1 No dise Dinja sach ekj, un kjikj, eene Däa wort opjemoakt em Himmel, un de ieeschte Stemm, dee ekj hieed, wia soo aus eene Trompeet, dee met mie räd un säd: Komm hia nopp, un ekj woa die wiesen, waut no dise Dinja passieren mott. Opb 1:10 2 Un fuaz wia ekj em Jeist; un kjikj, een Troon stunt em Himmel, un opp däm Troon saut eena. Ps 47:9; Jes 6:1; Hes 1:26-28 3 Un dee doa saut, wia aun to seenen soo aus een Jaspies un Sarder Steen, un doa wia een Räajenboagen runtom dän Troon, von Aunseenen soo aus een Smaracht. 4 Un runtom dän Troon wieren vea-un-twintich Troonen, un ekj sach vea-un-twintich Eltestasch opp de Troonen setten, aunjetrocken met witte Kjleeda, un see hauden goldne Kroonen opp äare Kjap. 5 Un ut däm Troon jinjen Blitzen, Donna un Stemmen; un säwen Fia-Laumpen brenden ver däm Troon, woone de säwen Jeista von Gott sent. 2Mo 19:16; Opb 1:4 6 Un ver dän Troon wia een glausnet Mäa, eenem Kristal jlikj; un enne Medd von däm Troon un runtom dän Troon wieren vea Tieren, voll Uagen väaren un hinjen. Hes 1:5,10,22 7 Un daut ieeschte Tia wia soo aus een Leiw, un daut tweede Tia soo aus een Kaulf, un daut dredde Tia haud een Jesecht soo aus een Mensch, un daut vieede Tia wia eenem flieejenden Odla jlikj. Hes 10:14 8 Un de vea Tieren hauden, een jiedra von dee sas Flichten, runtom un von bennen voll Uagen, un dee hauden kjeene Ru Dach un Nacht un säden: Heilich, heilich, heilich, Har, Gott, Aulmajchtja, dee doa wia un dee doa es un dee doa kjemt! 2Mo 3:14; Jes 6:2-3 9 Un wanemma de Tieren Harlichkjeit un Iea un Dank jäwen to däm, dee doa opp däm Troon sett, dee doa läft von Eewichkjeit to Eewichkjeit, 10 faulen dee vea-un-twintich Eltestasch dol ver däm, dee doa opp däm Troon sett, un bäden dän aun, dee doa fa emma un emma läft, un schmieten äare Kroonen ver dän Troon un sajen: 11 Du best wirdich, Oo Har, de Harlichkjeit un Iea un Krauft to nämen; wiels Du hast aules erschaufen un wäajen dienen Wellen sent dee un worden erschaufen.