8 Äwajens, Breeda, aules, waut woarhauftich, waut ieeboa, waut jerajcht, waut rein, waut leeftolich es, aules, met eenem gooden Roop, auf irjent eene Tugent* un auf irjent een Low, doaräwa denkjt no.

2 Un stalt junt nich met dise Welt jlikj, oba woat vewaundelt derch de Ernierunk von jun Senn, daut jie priefen* kjennen, woont Gott sien gooda, aunjenäma un vollkomna Wellen es. Efs 4:23; 5:10,17

13 Doawäajen bebinjt de Hoften von jun Senn, siet nichta un hopt gaunz opp de Jnod, dee junt jebrocht woat derch Jesus Christus siene Openboarunk. Luk 12:35-36

20 Oba to däm, dee doa äwamotich* doonen kaun äwa aules, waut wie bedden ooda vestonen kjennen, no de Krauft, dee en ons wirkjt, 21 to däm de Iea en de Jemeent en Christus Jesus derch aule Tieden, von Eewichkjeit to Eewichkjeit! Amen.

12 Wiels Gott sien Wuat es läwendich un kjraftich un schoapa aus jieda dobbelt-schniedjet Schwieet, un jeit derch, bat daut Deelen von Seel un Jeist, uk Jläda un Moakj, un es een Rechta vonne Jedanken un Hoatens-Jesennungen. Jer 23:29; Opb 2:12

20 Un Hee säd: Waut ut däm Mensch rutjeit, daut ve-onreinicht dän Mensch; 21 wiels von bennen ut daut Menschenhoat, komen beese Jedanken, Ehebruchs, Huararieen, Morts, 22 Stälarieen, Habsucht*, Boosheit, Hinjalest, Fleescheslost, beeset Uag*, Lastrunk, Stolt, Domheit. 23 Aul dise schlajchte Dinja komen von bennen rut un ve-onreinjen dän Mensch.

25 Doawäajen saj Ekj junt: Sorcht nich om jun Läwen, waut jie äten un waut jie drinkjen sellen; uk nich om junen Kjarpa, waut jie auntrakjen sellen. Es daut Läwen nich mea aus daut Äten? un de Kjarpa mea aus de Kjleedunk? Flp 4:6; 1Pe 5:7

7 Un wan jie bäden, sell jie nich väl blaubren soo aus de Heiden; wiels dee meenen, see woaren jehieet, wan see väl Wieed brucken. Jes 1:15

1 Aus sikj entweschen daut Volkj bie de Dusende vesaumelt haud, soo daut see sikj unjarenaunda veklunjden, funk Hee aun, siene Jinja to sajen: Ieeschtens: heet junt fa dän Suadieech von de Farisäa, waut de Heichlarie es. Mat 16:6,12; Mrk 8:15 2 Doa es oba nuscht toojedakjt, daut nich woat openboat woaren, ooda Vestoaknet, waut nich woat bekaunt woaren. Luk 8:17 3 Doawäajen, wautemma jie en de Diestanis räden, woat em Licht jehieet woaren, un wautemma jie en daut Ua sajen enne Stowen, daut woat opp de Däakja jeprädicht woaren.

4 Un Ekj saj junt, miene Frind: Fercht junt nich fa dee, dee dän Kjarpa dootmoaken, un nohäa nuscht wieda doonen kjennen. 5 Ekj well junt oba wiesen, fa wäm jie junt ferchten sellen: Fercht junt fa dän, dee, nohäa Hee dootjemoakt haft, uk Macht haft, en de Hal to schmieten. Jo, Ekj saj junt, dän fercht. Heb 12:29 6 Vekjaft eena nich fief Spoalinja fa twee Zent*? Un nich eent von dee es ver Gott vejäten. 7 Oba uk de Hoa von jun Kopp sent aula jetalt. Doawäajen fercht junt nich; jie sent mea wieet aus väle Spoalinja. Luk 21:18

8 Ekj saj junt oba: Een jiedra, dee Mie ver de Menschen bekjanen woat, dän woat uk de Menschensän ver Gott siene Enjel bekjanen. 9 Wäa Mie oba velicht ver de Menschen, dee woat ver Gott siene Enjel veloagen woaren. 1Sa 2:30; Luk 9:26 10 Un een jiedra, dee een Wuat sajen woat jäajen dän Menschensän, däm woat vejäft woaren; wäa oba jäajen dän Heiljen Jeist lastat, woat nich vejäft woaren. Luk 21:12-15 11 Wan see junt oba ver de Synagogen un de Oobrichkjeiten un Jewaulten leiden, dan sorcht nich, woo ooda wuamet jie junt veteidjen ooda waut jie sajen sellen; 12 wiels de Heilja Jeist woat junt en deeselwje Stund lieren, waut jie sajen sellen.

