Lucas 18

Kɔ zo sɛlɛ

1 Kenle ko bie, Gyisɛse bule ye ɛdoavolɛma ne mɔ ɛrɛlɛ vale hilele ɛhyianlɛ mɔɔ ɔhyia kɛ bɛkɛyɛ asɔne dahuu, kɔkpula mekɛ mɔɔ bɛ sa kɛha bɛ ɛbizalɛndeɛ la.

2 Ɔzele kɛ: "Ɛnee ndɛnebuavolɛ bie wɔ sua bie azo. Ɔnzulo Nana Nyamenle bɔbɔ, na yeabu dasanli biala bie. 3 Kunlavolɛ raalɛ bie mɔɔ ɛnee awie ɛlɛsisi ye la, vale ye edwɛkɛ radole ɔ nyunlu mekɛ dɔɔnwo ne ala kɛ ɔli ɔmaa ye. Dahuu biala kɛ ɔgyi ndɛnebuavolɛ ne anwo zo ala ɛne. 4,5 Ndɛnebuavolɛ ne ɛmpili ɔ nwo; noko yeangyakyi ɛralɛ.

"Nzinlii, akee ɔzele ɔ nwo kɛ, ‘Aa, medame a mese menzulo Nyamenle na meazulo sonla dasanli a, noko akee saa meanli raalɛ ɛhye ye edwɛkɛ ne meammaa ye a ɔnrɛmaa me nwo ɛnrɛdɔ me ɛlɛ!’ "

6 Akee Awulae zele kɛ, "Saa ndɛnebuavolɛ atisesebɛvo ye bɔbɔ ɛlɛka ɛhye a, 7 ɛnee ɛnzuzu kɛ kɛ ɔkɛyɛ biala la, Nana Nyamenle noko baho alie ye menli mɔɔ nɔɔzo nee ewiazo bɛsu bɛsɛlɛ ye moalɛ la ɔ? 8 Nɔhalɛ nu, ɔbabua bɛ ndɛndɛ ne ala! Noko akee edwɛkɛ ne a le kɛ: Saa sonla Ra ne ba a, menli nyɛ yɛɛ ɔbarado bɛ kɛ bɛlɛ diedi na bɛlɛsɛlɛ a?"

9 Akee ɔhanle ɛhye ɔhilele bɛdabɛ mɔɔ bɛbu bɛ nwo kɛ bɛle tenlenema, na bɛtoto awie mɔ anwo nyɛlɛ la kɛ:

10 "Mrenyia nwiɔ hɔle asɔne sua nu kɛ bɛkazɛlɛ. Ko le Falasiinli, mɔɔ mgbanyizonle nee amemaabɛnwozo ɛhu ye kuu, yɛɛ ko ne noko le adwuledievolɛ nzisivo. 11 Falasiinli ne ‘zɛlɛle’ kɛ: ‘O, Nana Nyamenle, meyɛ wɔ mo kɛ menle ɛtanevolɛ kɛ menli mɔɔ ɛha mɔɔ bɔ apo, na bɛnli pɛlepɛle, na bɛsɛkye agyalɛ, bɔbɔ kɛ adwuledievolɛ ne mɔɔ gyi nehane la; 12 mekye ɛhɔne kenle nwiɔ wɔ dapɛne ko anu, yɛɛ debie biala mɔɔ melɛ ye la, mekyɛ nuhua bulu mefa ko megua asɔne gya ne anu.’

13 "Na adwuledievolɛ ne mɔɔ nzisi ɛhu ye kuu la, noko gyinlanle moamoa na ɔzile ɔ ti aze, na ɔvale ɔ sa ɔbilebilale ɔ kɛnra azo wɔ anwoazehanlɛ nu ala na ɔzele kɛ, ‘Nana Nyamenle, nwu me anwunvɔne, ɔluakɛ mele ɛtanevolɛ.’ 14 Na meka meahile bɛ wienyi kɛ, adwuledievolɛ ɛhye nyianle ɛtanefakyɛ wɔ Nana Nyamenle anyunlu gyakyile Falasiinli ne! Ɔluakɛ awie biala mɔɔ kɛmemaa ɔ nwo zo la, bɛkɛbɛlɛ ye aze, na awie biala mɔɔ kɛbɛlɛ ɔ nwo aze la, bɛkɛmaa ye zo."

