As 10 parábolas mais importantes de Jesus

3 Ndien Enye ama etiñ ediwak ikọ ọnọ mmọ ke ñke, ete, "Ọtọ iñwañ kiet ama aka ndisuan mme ñkpasip ke iñwañ esie. 4 Nte Enye akasuande ñkpasip, ubak ema eduọñọ, ke ọkpọusuñ, ndien mme inuen enyọñ editañ mmọ eta. 5 Ndien ndusuk ema eduọñọ ke isọñ itiat, ebiet emi esisit isọñ okodude. Ndien mmọ ema etibe usọp usọp koro isọñ mikọtuñọke. 6 Edi ke ini ekpri eyo asiahade, mmọ kpukpru eyemede, enyuñ ekpaña, koro oruñ mmọ miketimke iduk esit isọñ. 7 Ndusuk ñkpasip ema eduọñọ ke isọñ ñkukim, ndien ñkukim ama ọkọri onyuñ ofuk mmọ kpukpru. 8 Edi ndusuk ema eduọñọ ke eti isọñ enyuñ eñwum mfri; ubak eñwum mfri ikie, ubak ata, ubak edip ye duop. 9 Owo emi enyenede utọñ ndikop, yak enye okop."

Mbuk Eti Owo Sameria

25 Usen kiet akwa ọfiọk ibet Moses kiet ama adaha ada ndidomo Jisọs. Enye ama obup ete, "Andikpep, nso ke ami ndinam man ami ñnyene nsinsi uwem?"

26 Jisọs ama ọbọrọ enye ete, "Nso ke ewet ke ibet, afo akabade enye didie?"

27 Owo oro ama ọbọrọ ete, "afo enyene ndima Ọbọñ Abasi fo ke ofuri esit fo, ye ke ofuri ekikere fo, ndien afo enyene ndima mbọhọiduñ fo, nte afo amade idem fo."

28 Jisọs ama ọbọrọ enye, ete, "afo ọmọbọrọ ọfọn, nam emi ndien afo eyedu uwem."

29 Owo emi okoyom ndiwut nte ke imọ imenen oro anam enye ama obup Jisọs ete, "Ndien anie edi mbọhọiduñ mi?"

30 Jisọs ama ọbọrọ enye ete, "Owo kiet ama odu ke usuñ isañ ndito ke Jerusalem ñka ke Jeriko, ndien enye ama ọduọ oduk ubọk mbon ñwo. Mmọ ema esioño enye ọfọñ idem esie, enyuñ emia enye eti eti tutu enye ekpere ñkpa, enyuñ eyak enye ikpọñ do ke usuñ.

31 Ke mfọn iso oku Abasi mme Ju ama asaña edi, ndien ke adañaemi enye okutde nte owo oro anade do, enye ama asaña ke mben usuñ eken ebe esie. 32 Ñko, ekpeme itie uwa ukpono mme Ju, kini enye okonyuñ esimde itie oro owo emi akanade, onyuñ adian idem ke mben usuñ eken ebe esie.

33 Edi owo Sameria kiet emi okonyuñ odude ke usuñ isañ oro ama edisim ebiet emi owo emi akanade, ndien kini emi enye okokutde owo emi, enye ama okop mbọm eti eti. 34 Enye ama asaña ebine enye, onyuñ ada aran ye wain ibọk ọduọk ke mme nde unan esie, ndien ada ubak ọfọñ awañ ofuk mme unan esie. Enye ama emen owo emi odori ke enyọñ enañ isañ esie onyuñ ada enye aka ke ufọk usuñ ebiet emi enye ọkọnọde enye usọbọ emi odotde. 35 Ke udiana usen, owo Sameria oro ama osio bọn iba ọnọ ekpeme efe usuñ oro, onyuñ ọdọhọ enye ete, ‘Tim se enye, ndien ke edifiak mi ndi, ami ñyekpe fi kpukpru se afo udubiatde udori ke okuk emi nnọde fi.’ "

36 "Anie ke otu mme mmọ mbita emi ke afo ekere ete ekedi mbọhọiduñ owo emi ọkọduọde ke ubọk mbon ñwo?"

37 Ata ọfiọk mbet emi ama ọbọrọ ete, "Enye emi akatuade enye mbọm." Jisọs ama ọdọhọ enye, ete, "Afo ka konyuñ nam kpa ntre."