13 Dan säd oba eena von ut de Volkjshäad to Am: Liera, saj mienem Brooda, daut hee met mie daut Oafgoot deelen saul. 14 Hee oba säd to am: Mensch, wäa haft Mie to eenem Rechta un Oafgoot Endeela äwa junt jesat? 15 Un Hee säd to äant, seet doano un heet junt fa de Habsucht, wiels kjeenem sien Läwen besteit, derch dän Äwafluss von waut hee haft. 1Tim 6:9-10

16 Un Hee vetald äant een Jlikjnis un säd: Een jewessa rikja Maun sien Launt haud väl enjebrocht. 17 Un hee äwaläd bie sikj selfst un docht: Waut saul ekj doonen? Wiels ekj hab nich, wua ekj miene Frucht saumlen saul. 18 Un hee säd: Dit well ekj doonen: Ekj well miene Schienen dolbräakjen un jratre buen un well doa aul mien Jeträajd un miene Jieta toopsaumlen. 19 Un ekj well to miene Seel sajen: Seel, du hast väle Jieta fa väle Joaren; hab nu Ru, at, drinkj, un sie froo! Ps 49:17-20 20 Oba Gott säd to am: Du Noa! Dise Nacht woat diene Seel von die jefoddat woaren; un fa wäm woat daut sennen, waut du reedjemoakt hast? 21 Soo jeit däm daut, dee fa sikj selfst Schaza saumelt un nich rikj es en Gott. Mat 6:20

22 Un Hee säd to siene Jinja: Doawäajen saj Ekj junt: Sorcht nich fa jun Läwen, waut jie äten sellen, uk nich fa junen Kjarpa, waut jie auntrakjen sellen. 23 Daut Läwen es mea aus daut Äten un de Kjarpa mea aus de Kjleedunk. 24 Beseet junt de Kraujen: dee seien nich un arnten nich, dee haben nich Komasch uk nich Schienen, un Gott näat dee doch. Woo väl mea wieet sent jie aus de Väajel? 25 Wäa von junt kaun siene Hecht derch Sorjen eene Ell biesaten? 26 Wan jie nu daut Jerinjste nich doonen kjennen, wuarom sorj jie dan fa daut Äwaje? 27 Beseet de Lelje, woo dee waussen; dee oabeiden nich, uk spennen dee nich. Ekj saj junt oba, daut uk Salomo en aul siene Harlichkjeit nich soo jekjleet wia aus eene von dise. 28 Wan oba Gott daut Graus, daut vondoag opp de Stap steit un morjen en dän Owen jeschmäten woat, soo kjleet; wooväl mea junt, Oo jie Kjliengloowsche! 29 Un jie, sorcht nich doaräwa, waut jie äten ooda waut jie drinkjen sellen, un räajcht junt nich opp; 30 wiels no soont aules sieekjen de Heiden von dise Welt; oba jun Voda weet, daut jie daut brucken. 31 Oba tracht no Gott sien Rikj, un aul dise Dinja woaren junt biejelajcht woaren.

32 Fercht die nich, du kjliene Häad; wiels daut haft junem Voda goot jefollen, junt daut Rikj to jäwen. Luk 22:29 33 Vekjeept jun Hab-un-Goot un jäft Aulmoosen; moakt junt Jelttauschen, dee nich oolt woaren, een Schauz em Himmel, dee nich vejeit, wua kjeen Stäla dichtbie kjemt un de Motten daut nich vedoawen. Luk 18:22 34 Wiels wua jun Schauz es, doa woat uk jun Hoat sennen.

35 June Hoften sellen omjeschnalt sennen un june Laumpen brennen; 2Mo 12:11; Mat 25:1-13; 1Pe 1:13 36 un jie, siet soo aus Menschen, dee no äarem Harn luaren, wan hee trigj-kjemt von de Kjast, daut, wan hee kjemt un aunklopt, see am fuaz opmoaken. Opb 3:20 37 Seelich sent de Kjnajchts, wäm de Har, wan hee kjemt, woaken finjt. Woarhauftich, Ekj saj junt: Hee woat sikj ombinjen un äant aun dän Desch saten un woat komen un äant bedeenen. 38 Un wan hee en de tweede Nachtwoak* ooda en de dredde Nachtwoak* kjemt un finjt äant soo, seelich sent soone Kjnajchts. 39 Oba dit sell jie weeten: Wan de Hushar jewist haud, to woone Stund de Deef komen wudd, wudd hee jewoakt haben un nich en sien Hus enbräakjen loten. 1Tess 5:2 40 Doawäajen siet jie uk reed; wiels de Menschensän kjemt to eene Stund, wan jie daut nich meenen.

