bɛmaa nrenyia ne mɔɔ lɛ talɛnte bulu ne la. 29 Ɔluakɛ mɔɔ kɛnlea mɔɔ bɛkɛva bɛkɛmaa ye la boɛ la, yemɔ yɛɛ bɛbava dɔɔnwo bɛamaa ye, na yeanyia dɔɔnwo kpalɛ a. Na nrenyia ne mɔɔ ɛnli nɔhalɛ la, yemɔ ekyii ne bɔbɔ mɔɔ ɔnea zo la, bɛbaza ye bɛalie. 30 Akee bɛbavuandi sonvolɛ sonlamgbane ɛhye mɔɔ anwo ɛnlɛ nvasoɛ la bɛado ye awozinli kabikabi ne anu: ɛleka ne mɔɔ ɛzunlɛ nee egyelehwinlɛ wɔ la.’

19 Eza Gyisɛse zele kɛ, "Nrenyia sukoavolɛ bie wale ɛkɛ. Alehyenlɛ biala ɔbɔ ye aboka ɔgua nu, na ɔto ɛkponle ɔdielie ɔ nye. 20 Nrenyia ehyianli bie mɔɔ bɛfɛlɛ ye Lazalɛse mɔɔ nganlɛ ɛdudu ye la noko ɛnee bada nrenyia sukoavolɛ ne ɛbolɔnsane ne abo, amaa saa nrenyia sukoavolɛ ne aleɛ ne bie kpokpo gua aze a, yeasesa yeali. 21 Mekɛ mɔɔ ɔsesa mgbokpoleka ne yeali la, ɛnee ahwea noko ɛlɛtafetafe ye nganlɛ ne mɔ anu. 22 Ɔrale ye kɛ, Lazalɛse ehyiavolɛ ne wule, na anwumabɔvolɛma ne mɔ ramaanle ye zo hɔdole Ebileham akɛnra nu. Nrenyia sukoavolɛ ne ɔdaye noko ɔwule na bɛziele ye, 23 na ye ɛkɛla ne hɔle abɔnsam sua zo. Mekɛ mɔɔ ɔnwu amaneɛ la, ɔnwunle kɛ Lazalɛse noko nee Ebileham ɛlɛdi fɛlɛko wɔ moamoa nehane.

24 "Na ɔdeanle nu ɔzele kɛ, ‘Egya Ebileham, nwu me anwunvɔne! Soa Lazalɛse maa ɔva ɔ sa ɛrɛlɛsɛka mgbane bɔbɔ ɔbɔ ye nzule nu ɔva ɔrape me tafinlima azo ɔmaa me ahonle ɛnlu fɔɔnwo, na melɛnwu amaneɛ wɔ sendɔlɛra ye anu!’

25 "Ebileham buale ye zele kɛ, ‘Ralɛ, kakye kɛ mekɛ mɔɔ ɛde aze mɔɔ ɛdi fɛlɛko la, ɛnee Lazalɛse noko ɛlɛdi ehyia nee nyane, Ɔti ɛnɛ ɔdaye noko ɔ rɛle ɛkyekye wɔ ɛke, yɛɛ ɛdawɔ noko ɛlɛnwu amaneɛ a. 26 Eza yeanga ye zɔ noko, kuma kulongulo bie la yɛ nee wɔ avinli mɔɔ ɔlua zo awie vi ɛke ba lɔ a ɔnyɛ boɛ, yɛɛ awie noko vi lɔ ba ɛke a ɔnyɛ boɛ a.’

27 "Akee nrenyia sukoavolɛ ne buale ye zele kɛ, ‘Ao, Egya Ebileham, mebodo wɔ, soa ye maa ɔhɔ egya sua nu, 28 na ɔhɔbɔ me mediema nnu ne kɔkɔ, ammaa bɛanyɛ mɔɔ mede aze la menyɛle la bie, na kenle bie bɛdabɛ noko bɛannwu amaneɛ kɛmɔ melɛnwu ye la.’

29 "Ebileham buale ye kɛ, ‘Dahuu bɛka Mosisi nee ngapezoma ne mɔ anwo edwɛkɛ bɛkile bɛ, ɔti maa bɛva bɛdu bɛ nwo folɛ.’

30 "Nrenyia sukoavolɛ ne buale ye zele kɛ, ‘Kyɛkyɛ, Egya Ebileham, ɔnrɛkputi bɛ ahonle bɔbɔ kɛ bɛkenga. Na emomu, saa awie vi ɛbolɔ ɛke kɔ kɔkakile bɛ a, yɛɛ bɛbanlu bɛ nwo a.’