4 "Edieke owo mbufo kiet ekpenyenede erọñ ikie, ndien kiet ke otu oro osop, nte enye ikpekpọñke anañ ye efutenañ eken ke añwa ika ikoyom enye emi okosopde tutu enye okut enye? 5 Ke ini enye okutde erọñ oro, enye emen enye ke idara odori ke afara esie, 6 ndien enye ọnyọñ ufọk esie. Do ke enye okot mme ufan esie ye mme mbọhọiduñ obon, onyuñ ọdọhọ mmọ ete, ‘Edara ye ami, koro ami mmokut erọñ mi emi okosopde.’

7 Ami ntiñ emi nnọ mbufo nte, kpa ukem ukem usuñ oro idara emi okponde akan oro odu ke enyọñ kabaña anam idiọk kiet, emi akabarede esit, akan mme ndinen owo anañ ye efutenañ emi ntak miduhọ mmọ ndikabade esit."

11 Jisọs ama aka iso ọdọhọ ete, "Owo kiet ama odu emi ekenyenede nditọ iren iba: 12 Udọ esie ama ọdọhọ enye ete, ‘Ete, nọ mi udeme mi ke otu mme inyene fo.’ Ntre, enye ama abahade inyene esie ọnọ mmọ mbiba."

13 "Ke ñkpọ nte ibat usen ifañ ama ekebe, Udọ ama atañ kpukpru inyene esie ọtọñọ isañ aka anyan idut; do enye ama abiat ofuri inyene esie ke oburobut uwem. 14 Ke enye ama akabiat kpukpru inyene esie ama, ọkpọsọñ akañ ama omum ofuri idut oro, ndien enye ama ọtọñọ ndidu ke unana. 15 Ke ntak oro, enye ama emen idem esie akayak esin nte ukpe utom ke ubọk owo kiet ke obio oro, ndien owo oro ama ọdọñ enye aka iñwañ esie ọkọbọk mme edi. 16 Biọñ ama ọdọñ eyen emi eti eti, tutu esidọñ enye ndita mme ikpọk ọkọti emi enye esidade ọbọk mme edi."

17 "Ke akpatre, enye ama ọdiọñọ idem esie, ndien ama ọdọhọ ete, ‘Ke ufọk, kpukpru mme ndautom ete mi enyene ndia nsuhọ udia, ndien ami mi ke ntie biọñ ñkpere ñkpa!’ 18 Ami ñyenyọñ ufọk mbine ete mi; ñnyuñ ndọhọ enye nte, ‘Ete, ami mmanam idiọkñkpọ ke iso Abasi ye ke iso fo. 19 Ami ndotke aba ndikere eyen fo, mbọk da mi ọtọñọde ke emi tutu aka iso nte owo utom fo kiet.’ "

20 "Do enye ama adaha ke enyọñ onyuñ ebine ete esie. Edi ke ini ete esie adade okut enye ko nsan nsan mbọm ama ọyọhọ enye ke esit abaña eyen emi. Enye ama efehe ebine eyen esie, awaña enye akama onyuñ otim enye inua."

21 "Eyen esie ama ọdọhọ enye ete, ‘Ete, mmanam idiọkñkpọ ke iso Abasi ye ke iso fo, ndien ami ndotke nte ekpekotde mi eyen fo.’ "

22 "Edi ete esie ama ọdọhọ mme nditọ ufọk esie ete, ‘Esọp! Eda ediye ọfọñidem edisine enye. Enyuñ eda ñkpanuen esine enye ke nuenubọk esie, ye ikpaukot ke ukot esie. 23 Eda abak enañ emi esehede ediwot, man ñnyin idia usọrọ. 24 Koro eyen mi emi akakpade, enye afiak odu uwem; enye ama osop, edi mmokut enye.’ Ntre ke mmọ eketọñọ ndidia usọrọ."

25 "Ke ini ñkpọ ntibe emi, akpan mmọ okodu ke iñwañ. Ke ini enye akasañade ekpere ufọk, enye ama okop ñkukwak ye unek. 26 Ndien enye ama obup eyen ufọk ete esie kiet ete, ‘Nso ika iso ke ufọk?’

27 Enye ama ọbọrọ enye ete, ‘Eyen eka fo ama ọnyọñ edi, ndien ete mbufo ama owot abak enañ koro enye okokutde enye ọnyọñde edi ke ifure ye nsọñidem.’ "

28 "Akpan emi ama ayat esit ikonyuñ inyimeke ndiduk ufọk, do ete esie ama ọwọrọ añwa okonyuñ ekpe enye ubọk. 29 Edi enye ama ọbọrọ ete esie ete, ‘Sese, ediwak isua emi ami ndukde ufin nnọ fi, akananam ami nnenike uyo fo. Kpa ye oro akananam afo unọhọ mi ekpri eyen ebot kiet, man nda nnem idem mi esit ye mme ufan mi.’ 30 Edi ke ini eyen fo emi ama okoyo akatahade inyene fo ama ye mme iban akpara ọnyọñde edi, afo owot abak enañ ọnọ enye!"