15 Kenle ko bie awie mɔ vale bɛ mra rɛlɛle Gyisɛse kɛ ɔyila bɛ. Na ɛdoavolɛma ne mɔ nwunle bɛ la bɛvoanle bɛ.

16,17 Akee Gyisɛse vɛlɛle mbɛda ne mɔ ɔ nwo ɛkɛ ne na ɔzele ye ɛdoavolɛma ne mɔ kɛ, "Bɛmaa ngakula ne mɔ adenle bɛmaa bɛrɛla me nwo! Bɛmmafoa bɛ fee! Ɔboalekɛ menli mɔɔ lɛ diedi ahonle kɛ ngakula ɛhye mɔ ɛdeɛ ne la, bɛmɛ a Awulae Nyamenle Belemgbunli maanle ne le bɛ deɛ a. Na awie biala mɔɔ ɛnlɛ diedi mɔɔ le kɛ ngakula ne mɔ ɛdeɛ ne bie la, ɛnrɛbikye Belemgbunli maanle ne anlenkɛ kpole ne bɔbɔ."

Sukoavolɛ nrenyia nee ye ngyianlɛdeɛ

18 Kenle ko Dwuunli kpavolɛ bie rabizale Gyisɛse kɛ, "Yɛmenle kpalɛ, duzu a meyɛ a menwɔnyia ngoane mɔɔ ɔnlɛ awieleɛ a?"

19 Gyisɛse bizale ye kɛ, "Asoo ɛte ‘kpalɛ’ ne mɔɔ ɛlɛfɛlɛ me la abo ɔ? Memaa wɔade kɛ awie biala ɛnle ɛkɛ mɔɔ ɔle kpalɛ boka Nana Nyamenle anwo a. Yemɔ ɔ ngomekye ala a ɔle kpalɛ a. 20 Na emomu mɔɔ fale wɔ kpuyia ne anwo la, mɔɔ meka la a le kɛ, ɛdawɔ ɛze mɛla bulu ne: mmasɛkye agyalɛ, mmaku sonla, mmawua, mmadi daselɛ adalɛ di ɛ ze nee ɛ nli eni, ɔ nee mɔɔ bokɛboka nwo la."

21 Nrenyia ne buale kɛ, "Sumunli me ngakula nu, meli mɛla ɛhye mɔ anu ko biala azo."

22 Gyisɛse zele kɛ, "Yeha debie ko mɔɔ ɔwɔ kɛ ɛyɛ a. Tɔne wɔ agyapadeɛ mɔɔ ɛlɛ ye la amuala, na fa ezukoa ne kyɛ ehyiavolɛma. Ɛhye bahakyi agyapadeɛ amaa wɔ wɔ Anwuma belemgbunli maanle ne anu, na akee bɛla na bali me nzi."

23 Nrenyia ne dele ɛhye la, ɔvale nyane ɔhɔle, ɔluakɛ ɔle sukoavolɛ totohyia kpalɛ.

24 Gyisɛse nleanle ɔ kɔme anzi koonwu, na akee ɔzele ye ɛdoavolɛma ne mɔ kɛ, "Nɔhalɛ nu, ɔyɛ se kpalɛ ɔmaa sukoavolɛ kɛ ɔkɛhɔ Nana Nyamenle Belemgbunli maanle ne anu a! 25 Ɔnrɛyɛ ɛsesebɛ ɔnrɛmaa afunlumu kɛ ɔkɛwolo agbuyia tokule nu tɛla kɛ sukoavolɛ kɛhɔ Nana Nyamenle Anwuma belemgbunli maanle ne anu a."

