1 Un eent von de säwen Enjel, waut de säwen Kommen haud, kjeem un räd met mie un säd to mie: Komm häa; ekj woa die daut Uadeel jäajen de groote Hua wiesen, dee opp väle Wotasch sett, Jer 51:7 2 met woone de Kjennichs von de Ieed jehuat haben; un dee opp Ieeden wonen, sent bedrunken worden met däm Wien von äare Huararie. 3 Un hee druach mie em Jeist enne Wiltnis nenn; un ekj sach eene Fru opp een schoarlach-kalieejet Tia setten, voll von Lasta-Nomes, un daut haud säwen Kjap un tieen Hieena. 4 Un de Fru wia aunjetrocken en Purpur un Schoarlach un äwalajcht met Golt un diere Steena un Parlen; un en äare Haunt haud see een goldnet Kuffel, voll Jreiel un Onreinichkjeit von äare Huararie; 5 un opp äare Stiern eenen Nomen jeschräwen: Jeheemnis, Babelon de Groote, de Mutta von Huaren un Jreiels opp Ieeden. 6 Un ekj sach de Fru bedrunken met de Heilje äa Bloot un met daut Bloot von Jesus siene Zeijen. Un aus ekj ar sach, vewundad ekj mie met groote Vewundrunk. Opb 18:24

7 Un de Enjel säd to mie: Wuarom vewundascht du die? Ekj woa die daut Jeheemnis von de Fru sajen un von daut Tia, waut ar drajcht, woont de säwen Kjap un tieen Hieena haft. 8 Daut Tia, daut du sachst, wia un es nich un woat ut däm Aufgrunt rutkomen un enne Vedaumnis gonen; un dee opp Ieeden wonen, woaren sikj vewundren, wäms Nomes nich en daut Läwens-Buak jeschräwen sent von de Welt-Gruntlajunk aun, wan see daut Tia seenen, woont doa wia un nich es un doch es. 9 Hia es de Senn, dee de Weisheit haft: De säwen Kjap sent säwen Boaj, opp woone de Fru sett. Opb 13:18 10 Un doa sent säwen Kjennichs: Fief sent jefollen un eena es, un de aundra es noch nich jekomen, un wan hee kjemt, mott hee een kjlienet Stootje bliewen. 11 Un daut Tia, daut doa wia un nich es, hee es uk de achta un es von de säwen un jeit en daut Vedoawen. 12 Un de tieen Hieena, dee du sachst, sent tieen Kjennichs, woone noch kjeen Kjennichrikj jekjräajen haben, oba kjrieen Macht aus Kjennichs fa eene Stund met daut Tia. Opb 13:1 13 Dise haben eenen Senn un woaren äare Macht un Krauft no daut Tia jäwen. 14 Dise woaren met daut Laum kjriejen, un daut Laum woat äant jewennen; wiels Hee es Har von Haren un Kjennich von Kjennichs, un dee met Am, sent Beroopne un Uterwälde un True. Opb 9:14,16 15 Un hee sajcht to mie: De Wotasch, dee du sachst, wua de Hua sett, sent Menschen un Volkjs-Häaden un Nazionen un Tungen. Jes 8:7; Jer 47:2 16 Un de tieen Hieena, dee du opp daut Tia sachst, dise woaren de Hua haussen un äa veloten un noaktich moaken un äa Fleesch äten un äa met Fia vebrennen. 17 Wiels Gott haft daut en äare Hoaten jejäft, sienen Senn to doonen un en eenem Senn to doonen un äa Kjennichrikj daut Tia to jäwen, bat Gott siene Wieed erfelt sent. 18 Un de Fru, dee du sachst, es de groote Staut, woone de Harschoft haft äwa de Kjennichs von de Ieed.