31 "Ete esie ama ọdọhọ enye ete, ‘Eyen mi, afo ododu ye ami kpukpru ini, ndien kpukpru se ami ñnyenede enyene fi.’ 32 Edi ana ñnyin idara, inyuñ inem idem ñnyin esit, koro eyen eka fo emi ama akpa, edi ọtọñọ ntak odu uwem, enye ama osop, ndien imetọñọ ntak ikut enye."

45 "Ñko, Obio Ubọñ Abasi ebiet anyam urua emi oyomde mme nsọñurua itiat; 46 ndien ke enye ama okokut eti esie, emi ọsọñde urua, enye akanyam kpukpru inyene esie ada edep enye."

9 Ntem ke Jisọs eketiñ mbuk emi ọnọ ndusuk mmọ emi eburede mbure ebaña idem mmọ, nte ke mmimọ imọfọn ikan, enyuñ ese mbon efen ke usuhọde itie.

10 "Owo iba ekedọk eka ubọñ akam ke itie ukpono Abasi, kiet ekedi owo ntañidem, mfọnmma owo Farisi, ndien enye eken ekedi owo ñwo, ọbọ utomo.

11 Mfọnmma owo ntañidem Farisi adaha ada ọbọñ akam esie ntem, ‘Mmọkọm Fi Abasi, ami ndighe anam idiọkñkpọ nte mme mmọ eken, akpan akpan nte adia ñwo ọbọ etibe ukara emi osuk adade ko. Koro akananam ntukke owo, akananam nsinke efibe. 12 Ntetre udia ikaba ke urua kiet, ñnyuñ nnọ Abasi ọyọhọ ubak kiet ke mbak duop mi ke ñkpọ ekededi emi ọnọde mi okuk.’ "

13 "Edi ọbọ utomo ama ada nsan nsan ke anyan ebiet inyuñ imaha ndimenede enyin esie nse enyọñ, edi ke ini enye ọbọñde akam, enye ọbọñ ye ọkpọsọñ mfuhọ, amia ubọk esie mbiba ke esit eseme ete, ‘Abasi, tua mi idiọk owo Fo mbọm,’ 14 Ami ndọhọ mbufo nte ke idiọk owo emi, idighe owo Farisi eken, ama ọnyọñ ufọk esie ye edidahadonnọ, koro eyesuhọrede mbon ntañidem, edi eyekpono mbon nsuhọdidem."

14 Ñko ekeme ndida Obio Ubọñ Abasi ndomo ye owo emi okoyomde ndika isañ ke anyan idut, ndien enye ama okot mme nditọ ufọk esie, onyuñ ayak ubiọñ mme inyene esie esin mmọ ke ubọk."

15 "Enye ama ọnọ owo kiet bọn ition, ndien ọnọ efen bọn iba, ndien enye ama ọnọ akpatre owo bọn kiet, enye ọkọnọ mmọ etiene nte ukeme mmọ kiet kiet ekedide. Ndien enye ama adaha esie. 16 Owo emi ọkọbọde bọn ition ama ọtọñọ ke ndo ndo oro ndida okuk oro ndep ñkpọ ñnyuñ ñnyam, ndien ikebighike enye ama anam udori bọn ition odori. 17 Owo emi ọkọbọde bọn iba onyuñ ada esie ini kiet ọtọñọ urua ñko, onyuñ adia udori bọn iba odori.

18 Edi owo emi ọkọbọde bọn kiet ama otibi isọñ obuk okuk eteufọk esie."

19 "Ekem ke anyan ini ama ekebe, eteufọk mmọ ama ọnyọñ isañ esie edi, ndien ama okot mmọ ete edi edinam ibat okuk esie enọ enye. 20 Owo emi enye ọkọnọde bọn ition ama ada bọn duop ọsọk enye, onyuñ ọdọhọ enye ete; ‘Ete ufọk, afo ọkọnọ mi bọn ition, ndien ami madia udori ition ndori.’ "

21 "Ete ufọk esie ama otoro enye eti eti ke eti utom esie, onyuñ ọdọhọ enye ete ‘amanam akpanikọ ke ekpri okuk emi; ke ntre idahaemi ñyenọ fi ediwak ñkpọ efen ekpeme. Di dibuana ke idara eteufọk fo.’ "