31 "Na Ebileham zele ye kɛ, ‘Saa bɛandie Mosisi nee ngapezoma ne mɔ bɔbɔ a, ɛnee noko saa awie vi mɔwuamra anu dwazo kɔ bɔbɔ a, bɛnrɛdie ye.’ "

24 Ɛrɛlɛ fofolɛ bieko mɔɔ Gyisɛse bule bɛ la ɛne: "Anwuma belemgbunli maanle ne le kɛ ɛyazonlɛnli mɔɔ ɛlɛdua ma kpalɛ wɔ ye ɛya nu la. 25 Na kenle ko nɔɔzo ɔla ala la, ye kpɔvolɛ rale na ɔraluale adua wɔ ye abɛlɛ ne mɔ anu. 26 Na mɔɔ abɛlɛ ne bɔle ɔ bo kɛ ɔnyi la, adua ne noko nyinle zɔhane ala.

27 "Na ɛyazonlɛnli ne gyimayɛvoma ne rale razele ye kɛ, ‘Yɛmenle, ɛya ne mɔɔ ɛluale ma kpalɛ ne nu la adua ngome ɛva ye bɔkɔɔ zɛ!’

28 "Ɔhilele nu ɔzele kɛ, ‘Kpɔvolɛ bie yɛɛ ɛye ɛhye a.’ Na bɛbizale ye kɛ, ‘Ɛnee yɛkɛdudu adua ne mɔ yɛkɛgua ɔ?’

29 "Ɔzele bɛ kɛ, ‘Kyɛkyɛ, saa bɛtudu adua ne a abɛlɛ ne bie bazɛkye. 30 Bɛmaa bɛ mu nwiɔ bɛgulu nu bɛnyi bɛhɔkpula aleɛbulɛ mekɛ ne na mebaze aleɛbuvoma ne meamaa bɛakpa adua ne bɛayela bɛ, na bɛava abɛlɛ ne bɛagua bonwole ne azo.’ "

Anwuma Maanle ne anwo adawu ngakyile

1 "Anwuma belemgbunli maanle ne le kɛ avoanlema bulu bie mɔɔ bɛvale bɛ ngɛnlaneɛ kɛ bɛkayia atɔtolɛ nrenyia ne la. 2-4 Na bɛ nuhua nnu ala a nwunle nrɛlɛbɛ na bɛvale nwole bɛguale bɛ ngɛnlaneɛ deɛ ne mɔ anu a, na nnu ne mɔɔ hale la yɛle ahoasea na bɛ rɛle vile bɛ nwo.

5,6 "Ɔti mɔɔ atɔfolɛ nrenyia ne hyɛle wɔ ye ɛralɛ nu la, bɛ kosooti bɛdedale kɛ bɛdie bɛ ɛnwomenle bie kɔkpula alevinli mu nwiɔ avinli; na mɔɔ bɛdele ɛdeanlɛ kɛ, ‘Atɔfolɛ nrenyia ne ɛlɛba! Bɛrɛla na bɛrayɛ ye akoaba! la, bɛ muala bɛ nye dele.’

7,8 "Ngakula mraalɛ ne mɔ amuala dwazole na bɛyɛle bɛ ngɛnlaneɛ ne mɔ boɛ. Na akee ngakula mraalɛ nnu ne mɔ mɔɔ bɛnlɛ nwole ne bie la kpale ɛhendeɛ ne mɔ kyɛlɛ kɛ bɛmaa bɛ bɛ deɛ ne bie, ɔluakɛ bɛ ngɛnlaneɛ ne mɔ ɛnee ɛlɛnu.

9 "Na bɛbuale bɛ kɛ, ‘Yɛnlɛ ye dɔɔnwo. Ɔti bɛhɔ gua ne azo na bɛhɔdɔ bie.’

10 "Na melɛ mɔɔ bɛhɔle la, atɔfolɛ nrenyia ne rale, na bɛdabɛ mɔɔ ɛnee bɛboɔboa bɛ nwo bɛwie la nee ye hɔle atɔfolɛ ɛkponledolɛ ne abo, na akee bɛdole anlenkɛ ne anu.

11 "Nzinlii, mɔɔ avoanle nnu ne ziale rale la, bɛhale anlenkɛ nzi, bɛvɛlɛle na bɛzele atɔfolɛ nrenyia ne kɛ, ‘Yɛmenle, buke ye anlenkɛ ne!’

12 "Na ɔbuale bɛ kɛ, ‘Bɛhɔ nehane! Mekɛ ne ɛkpa nwolɛ! Menze bɛ hweledede!’

13 "Ɔti bɛzinza, na bɛboɔboa bɛ nwo, ɔluakɛ, bɛnze kenle ne nee dɔnehwele holɛ ko ne mɔɔ mebazia meara a.