1 Un ekj sach eenen aundren stoakjen Enjel vom Himmel raufkomen, jekjleet met eene Wolkj; un een Räajenboagen wia opp sienem Kopp, un sien Aunjesecht wia soo aus de Sonn un siene Feet soo aus Fia-Stendasch; 2 un hee haud een opjemoaktet Buakje en siene Haunt. Un hee sad sienen rajchten Foot oppet Mäa un dän Linkjen oppe Ieed; Ps 29:3-9 3 un hee schrieech met lude Stemm, soo aus een Leiw brelt. Un aus hee schrieech, räden de säwen Donnasch äare Stemmen. 4 Un aus de säwen Donnasch äare Stemmen jerät hauden, wull ekj schriewen; un ekj hieed eene Stemm vom Himmel to mie sajen: Vesäajel, waut de säwen Donnasch jerät haben, un schriew daut nich. Dan 8:26; 12:4,9 5 Un de Enjel, dän ekj oppet Mäa un oppe Ieed stonen sach, hoof siene Haunt nom Himmel 6 un schwua bie däm, dee doa läft fa emma un emma, woona erschaufen haft dän Himmel un waut doabennen es un de Ieed un waut doabennen es un daut Mäa un waut doabennen es, daut doa saul kjeene Tiet mea sennen, Dan 12:7 7 oba en de Doag von de Stemm von däm säwenden Enjel, wan hee aunfangt to blosen, saul Gott sien Jeheemnis verecht sennen, soo aus Hee siene Kjnajchts, de Profeeten, daut vekjindicht haft. Apj 3:21; Opb 11:5

8 Un de Stemm, dee ekj ut däm Himmel hieed, räd wada met mie un säd: Go, nemm daut opne Buakje von däm Enjel siene Haunt, dee doa oppet Mäa un oppe Ieed steit. 9 Un ekj jinkj nom Enjel un säd to am: Jeff mie daut Buakje. Un hee säd to mie: Nemm, un at daut opp; un daut woat dienen Buck betta moaken, oba en dien Mul woat daut seet sennen, soo aus Honnich. Hes 3:1-3 10 Un ekj neem daut Buakje ut däm Enjel siene Haunt un eet daut opp; un daut wia en mien Mul seet aus Honnich, un aus ekj daut jejäten haud, wort mien Buck betta. 11 Un hee säd to mie: Du motst wada äwa väle Menschen un Nazionen un Tungen un Kjennichs profezeien. Jer 1:9-10