1 Un aus et daut säwende Säajel opmuak, wort doa een Stell-Schwieejen em Himmel, onjefäa eene haulwe Stund. Hab 2:20 2 Un ekj sach de säwen Enjel, woone ver Gott stunden, un dee wort säwen Trompeeten jejäft. Mat 24:31 3 Un een aundra Enjel kjeem un stunt ver däm Aultoa, un dee haud een goldnet Ruakfaut; un am wort väl Parfum jejäft, daut hee daut sull opfren met aul de Heilje äare Jebäda opp däm goldnen Aultoa, dee doa ver däm Troon es. 4 Un daut Ruak von daut Parfum jinkj nopp met de Heilje äare Jebäda, ut däm Enjel siene Haunt ver Gott. 5 Un de Enjel naum daut Ruakfaut un feld daut met Fia vom Aultoa un schmeet daut opp de Ieed; un doa wieren Stemmen un Donnasch un Blitzen un een Ieedbäben. Hes 10:2

6 Un de säwen Enjel, dee de säwen Trompeeten hauden, muaken sikj reed toom blosen. 7 Un de ieeschta Enjel blosd: Un doa kjeem Hoagel un Fia, met Bloot jemischt, un daut wort opp de Ieed jeschmäten, un daut dredde Poat vonne Beem vebrend un aulet jreene Graus vebrend. 2Mo 9:23-26

8 Un de tweeda Enjel blosd: Un soo aus een groota Boajch, dee doa met Fia brend, wort en daut Mäa jeschmäten; un daut dredde Poat vom Mäa wort Bloot. 2Mo 7:20-21 9 Un een Dreddel von de Kjreaturen, dee Läwen hauden em Mäa, jinjen doot, un een Dreddel von de Schäp worden venicht.

10 Un de dredda Enjel blosd: Un doa foll een groota Stiern vom Himmel, dee brend soo aus eene Laump, un dee foll opp een Dreddel von de Wotastreem un opp een Dreddel von de Wotakjwalen. Jes 14:12 11 Un de Nomen von däm Stiern heet Wermut; un daut dredde Poat von de Wotasch worden Wermut, un väle von de Menschen storwen von de Wotasch, wäajens dee wieren betta-jemoakt.

12 Un de vieeda Enjel blosd: Un een Dreddel von de Sonn wort jeschloagen, un een Dreddel von de Mon un een Dreddel von de Stierns, om daut een Dreddel von deeselwje vedunkelt wort, un de Dach scheen nich fa een Dreddel doavon un de Nacht krakjt soo. 2Mo 10:21; Opb 6:12

13 Un ekj sach un hieed eenen Enjel medden derch dän Himmel flieejen un säd met lude Stemm: Wee, wee, wee to dee, waut opp de Ieed wonen, wäajens de äwaje Stemmen von de Trompeeten von de dree Enjel, dee noch schaulen sellen.