22 "Enye emi ọkọbọde bọn iba onyuñ edi, onyuñ ọdọhọ ete, ‘Ete ufọk, afo ọkọnọ mi bọn iba, se madia udori bọn iba ndori.’ "

23 "Ete ufọk esie ama ọbọrọ enye ete, ‘amanam eti eti, afo eti asañautom ye owo akpanikọ. Afo amanam akpanikọ ke ata ekpri okuk emi, ntre ami ñyenọ fi ubiọñ ediwak ñkpọ. Di dibuana ke idara eteufọk fo.’ "

24 "Ekem owo emi ọkọbọde bọn kiet edi, onyuñ ọdọhọ, ete, ‘Ete ufọk, ami mma ndiọñọ nte ke afo edi owo emi ọsọñde ido, onyuñ ọdọkde ke ebiet emi afo mukọtọhọ, 25 onyuñ ọkọ ke ebiet emi afo mukasuanke ñkpasip. Ntem ami mma ñkop ndik, oro anam mma mmen okuk fo ñkebuk ke isọñ, sese se inyenede fi mi.’ "

26 "Edi eteufọk esie ama ọbọrọ enye ete, ‘Afo idiọk owo ye owo ifu! Nte afo ama ọdiọñọ ete ke ami ndọk ke ebiet emi ami mme ñkọtọhọ, ñnyuñ ñkọ ke ebiet emi ami mme ñkesuanke ñkpasip? 27 Afo akpakakam emen okuk mi ekesin ke itie unim okuk man ami mma ñnyọñ ndi ami ñkpọbọ okuk mi ye udori.’ " 28 Ebọ owo emi okuk oro enyuñ enọ owo emi ekenyenede bọn duop. 29 Koro owo emi akamade se enọde enye ọfọn, eyemana edian enọ enye, man enye ọkọkọrọ enyene awak akan. Edi owo emi minamke akpanikọ, eyebọ enye idem ekpri emi enye ekenyenede. 30 Ndien etop anana udori eyen ufọk oro esio ke añwa, ke ekim, ke ebiet emi eyet ye ntaedet edidude.

19 Owo inyene kiet ama odu emi ekesinede ata nsọñurua ọfọñ ye ñkisi, onyuñ odu ñkoñkoñ uwem kpukpru usen. 20 Usen kiet ema emen Lasarọs emi ekedide ebeñe ebeñe, emi inia ọkọyọhọde ofuri idem esie ekenim ke enyin usuñ owo inyene oro: 21 "Enye akana do ye idorenyin ete ke iyetañ mbeñe udia emi eduọñọde eto okpokoro owo inyene emi idia, mme ebua ekenyene ndidi ndidei mme inia esie. 22 Ekem ke akpatre, ebeñe ebeñe oro ama akpa, ndien mme enjel ema emen enye eka ekenim ke ñkañ Ebraham. Owo inyene oro ama akpa ñko, ndien ema ebuk enye. 23 Ke ñkpọdiọhọ ikañ emi owo inyene emi okodude ke ndutuhọ, enye ama emenede enyin ese ndien enye ama okut Ebraham ko nsan nsan ye Lasarọs, ke ñkañ esie.

24 Do enye esin uyo okot ete, ‘Ete Ebraham, kop mi mbọm ñnyuñ dọñ Lasarọs ekedebi utit nnuen ubọk esie ke mmọñ ada edibit edeme mi, koro ami ndude ke akwa ubiak ke ikañ emi.’ "

25 "Edi Ebraham ama ọbọrọ enye ete; ‘Eyen, ti ete ke ofuri eyo uwem fo, afo ama enyene kpukpru nti ñkpọ ke ini Lasarọs ọkọbọde mme ndiọi ñkpọ, edi ke emi enye ke ọbọ inemesit kini afo odude ke ufen ye ndutuhọ. 26 Ndien akande oro, akamba ukpe odu mi ke ufọt ñnyin emi abaharede ñnyin ye mbufo ndien owo emi oyomde ndisaña nto mi ndi do ikemeke, owo inyuñ ikemeke ndibe inyañ do ndi ntiene ñnyin mi.’ "

27 "Enye ama ọbọrọ ete, ‘Do mmekpe fi ubọk, nte, dọñ Lasarọs aka ke ubon ete mi, 28 koro ami mmenyene nditọ ete iren ition. Yak enye okoduri mmọ utọñ abaña itie ndutuhọ emi ndude mi, man mmọ ñko edidi ediduk ke ndutuhọ emi ke mmọ ema ekpaña.’ "