26 Menli mɔɔ dele kɛ ɔlɛka ɛhye la zele kɛ, "Wio! Na saa zɛhae a ɔde a, ɛnee akee nwane bɔbɔ a kɛhola kɛnyia ngoanelielɛ a?"

27 Na ɔbuale bɛ kɛ, "Mɔɔ yɛ se maa sonla dasanli la, ɔnza Nana Nyamenle yɛ!"

28 Na Pita zele kɛ, "Awulae, na yɛdayɛ mɔɔ yɛgyakyi yɛ debie biala na yɛrali ɛ nzi noko la ɛ?"

29 Gyisɛse buale ye kɛ, "Ɔle zɔ, na memaa bɛade ɔ bo wienyi kɛ awie biala noko mɔɔ ɛgyakyi ye aako, ɔ ye, ɔ mediema, ye awovolɛma, nee ɔ mra wɔ Awulae Nyamenle Belemgbunli maanle ne duma nu ti la, 30 banyia bɛ mɔnwo wɔ kɛkala mekɛ ye anu, na eza noko yeanyia ngoane mɔɔ ɔnlɛ ye awieleɛ wɔ ewiade ne mɔɔ bara la anu."

31 Akee ɔvɛlɛle Bulu nee Nwiɔ ne na ɔzele bɛ kɛ, "Ayi mɔ, bɛnlea, yɛlɛkɔ Gyɛlusalɛm. Na saa yɛdwu ɛkɛ ne a, mɔɔ ngapezoma ɛha ye wɔ Sonla Ra ne anwo dɛbadɛba la amuala bayɛ zɔ. 32 Bɛbaye ye bɛamaa Maanle Gyɛne zo amra ne mɔ bɛamaa bɛazi ye amgbu, na bɛagua ɔ nyunlu nyiane aze bɛatoto nyɛlɛ ɔ nwo; 33 bɛbabilebila ye empele, na bɛahu ye. Na ye kenle nsa ne azo ɔbadwazo yeara ngoane nu bieko."

34 Bɛande ɛhye mɔ biala abo; ɔyɛle bɛ nzo nu kɛ asɛɛ agyebɛ edwɛkɛ bie la.

35 Na mɔɔ bɛbikyele Gyɛleko la, ɛnee nrenyia anyezinliravolɛ bie de adehanle ne ɛlɛsɛlɛzɛlɛ ezukoa. 36 Mɔɔ ɔdele kɛ menli dɔɔnwo bie ɛlɛyɛ dede pɛ nu la, ɔbizale deɛ mɔɔ ɛlɛkɔ zo a. 37 Bɛzele ye kɛ Gyisɛse mɔɔ vi Nazalɛte la ɛlɛse. 38 Ɛhye maanle ɔbɔle ɔ bo kɛ ɔteɛdea nu kɛ, "Gyisɛse, Devidi Ara, nwu me anwunvɔne!"

39 Menli mɔɔ li Gyisɛse anyunlu la deɛdeanle ye nu kɛ ɔmua ɔ nloa. Noko ɛnee bɔ zo mɔɔ ɔ nye ɛbolo kpole kpalɛ ɔlɛtea nu kɛ, "Devidi Ara, nwu me anwunvɔne" a!

40 Mɔɔ Gyisɛse radwule nrenyia ne anwo ɛkɛ ne la, ɔgyinlanle na ɔzele kɛ, "Bɛva anyezinliravolɛ ne bɛrɛla ɛke." 41 Gyisɛse bizale nrenyia ne kɛ, "Duzu a ɛkpondɛ a?"

Nrenyia ne zɛlɛle ye ɔzele kɛ, "Awulae, amaa meanwu debie!"

42 Gyisɛse zele kɛ, "Nwu debie! Wɔ diedi ɛmaa wɔde kpɔkɛ."

43 Na ɛkɛ ne ala, amgba ɔ nye nwiɔ ne bukele, na ɔdoale Gyisɛse ɔyele Nana Nyamenle ayɛlɛ. Na bɛdabɛ mɔɔ bɛnwunle ɛhye la amuala noko yele Awulae Nyamenle ayɛlɛ.