41 Dan säd Petrus to Am: Har, sajchst Du dit Jlikjnis to ons ooda uk to aulem? 42 De Har oba säd: Wäa es nu de trua un kluaka Vewaulta, wäm de Har äwa siene Deena* saten woat, daut hee äant äa toojemätnet Äten to rajchte Tiet jäwen woat? 43 Seelich es dee Kjnajcht, dän sien Har, wan hee kjemt, am finjen woat soo doonen. 44 Ekj saj junt woarhauftich: Hee woat am äwa aul siene Jieta saten. 45 Wan oba de Kjnajcht en sien Hoat sajen woat: Mien Har vetrakjt to komen un fangt aun, de Kjnajchts un de Deenstmäakjes to schlonen un to äten un to drinkjen un sikj to besupen; 46 dan woat däm Kjnajcht sien Har aun eenem Dach komen, wua hee nich opp räakjend un en eene Stund, woone hee nich weet, un woat am twei-schnieden un am sien Deel met de Onjleewende jäwen. 47 De Kjnajcht oba, dee däm Harn sien Wellen wist un sikj nich reedmuak, uk nich no sienem Wellen deed, woat met väl Schläaj jeschloagen woaren. Jak 4:17 48 Wäa dän oba nich wist, oba deed, waut de Schläaj wieet sent, woat met weinich jeschloagen woaren. Wiels wäm väl jejäft es, von däm woat väl jesocht woaren, un wäm väl aunvetrut es, von däm woat soo väl mea jefoddat woaren.

49 Ekj sie jekomen, Fia oppe Ieed to schmieten, un waut well Ekj, wan daut aul aunjestekjt es? 50 Oba Ekj hab eene Doop, wuamet Ekj jedeept woaren mott, un woo sie Ekj soo bedrenjt, bat dee ieescht vollbrocht es! Mat 20:22; 26:38; Luk 18:31 51 Meen jie, Ekj sie jekomen, Fräd opp de Ieed to brinjen? Ekj saj junt: Nä, oba Spoolungen. 52 Wiels von nu aun woaren fief en een Hus jedeelt sennen; dree jäajen twee, un twee jäajen dree. 53 De Voda woat jedeelt sennen jäajen dän Sän, un de Sän jäajen dän Voda; de Mutta jäajen de Dochta, un de Dochta jäajen de Mutta; de Schwieemutta jäajen äare Schwieedochta, un de Schwieedochta jäajen äare Schwieemutta.

54 Hee säd oba uk to de Volkjshäaden: Wan jie eene Wolkj vom Wasten oppkomen seenen, dan saj jie fuaz: Een Räajen kjemt, un daut passieet soo. 55 Un wan de Siedwint weit, saj jie: Daut woat heet woaren, un daut passieet soo. 56 Jie Heichla! De Aunsecht von de Ieed un däm Himmel kjenn jie be-uadeelen; oba woo kjenn jie dise Tiet nich be-uadeelen?

57 Un wuarom doo jie nich von junt selfst rechten, waut rajcht es? 58 Wiels wan du met dienem Jäajna no eenem Väaschten jeist, dan bemieej die oppem Wajch, am loos to woaren, daut hee die nich ver dän Rechta schlapt, un de Rechta die dän Jerechts-Deena äwajeft, un de Jerechts-Deena die en daut Jefenkjnis schmitt. 59 Ekj saj die: Du woascht doa nich rutkomen, bat du uk daut latste Zent* betolt hast. Mat 5:25-26

3 Wiels ekj saj derch de Jnod, dee mie jejäft es, to eenem jiedren mank junt, nich hecha von sikj to denkjen, aus et jehieet to denkjen, oba soo to denkjen, aus et veninftich es, no de Mot vom Gloowen, dee Gott eenem jiedren toojedeelt haft. Mat 20:26; 1Kor 4:6; 12:11; Efs 4:7

10 Ekj ermon junt oba, Breeda, derch dän Nomen von ons Har Jesus Christus, daut jie aula dautselwje räden un daut doa nich Spoolungen mank junt sent, oba daut jie vollkomen en dämselwjen Senn un en deeselwje Meeninj sent. Ree 15:5; 1Kor 11:18; Flp 2:2

11 Wiels woona von de Menschen weet, waut em Mensch es, aus mau de Jeist vom Mensch, dee en am es? Jrod soo weet uk kjeena, waut en Gott es, aus bloos de Jeist Gottes.

18 Kjeena saul sikj selfst aunschmäaren. Wan irjentwäa mank junt denkjt, weis to sennen en dise Welt, dee saul een Noa woaren, om daut hee weis woaren kaun. Opb 3:17-18