1 Aun dän Enjel von de Jemeent en Efesus schriew: Dit sajcht, dee doa de säwen Stierns en siene rajchte Haunt helt, dee doa medden mank de säwen goldne Laumpenhoola jeit: Opb 18:19 2 Ekj kjan diene Woakjen un diene Oabeit un diene Jedult un daut du de Beese nich vedroagen kaust; un du hast dee jeprooft, waut sajen, see sent Apostel, un sent et nich, un hast dee aus Läajna befungen; 3 Un du hast vedroacht un hast Jedult, un om mien Nomens haulwen hast du jeoabeit un best nich meed jeworden. 4 Oba Ekj hab waut jäajen die, wiels du hast diene ieeschte Leew veloten. 1Tim 5:12 5 Erinna die aulsoo, von wua du jefollen best, un doo Busse, un doo de ieeschte Woakjen; wan oba nich, kom Ekj schwind no die un woa dienen Laumpenhoola von sienem Plauz wajchschaufen, buta du Busse deist. 6 Oba dit hast du, daut du de Woakjen von de Nikolaiten hotst, dee Ekj uk hot. Ps 139:21 7 Wäa een Ua haft, lot am hieren, waut de Jeist to de Jemeenten sajcht. Wäa äwawint, däm woa Ekj von däm Läwens-Boom to äten jäwen, woona medden en Gott sien Paradies es. 1Mo 2:9; Opb 22:2

8 Un aun dän Enjel von de Jemeent en Smierna schriew: Dit sajcht de Ieeschta un de Latsta, dee, waut doot wia un es läwendich: Opb 1:11; 18 9 Ekj kjan diene Woakjen un Triebsaul un Oamoot, (oba du best rikj) un Ekj kjan de Lastrunk von dee, waut sajen, see sent Juden un sent nich, oba sent de Synagoge vom Soton. Jak 2:5; Opb 3:9 10 Fercht kjeent von de Dinja, dee du lieden woascht. Kjikj, de Diewel woat atelje von junt en daut Jefenkjnis schmieten, daut jie vesocht woaren, un jie woaren Triebsaul haben tieen Doag. Sie tru batem Doot, un Ekj woa die de Läwens-Kroon jäwen. Mat 10:19; 28; 2Tim 4:8; Opb 3:11 11 Wäa een Ua haft, lot am hieren, waut de Jeist to de Jemeenten sajcht. Wäa äwawint, woat nich beschädicht woaren von däm tweeden Doot. Opb 20:14

12 Un aun dän Enjel von de Jemeent en Pergamus schriew: Dit sajcht dee, waut daut schoape, tweeschniedje Schwieet haft: Heb 4:12 13 Ekj kjan diene Woakjen un wua du wonst, wua däm Soton sien Troon es; un du helst mienen Nomen faust un hast mienen Gloowen nich veloagen, uk en de Doag, wuarenn Antipas miene true Zeij wia, dee mank junt omjebrocht wort, wua de Soton wont. 14 Oba Ekj hab atelje Dinja jäajen die, wiels du hast doa dee, waut aun Bieleam siene Lia hoolen, dee dän Balak lieed, een Aunstoos ver de Kjinja Israel to schmieten, om Aufjetta-Jeopfadet to äten un Huararie to begonen. 4Mo 31:16; 2Pe 2:15; Jud 1:11 15 Aulsoo hast du uk dee, waut aun de Lia von de Nikolaiten hoolen, woont Ekj hot. 16 Doo Busse; wan oba nich, kom Ekj schwind no die un woa jäajen äant kjriejen met daut Schwieet von mien Mul. 17 Wäa een Ua haft, lot am hieren, waut de Jeist to de Jemeenten sajcht! Wäa äwawint, woa Ekj to äten jäwen von daut vestoakne Manna un woa am eenen witten Steen jäwen, un opp däm Steen eenen nieen Nomen jeschräwen, dän kjeena kjant, buta dee, dee dän kjricht. Ps 78:24,25; Jes 62:2

18 Un aun dän Enjel von de Jemeent en Tiatira schriew: Dit sajcht Gott sien Sän, wäms Uagen soo sent aus eene Fiaflaum un siene Feet soo aus blenkjajet Brons; Apj 16:14; Opb 1:14-15 19 Ekj kjan diene Woakjen un Leew un Deenst un Gloowen un diene Jedult un daut diene latste Woakjen mea sent aus de ieeschte. 20 Oba Ekj hab atelje Dinja jäajen die, wiels du dultst de Fru Isebel, dee sikj selfst eene Profeetin nant, om miene Deena to lieren un to veleiden, Huararie to begonen un Aufjetta-Jeopfadet to äten. 2Kje 9:22 21 Un Ekj jeef ar Tiet, Busse to doonen von äare Huararie, un see deed nich Busse. 22 Kjikj, Ekj schmiet ar en een Bad, un dee met ar de Ehe bräakjen, en groote Triebsaul, buta see doonen Busse fa äare Woakjen. 23 Un Ekj woa äare Kjinja dootmoaken met däm Doot, un aule Jemeenten sellen erkjanen, daut Ekj dee sie, dee doa de Nieren un Hoaten erforscht; un Ekj woa eenem jiedren von junt jäwen, no june Woakjen no. Ps 7:10; Jer 17:10 24 Oba to junt saj Ekj un to de äwaje en Tiatira, soo väle aus dise Lia nich haben un woone nich erkjant haben de deepe Dinja vom Soton, soo aus see sajen: Ekj laj opp junt kjeene aundre Laust. 25 Oba waut jie haben, daut hoolt faust, bat Ekj kom. Opb 3:11 26 Un wäa äwawint un miene Woakjen bat aum Enj helt, däm woa Ekj Macht jäwen äwa de Nazionen; 27 un hee saul dee rejieren met eene Iesa Stang; soo aus de Jefässa von een Leem-Strikja sellen dee to Bieta jebroaken woaren, soo aus Ekj von mienem Voda jekjräajen hab. Ps 2:8-9 28 Un Ekj woa am dän Morjenstiern jäwen. 29 Wäa een Ua haft, lot am hieren, waut de Jeist to de Jemeenten sajcht.