1 Un de fefta Enjel blosd: Un ekj sach eenen Stiern, jefollen vom Himmel no de Ieed, un am wort dän Schlätel jejäft to däm gruntloosen Borm. 2 Un hee muak dän gruntloosen Borm op; un doa jinkj een Ruak nopp von ut däm Borm, soo aus de Ruak von een groota Owen, un de Sonn un de Loft worden vedunkelt wäajens dän Ruak von däm Borm. Joel 2:2,10 3 Un ut däm Ruak kjeemen Heischrakjen oppe Ieed, un dee wort Macht jejäft, soo aus de Skorpionen von de Ieed Macht haben. 2Mo 10:12-15 4 Un äant wort daut jesajcht, daut see nich daut Graus von de Ieed beschädjen sullen uk nich irjent Jreenet uk nich irjent eenen Boom, oba bloos de Menschen, woone daut Säajel von Gott nich opp äare Stierns haben. Opb 7:3 5 Un äant wort daut jejäft, daut see dee nich dootmuaken sullen oba äant fief Moonat kjwälen sullen; un äa Jekjwäl wia soo aus daut Jekjwäl von eene Skorpion, wan dee eenen Mensch schleit. 6 Un en dee Doag woaren de Menschen dän Doot sieekjen un dän nich finjen, un woaren velangen to stoawen, un de Doot woat von äant wajchranen. Opb 6:16; Hos 10:8 7 Un de Form von de Heischrakjen wia soo aus Pieed, reedjemoakt toom Kjrich; un opp äare Kjap soo aus Kroonen, biejlikj soo aus Golt un äare Jesechta soo aus Menschen-Jesechta; Joel 2:4; Nah 3:17 8 un dee hauden Hoa, soo aus Frues-Hoa, un äare Tänen wieren soo aus dee vonne Leiws. 9 Un dee hauden Brostschilda, soo aus iesane Brostschilda, un daut Jelud von äare Flichten soo aus daut Jelud von Woages met väle Pieed, dee nom Kjrich ranen; 10 un dee hauden Zäajel, soo aus Skorpionen, un doa wieren Stachels en äare Zäajel, un äare Macht wia, de Menschen fief Moonat to beschädjen. 11 Un dee haben äwa sikj eenen Kjennich, dän Enjel von däm Aufgrunt; sien Nomen opp hebräisch es Abadon, un opp griechisch haft hee dän Nomen Apollion. 12 Een Wee es vebie; kjikj, doa komen noch twee Weeen nohäa.

13 Un de sasta Enjel blosd: Un ekj hieed eene Stemm von ut de vea Hieena aun däm goldnen Aultoa, dee ver Gott es; 2Mo 30:1-3; Opb 8:3 14 dee säd to däm sasten Enjel, dee de Trompeet haud: Lees de vea Enjel, dee em grooten Eufrat Riefa jebungen sent. Opb 16:12 15 Un de vea Enjel worden loos-jemoakt, dee reed-jemoakt wieren fa eene Stund un Dach un Moonat un Joa, een Dreddel von de Menschen doot to moaken. Opb 8:7-12 16 Un de Zol von de Armee von Ritta wia tweemol tieen-dusent mol tieen-dusent; ekj hieed de Zol doavon. 17 Un soo sach ekj de Pieed en de Vision: Dee, waut doabowen sauten, hauden fieeje un bleiwelje* un schwäwelje Brostschilda, un de Pieed hauden Kjap aus Leiws-Kjap, un ut äare Miela jinkj Fia, Ruak un Schwäwelblitt. 18 Von dise dree wort een Dreddel von de Menschen dootjemoakt, von daut Fia un von däm Ruak un von daut Schwäwelblitt, daut ut äare Miela jinkj. 19 Wiels äare Macht es en äa Mul un en äare Zäajel; wiels äare Zäajel sent soo aus Schlangen un haben Kjap, un met dise beschädjen see. 20 Un de äwaje Menschen, dee nich dootjemoakt wieren von dise Ploagen, deeden nich Busse fa de Woakjen von äare Henj, om nich de Diewels un de goldne un selwane un bronsne un steenane un heltane Aufjetta aun to bäden, woone nich seenen uk nich hieren uk nich gonen kjennen. Opb 16:9; Ps 115:4 21 Un see deeden uk nich Busse fa äa Morden uk nich fa äare Zaubarie uk nich fa äare Huararie uk nich fa äare Stälarie.