29 "Edi Ebraham ama asian enye ete, ‘Mmọ enyene Moses ye mme Asiak Uduak Abasi yak mmọ ekpañ utọñ enọ mme mmọ oro.’ "

30 "Owo inyene ama ọbọrọ ete, ‘Baba Ete Ebraham, mmọ idimaha ndikop mmọ, edi edieke edọñde owo oto mi ke otu mme akpa ñkpa aka, mmọ eyekabade esit.’ "

31 "Edi Ebraham ama ọbọrọ enye ete, ‘Edieke mmọ mikpañke utọñ inọ Moses, ye mme oku Abasi eken, mmọ idikpañke utọñ, ekpededi owo eset ke ñkpa aka ebine mmọ.’ "

24 Se ñke efen mi emi Jisọs akadade ekpep ñkpọ abaña Obio Ubọñ Abasi: "Obio Ubọñ Abasi etie nte ọtọ iñwañ emi ọtọde nti ñkpasip ke iñwañ esie. 25 Edi ke okoneyo usen kiet, nte kpukpru owo enade ede idap, asua esie edi editọ mme ndiọi ñkpasip abuak ye nti ñkpasip ibokpot esie, ndien okokure enye ọwọrọ ọkpọñ iñwañ oro. 26 Ndien kadaña emi nti ñkpasip etọñọde ndikọri mme ndiọi ñkpasip oro enyuñ ekọri ye mmọ ukem ukem."

27 Mme anam utom ke iñwañ edisian enyene iñwañ, ete, "Ete, iñwañ fo emi afo ọkọtọde nti mfri, eyeyọhọ idahaemi ye mme mbaraekpe."

28 Ndien enye ama ọbọrọ ete, "Asua mi anam oro." Mmọ ebup enye ete, "Nte ñnyin iwubede kpukpru mmọ ifep?"

29 "Edi Enye ama ọbọrọ mmọ, ete Baba-o, mbak mbufo ediwot mme mmọ eken edide nti mfri ibokpot ke edinam ntre. 30 Eyak kpukpru mmọ ekọri ebiet kiet tutu osim usen ñkpeñe, ndien ñyedọhọ mme ekpeñe ibokpot esat nti esioño enyuñ etebe mmọ ekọñ ke enyọñ ikañ, ndien efọp kpukpru mme ndiọi ñkpasip."

Mme Mbuk Efen Etukde Obio Ubọñ

1 "Ekeme ndida Obio Ubọñ Abasi ndomo ye mbuk nditọ iban ndọ duop emi ekekamade mme utueneikañ mmọ eka ndisobo ye ebe ndọ. 2 Ition ke otu mmọ ekedi mme ọfiọkñkpọ ndien eken ekedi mme ndisime. 3 Mme ndisime ition oro ema ekama utueneikañ edi ikakamake aran efen ke ekpeme. 4 Edi mme ọfiọkñkpọ iban ition eken ema ekama aran ke ekpeme edian ye utueneikañ mmọ.

5 Ebe ndọ ama ebighi ndidi, do kpukpru mmọ ema eyet idap enyuñ ede." 6 "Ke ufọt okoneyo, ema efiori ete, Sese Ebe ndọ mi, ewọñọ edisobo ye enye."

7 "Ndien kpukpru nditọ iban emi ema edemere enyuñ ediọñ mme utueneikañ mmọ. 8 Mme ndisime ition oro ema edọhọ mme ọfiọk ñkpọ ition eken ete, ‘Enọ ñnyin aran mbufo esisit, koro utueneikañ ñnyin emọñ enime.’ "

9 "Mme ọfiọkñkpọ ition oro ema ebọrọ mmọ ete, baba, koro se idude idikemke ñnyin ye mbufo. Ekam eka ke ebiet mme anyam aran ekedep nte eyomde."

10 "Edi ke ini mmọ ekedude ke usuñ udep aran, Ebe ndọ ama edisim. Mme nditọ iban emi ekebeñede idem ebet ema etiene enye eduk ekebuana ke usọrọ ndọ, ndien ema eberi usuñ."

11 "Ikebighike ikaha mme nditọ iban ition eken ema enyọñọ edi, enyuñ efiori ete, Ọbọñ, berede usuñ enọ ñnyin."

12 "Edi enye ama ọbọrọ mmọ ete, ‘Ami ntiñ akpanikọ nnọ mbufo nte, ke ami ndiọñọke mbufo.’ "

13 "Ke ntre etaba idap enyuñ ekpeme koro mbufo mifiọkke usen mme ini ñkanika.