1 Un ekj sach, un kjikj, daut Laum opp däm Boajch Zion stonen, un met am hundat-vea-un-vieetich-dusent, dee dän Nomen von sien Voda* opp äare Stierns jeschräwen hauden. Opb 7:4; 3:12 2 Un ekj hieed eene Stemm vom Himmel, soo aus daut Ruzhen von väle Wotasch un soo aus de Stemm von grootet Donren. Un de Stemm, waut ekj hieed, wia soo aus von Hoapenspäla, dee opp äare Hoapen spälen. Opb 1:15 3 Un see sungen soo aus een nieet Leet ver däm Troon un ver de vea läwendje Tieren un de Eltestasch. Un kjeena kunn daut Leet lieren, buta de hundat-vea-un-vieetich-dusent, dee loosjekoft wieren von de Ieed. 4 Dise sent daut, dee nich met Frues ve-onreinicht wieren, wiels see junkfrulich sent. Dise sent dee, dee daut Laum nofoljen, wuaemma daut hanjeit. Dise wieren loosjekoft von mank de Menschen aus de ieeschte Frucht fa Gott un daut Laum. 1Kor 7:1,8 5 Un en dee äa Mul wia kjeen Faulschet jefungen; wiels dee sent onen Fäla ver Gott sien Troon.

6 Un ekj sach eenen aundren Enjel enne Medd Himmel flieejen, dee haud daut eewje Evangelium to vekjindjen to dee, waut opp Ieeden wonen, un to jieda Nazion un Staum un Tung un Volkj, 7 un säd met lude Stemm: Fercht Gott, un jäft Am de Iea, wiels de Stund von sien Jerecht es jekomen; un bät dän aun, dee dän Himmel un de Ieed un daut Mäa un de Wotakjwalen jemoakt haft. 8 Un een aundra Enjel foljd un säd: Babelon es jefollen, jefollen, de groote Staut, wiels see aule Velkja jedrenjt haft met däm Wien von de Wutt von äare Huararie. Opb 18:1-3; Jes 21:9; Jer 25:15-16; 51:7 9 Un de dredda Enjel foljd äant un säd met lude Stemm: Wan irjentwäa daut Tia un sien Bilt aunbät, un daut Moltieekjen aun siene Stiern ooda opp siene Haunt nemt, Opb 13:12-17 10 deeselwja saul von däm Wien von Gott siene Wutt drinkjen, dee onen jedempelt en sien Oajakuffel nenjegoten woat un woat ver de heilje Enjel un ver daut Laum met Fia un Schwäwel jekjwält woaren. Ps 75:9 11 Un de Ruak von äare Kwol jeit nopp fa emma un emma; un dee, waut daut Tia un sien Bilt aunbäden, haben kjeene Ru Dach un Nacht un wan irjentwäa daut Moltieekjen von sien Nomen aunnemt. 12 Hia es de Jedult von de Heilje; hia sent dee, waut Gott siene Jebooten hoolen un dän Gloowen von Jesus. 13 Un ekj hieed eene Stemm vom Himmel to mie sajen: Schriew: Seelich sent de Doodje, dee em Harn stoawen von nu aun. Jo, sajcht de Jeist, om daut see ruen von äare Oabeiten, wiels äare Woakjen foljen äant no. Jes 57:2; Flp 1:23; 1Tim 5:24-25; Heb 4:10

14 Un ekj sach, un kjikj, eene witte Wolkj; un opp de Wolkj eenen setten, soo aus de Menschensän; dee haud opp sienem Kopp eene goldne Kroon un en siene Haunt een schoapet Säakjel. Dan 7:13; Mrk 13:26 15 Un een aundra Enjel kjeem ut däm Tempel rut un roopt met lude Stemm to däm, dee opp de Wolkj saut: Schekj dien Säakjel un arnt; wiels de Stund es fa die jekomen to arnten, wiels de Arnt von de Ieed es riep. Joel 3:13; Mat 13:39 16 Un dee, waut opp de Wolkj saut, schluach sien Säakjel opp de Ieed, un de Ieed wort je-arnt. 17 Un een aundra Enjel kjeem ut däm Tempel, dee em Himmel es, dee haud uk een schoapet Säakjel. 18 Un een aundra Enjel kjeem ut däm Aultoa, dee haud Macht äwa daut Fia, un roopt un schrieech lud to däm, waut daut schoape Säakjel haud un säd: Schekj dien schoapet Säakjel rut, un saumel de Pungels von de Wienstud von de Ieed, wiels siene Wiendruwen sent riep. 19 Un de Enjel schluach sien Säakjel opp de Ieed un saumeld de Druwen von de Ieed un schmeet dee en de groote Wienpras von Gott siene Wutt. 20 Un de Wienpras wort buta de Staut utjeklunjt. Un daut Bloot rand ut de Prass rut, bat aun de Pieed äare Teem, dusent-sas-hundat Stadien* lank. Jes 63:3