1 Un hee wees mie eenen reinen Riefa von Läwens-Wota, kloa aus Kristal, dee jinkj rut von Gott sien Troon un von daut Laum. Hes 47:1,12; Sach 14:8; 1Mo 2:9-10 2 En dee Medd von äare Gaus un aun jiedat Sied Riefa, wia de Läwens-Boom, dee twalw Sorten Frucht drajcht un brinjt jieda Moonat siene Frucht; un de Bläda von däm Boom sent fa de Nazionen äare Heelunk. 3 Un doa woat kjeen Fluch mea sennen; un de Troon von Gott un von daut Laum woat en ar sennen; un siene Kjnajchts woaren Am deenen. Jos 7:11-13 4 Un dee woaren sien Aunjesecht seenen; un sien Nomen woat aun äare Stierns sennen. Opb 3:12 5 Un doa woat kjeene Nacht sennen, un dee haben kjeen Bederfnis fa eene Laump uk nich Licht von de Sonn; wiels de Har Gott beschient äant, un see woaren rejieren von Eewichkjeit to Eewichkjeit.

6 Un hee säd to mie: Dise Wieed sent tru un woarhauftich, un de heilje Profeeten äa Gott un Har, haft sienen Enjel jeschekjt, siene Deena to wiesen, waut em Korten passieren mott. Opb 1:1 7 Kjikj, Ekj kom schwind. Seelich es dee, waut de Wieed von de Profezeiunk von dit Buak helt. 8 Un ekj, Johanes, sach un hieed dise Dinja. Un aus ekj jehieet un jeseenen haud, foll ekj ver däm Enjel siene Feet, om dän aun to bäden, dee mie dise Dinja jewäsen haud. 9 Un hee sajcht to mie: See doano, doo daut nich! Wiels ekj sie dien Metkjnajcht un von diene Breeda, de Profeeten, un von dee, waut de Wieed von dit Buak hoolen. Bäd Gott aun. 10 Un hee sajcht to mie: Vesäajel nich de Wieed von de Profezeiunk von dit Buak; wiels de Tiet es dichtbie. Opb 1:3; 10:4 11 Wäa ojjerajcht es, däm lot wiedahan ojjerajcht sennen, un wäa onrein es, däm lot wiedahan onrein sennen; un wäa jerajcht es, saul wiedahan jerajcht sennen, un wäa heilich es, saul wiedahan heilich sennen. Dan 12:10 12 Un kjikj, Ekj kom schwind un mien Loon met Mie, eenem jiedren to jäwen, doano aus sien Woakj sennen woat. 13 Ekj sie daut Alfa un daut Omega, de Aunfank un daut Enj, de Ieeschta un de Latsta. Heb 13:8; Opb 1:8 14 Seelich sent dee, waut siene Jebooten doonen, om daut see een Rajcht haben aun däm Läwens-Boom un derch de Puaten nengonen en de Staut. Opb 7:14 15 Oba buten sent de Hunj un de Zaubra un de Huara un de Merda un de Jettadeena un een jiedra, dee de Lieej leeft un deit. 1Kor 6:9-10; Opb 21:8,27

16 Ekj, Jesus, hab mienen Enjel jeschekjt, junt dise Dinja en de Jemeenten to bezeijen. Ekj sie de Wartel un Staum von David, de jlenzenda Morjenstiern. Jes 11:1,10; Luk 1:78 17 Un de Jeist un de Brut sajen: Komm! Un wäa daut hieet, lot sajen: Komm! Un wäm darscht, komm; un wäaemma well, näm daut Läwens-Wota emsonst. Jes 55:1; Joh 7:37 18 Wiels Ekj bezeij to eenem jiedren, dee de Wieed von de Profezeiunk von dit Buak hieet: Wan irjentwäa bie dise Dinja waut biedeit, däm woat Gott dise Ploagen, waut en dit Buak jeschräwen sent, biedoonen. 5Mo 4:2 19 Un wan irjentwäa von de Wieed von daut Buak von dise Profezeiunk wajchnemt, däm woat Gott sien Poat ut daut Läwens-Buak* wajchnämen un von ut de heilje Staut un von de Dinja, waut en dit Buak jeschräwen sent.

20 Dee dise Dinja bezeicht, sajcht: Jo, Ekj kom schwind. Amen; jo, komm, Har Jesus! 1Kor 16:22 21 De Jnod von ons Har Jesus Christus sie met junt aula! Amen.