1 Un ekj sach eenen nieen Himmel un eene niee Ieed; wiels de ieeschta Himmel un de ieeschte Ieed sent vegonen, un daut Mäa es nich mea. Jes 65:17; 2Pe 3:13 2 Un ekj, Johanes, sach de heilje Staut, daut niee Jerusalem, von Gott ut däm Himmel raufkomen, reedjemoakt aus eene Brut, utjestraumt fa äaren Maun. Gal 4:26; Heb 12:22; Opb 19:7-8 3 Un ekj hieed eene groote Stemm vom Himmel sajen: Kjikj, Gott siene Woninj es met de Menschen! Un Hee woat met äant wonen, un see woaren sien Volkj sennen, un Gott selfst met äant, woat äa Gott sennen. 2Mo 29:45; Jer 7:23 4 Un Gott woat aule Tronen von äare Uagen aufweschen, un de Doot woat nich mea sennen, uk nich Trua uk nich Hielen uk nich Weedoag woat mea sennen; wiels de väaje Dinja sent vegonen. Jes 25:8; 35:10; 65:19; Opb 7:17

5 Un dee, waut opp däm Troon sett, säd: Kjikj, ekj moak aules nie. Un Hee sajcht to mie: Schriew: Wiels dise Wieed sent woarhauftich un tru. 6 Un Hee säd to mie: Daut es jeworden. Ekj sie daut Alfa un daut Omega, de Aunfank un daut Enj. Ekj woa däm Darschtjen Wota jäwen von de Läwens-Kjwal emsonst. Opb 1:8; 22:13 7 Wäa äwakjemt, saul daut aules oawen, un Ekj woa sien Gott sennen, un hee woat mien Sän sennen. 8 De Forchtsome un Onjleewje un Oppscheiselje un Merda un Huara un Zaubra un Jettadeena un aule Läajna, woaren äa Deel haben en däm See, dee doa brent met Fia un Schwäwelblitt; woont es de tweeda Doot.

9 Un eena von de säwen Enjel, woona de säwen Kommen haud, voll von de säwen latste Ploagen, kjeem no mie un räd met mie un säd: Komm häa, ekj woa die de Brut wiesen, daut Laum siene Fru. Opb 15:1,6-7; 19:7 10 Un hee druach mie em Jeist wajch opp eenen grooten huagen Boajch un wees mie de groote Staut, daut heilje Jerusalem, raufkomen ut däm Himmel von Gott; 11 dee haud Gott siene Harlichkjeit. Un äa Licht wia soo aus däm aula-ajchtsten Steen, soo aus een kristalkloara Jaspies. 12 Un see haud eene groote uk huage Waunt un haud twalw Puaten un bie de Puaten twalw Enjel un Nomes doaraun jeschräwen, woone de twalw Stam von de Kjinja Israel sent. Hes 48:31-35 13 Nom Oosten dree Puaten, nom Nuaden dree Puaten, nom Sieden dree Puaten un nom Wasten dree Puaten. 14 Un de Waunt von de Staut haud twalw Gruntsteena un doaraun de Nomes von daut Laum siene twalw Apostel.

15 Un dee met mie räd, haud een goldnet Mot-Rua, de Staut to mäten un äare Puaten un äare Waunt. Hes 40:3 16 Un de Staut licht veakauntich un äare Lenjd es soo väl aus uk de Breed. Un hee maut de Staut met daut Rua, twalw-dusent Stadien; de Lenjd un Breed un Hecht doavon sent äwareen. 17 Un hee maut äare Waunt, hundat-vea-un-vieetich Ellen, no eenem Mensch siene Mot, daut es von däm Enjel.

18 Un de Waunt äa Jebu wia von Jaspies, un de Staut wia von ajchtet Golt, soo aus kloaret Glaus. Jes 54:11-12 19 Un de Gruntsteena von de Staut äare Waunt wieren utjestraumt met aule Sorten diere Steena. De ieeschta Gruntsteen wia een Jaspies, de tweeda een Safier, de dredda een Chalzedon, de vieeda een Smaracht, 20 de fefta een Sardoniks, de sasta een Sarder, de säwenda een Chriesolit, de achta een Beril, de näajenda een Topas, de tieenda een Chriesopras, de alwda een Hiazint, de twalwda een Ametist. 21 Un de twalw Puaten wieren twalw Parlen un jieda Puat ut eene Parl. Un de Staut äare Gaus, von ajchtet Golt, soo aus derchsechtjet Glaus.

22 Un ekj sach kjeenen Tempel doabennen, wiels de Har, Gott, de Aulmajchtja, un daut Laum, sent äa Tempel. 23 Un de Staut haud kjeen Bederfnis fa de Sonn uk nich de Mon, om en ar to schienen; wiels Gott siene Harlichkjeit dacht en ar, un daut Laum es äa Licht. Jes 60:3,5,11,19-20 24 Un de Nazionen, de jerat sent, waundlen en äa Licht, un de Kjennichs von de Ieed brinjen äare Harlichkjeit un Iea doanenn. 25 Un äare Puaten woaren bie Dach nich toojeschloten, wiels Nacht woat doa nich sennen. Sach 14:7 26 Un dee woaren de Harlichkjeit un de Iea von de Nazionen doanenn brinjen. 27 Un kjeen Jemeenet saul doa nenkomen ooda waut een Jreiel ooda eene Lieej deit, oba dee, waut en daut Laum sien Läwens-Buak jeschräwen sent.