1 Un no dise Dinja sach ekj vea Enjel opp de vea Akjen von de Ieed stonen, dee hilden de vea Wind von de Ieed, om daut kjeen Wint opp de Ieed pust uk nich oppet Mäa uk nich äwa irjent eenen Boom. Dan 7:2 2 Un ekj sach eenen aundren Enjel oppkomen vom Sonn-Oppgank, dee daut Säajel von däm läwendjen Gott haud, un dee schrieech met lude Stemm to de vea Enjel, to woone daut jejäft wia, de Ieed un daut Mäa to beschädjen, 3 un säd: Beschädicht nich de Ieed uk nich daut Mäa uk nich de Beem, bat wie de Kjnajchts von ons Gott aun äare Stierns vesäajelt haben. Hes 9:4,6; Opb 9:4 4 Un ekj hieed de Zol von de Vesäajelde: Hundat-vea-un-vieetich-dusent vesäajelt, von ut jieda Staum von de Kjinja Israel. Opb 14:1,3 5 Ut Juda sien Staum wieren twalw-dusent vesäajelt; ut Ruben sien Staum wieren twalw-dusent vesäajelt; ut Gad sien Staum wieren twalw-dusent vesäajelt; 6 ut Asser sien Staum wieren twalw-dusent vesäajelt; ut Naftali sien Staum wieren twalw-dusent vesäajelt; ut Manasse sien Staum wieren twalw-dusent vesäajelt; 7 ut Simeon sien Staum wieren twalw-dusent vesäajelt; ut Levi sien Staum wieren twalw-dusent vesäajelt; ut Isachar sien Staum wieren twalw-dusent vesäajelt; 8 ut Sebulon sien Staum wieren twalw-dusent vesäajelt; ut Josef sien Staum wieren twalw-dusent vesäajelt; ut Benjamin sien Staum wieren twalw-dusent vesäajelt.

9 No dise Dinja sach ekj, un kjikj, eene groote Volkjshäad, dee kjeena talen kunn, von ut aule Nazionen un Stam un Menschen un Tungen, un dee stunden ver däm Troon un ver daut Laum, aunjetrocken met witte Kjleeda un Paulmen en äare Henj. 10 Un dee roopten met lude Stemm un säden: De Radunk to onsem Gott, dee opp däm Troon sett, un to daut Laum. 11 Un aule Enjel stunden runtom däm Troon un de Eltestasch un de vea Tieren, un see follen ver dän Troon opp äare Aunjesechta un bäden Gott aun 12 un säden: Amen! Säajen un Harlichkjeit un Weisheit un Dank un Iea un Macht un Krauft to onsem Gott fa emma un emma! Amen. 13 Un eena von de Eltestasch auntwuad un säd to mie: Wäa sent dise, dee met witte Kjleeda aunjetrocken sent? un von wua kjeemen see? 14 Un ekj säd to am: Har, du weetst. Un hee säd to mie, dise sent et, dee ut groote Triebsaul komen un haben äare Kjleeda jewoschen un haben dee witt jemoakt en daut Bloot von daut Laum. Mat 24:21; Opb 12:11 15 Doawäajens sent see ver Gott sien Troon un deenen Am Dach un Nacht en sienem Tempel; un dee, waut opp däm Troon sett, woat mank äant wonen. 16 See woaren nich mea hungren, uk woaren see nich mea darschten, un de Sonn saul nich mea opp äant faulen uk nich irjent eene Hett; Jes 49:10 17 wiels daut Laum enne Medd von däm Troon woat äant weiden un äant leiden no de Kjwalen von läwendje Wotasch, un Gott woat jieda Tron aufweschen von äare Uagen. Ps 23:2; Jes 25:8; Opb 21:4