De Openboarunk von Johanes 18

Dee Faul von Babelon

1 Un no dise Dinja sach ekj eenen aundren Enjel vom Himmel raufkomen, dee haud groote Macht; un de Ieed wort dach von siene Harlichkjeit. 2 Un hee schrieech ut Macht met groote Stemm un säd: Babelon, de groote, es jefollen, jefollen un es eene Diewels*18:2 Griechisch Dämon.-Woninj jeworden un eene Bewoarunk fa jieda onreina Jeist un eene Bewoarunk fa jieda onreinet un jehaustet Voagel. 3 Wiels aule Nazionen haben von däm Wien von de Wutt von äare Huararie jedrunken, un de Kjennichs von de Ieed haben met ar jehuat, un de Haundelslied von de Ieed sent rikj jeworden derch de Groosoatichkjeit von äa Vemieejen. 4 Un ekj hieed eene aundre Stemm von ut däm Himmel, dee säd: Got von ar rut, miene Menschen, daut jie nich Deelnäma sent aun äare Sinden, un daut jie nich von äare Ploagen kjrieen. 5 Wiels äare Sinden sent bat aum Himmel jelangt, un Gott haft aun äare Ojjerajchtichkjeiten jedocht.

6 Tolt ar soo, aus see uk junt jetolt haft, un vedobbelt ar daut dobbelde no äare Woakjen; en daut Kuffel, woont see enjerieet haft, rieet ar daut dobbelde en. 7 Doano, aus see sikj veharlicht haft un woollostich läwd, sooväl Kwol un Trua jäft ar. Wiels see sajcht en äa Hoat: Ekj sett aus Kjennijin, un eene Wätfru sie ekj nich un woa kjeen Truaren seenen. 8 Doawäajens woaren äare Ploagen komen en een Dach: Doot un Truaren un Hungaschnoot, un see saul met Fia vebrent woaren; wiels stoakj es de Har Gott, dee ar recht.

9 Un de Kjennichs von de Ieed, dee met ar jehuat un woollostich jeläft haben, woaren ar behielen un bekloagen, wan see dän Ruak von äa Braunt seenen woaren; 10 see stonen wietauf, wäajens Forcht fa äare Kwol un sajen: Wee, wee de groote Staut Babelon, de majchtje Staut! Wiels en eene Stund es dien Jerecht jekomen. 11 Un de Haundelslied von de Ieed hielen un truaren äwa ar, wiels kjeena kjaft mea äare Woa: 12 De Woa von Golt un Selwa un diere Steena un Parlen un feinet Lienzeich un Purpur un Siedzeich un Schoarlach un aulahaunt scheenrikjendet Holt un veschiedne Sachen von Aulfenbeen un veschiedenste Jefässa von dieeschtet Holt un von Brons un von Iesa un von Marmor, 13 un Kerneel un Parfum un Saulw un Weiruak un Wien un Eelj un fienet Mäl un Weit un Vee un Schop, un von Pieed un von Woages un von Sklowen un von Menschen-Seelen. 14 Un daut Oft, wua diene Seel no jelest, es von die veloten, un aul dee feine un prachtvolle Dinja haben die veloten, un du woascht dee nienich mea finjen. 15 De Haundelslied von dise Dinja, dee von ar sent rikj jeworden, woaren von wietauf stonen, wäajens de Forcht fa äare Kwol, hielen un truaren 16 un sajen: Wee, wee, de groote Staut, dee aunjetrocken wia en feinet Lienzeich un Purpur un Schoarlach un äwalajcht met Golt un diere Steena un Parlen! 17 Wiels en eene Stund es een soon groota Rikjtum to Grunt jegonen. Un jieda Scheppmeista un aul dee, waut opp Schäp reisen un Seemana un soone, waut oppem Mäa schaufen, stunden von wietauf 18 un schrieejen, aus see dän Ruak von äa Braunt sagen, un säden: Waut es soo aus dise groote Staut? 19 Un see schmeeten Stoff opp äare Kjap un schrieejen, hielden un truaden un säden: Wee, wee, de groote Staut, wuarenn aule, dee Schäp oppem Mäa hauden, rikj worden derch äare Kostboakjeit, wiels en eene Stund es see to Grunt jegonen.

20 Frei die äwa ar, du Himmel un jie heilje Apostel un jie Profeeten, wiels Gott haft jun Uadeel aun ar jerajchent.

21 Un een stoakja Enjel hoof eenen Steen opp, soo aus een groota Molsteen un schmeet dän en daut Mäa un säd: Soo aus dit woat de groote Staut Babelon met Jewault raufjeschmäten woaren un saul nienich mea jefungen woaren. 22 Un de Stemm von Hoapenspäla un Musikaunten un Fleetenspäla un Trompeetenspäla woaren nienich mea en die to hieren sennen, un kjeen Kjenstla von irjent eene Konst woat mea en die to finjen sennen, un daut Jereisch von däm Molsteen woat nienich mea en die to hieren sennen, 23 un daut Licht von ne Laump woat nienich mea en die schienen, un de Stemm von däm Briegaum un von de Brut woaren nienich mea en die to hieren sennen; wiels diene Haundelslied wieren de Groote von de Ieed; wiels derch diene Zaubarie worden de Velkja vefieet. 24 Un en ar wort daut Bloot von de Profeeten jefungen un von de Heilje un von aul de Jeschlachte opp Ieeden.