25 एल्हेरेलेइ अवं तुसन सेइं ज़ोताईं, कि तुस अपने ज़िन्दगरी ज़रूरतां केरे लेई फिक्र न केरा, कि तुस कुन खाले या कुन पीले, ते न अपने जानरी कि कुन लामेले। कुन प्राण रोट्टी करां ते जान लिगड़े करां बेद्धतां नईं!"

34 एल्हेरेलेइ कालेरे बारे मां फिक्र न केरथ, किजोकि कालेरी दिहाड़ी अपने लेई एप्पू फिक्र आनेली। अज़्ज़ेरे लेई अज़्ज़ेरो दुख सुद्धोए।"

22 होरे किछ लोक ज़ैना परमेशरेरी गल्‍लां शुन्तन, तैना तैस कंटां केरे झ़ैल्‍लां केरे ज़मीनेरे ज़ेरे आन। पन दुनियारो फिक्र ते दौलतरे वजाई सेइं धोखो खातन, ते तैना बेफल रेइ गाते।

1 एत्रे मां हज़ारेईं मैन्हु अकोट्ठे भोइ जे, ते एक्‍की होरि उन्ढे खिरकते थिये त यीशुए सेब्भन करां पेइले अपने चेलन खड़े भोइतां ज़ोवं, "फरीसी लोकां केरे पाखंड़रे खमीरे यानी तैन केरे रीति रूवाज़न करां हुशार रेइयथ। 2 कोई चीज़ ओड़कोरी नईं ज़ै बांदी न भोए, ते न कोई चीज़ छ़पोरीए ज़ै ज़ानी न गाए। 3 एल्हेरेलेइ ज़ैना गल्‍लां तुसेईं आंधरे मां ज़ोवरिन तैना गल्‍लां लौई मां शुनोनिन, ते ज़ैना गल्‍लां तुसेईं अन्तर ज़ोवरिन तैन केरू एलान लाए पुड़ भोनूए।

4 "दोस्तव अवं तुसन सेइं सच़ ज़ोताईं कि तैन करां न डेरथ ज़ैना जानी नुकसान पुज़ातन तैसेरे बाद तैना किछ न केरि बटन। 5 पन अवं तुसन सेइं सच़ ज़ोताईं कि केस करां डर्रू लोड़ते, ज़ैस जानी मारनेरे बाद तैसेरी आत्माई नरके मां छ़डनेरो अधिकारे, हाँ अवं तुसन सेइं सच़ ज़ोताईं कि तैस करां डरा। 6 कुन दूई पेंइसन मां पंच़ च़ुड़ोली न बिकन? पन परमेशर तैन मरां केन्ची भी न बिसरे। 7 बल्के तुश्शे दोग्गेरे सारे बाल गनोरेन डरा नन्ना तुस त काई च़ुड़ोलन करां भी जादे कीमती आथ।

8 "अवं तुसन ज़ोताईं कि ज़ै कोई मैन्हु केरे सामने मेरो इकरार केरेलो, त अवं मैन्हेरू मट्ठू भी परमेशरेरे स्वर्गदूतां केरे सामने इकरार केरेलो 9 पन ज़ै मैन्हु केरे सामने मेरो इन्कार केरेलो त तैसेरो इन्कार परमेशरेरे स्वर्गदूतां केरे सामने कियो गालो।

10 "ज़ैना लोक मैन्हेरे मट्ठेरे खलाफ किछ ज़ोले तै तैस माफ़ केरेलो पन ज़ै पवित्र आत्मारी तुहीन केरेलो तैस माफ़ न केरेलो।

11 "ज़ैखन तैना तुसन प्राथना घरन मां ते बड़े-बड़े ते अधिकैरन कां नेले त फिक्र न केरथ कि अस कुन ज़ोम ते केन्च़रे जुवाब देम। 12 किजोकि पवित्र आत्मा तुसन तैस वक्ते ज़ोलो कि तुसेईं कुन ज़ोनूए।"

13 फिरी भीड़ी मरां केन्चे एक्‍के यीशु सेइं ज़ोवं, "हे गुरू जी मेरे ढ्लाए जो ज़ो, कि इश्शे बाजी केरि जाईदाती मरां मेरो हिस्सो मेरे हवाले केरे।" 14 यीशुए तैस जुवाब दित्तो, "अवं केनि तुश्शो हाकिम या बन्टने बालो बनेवरोइं?" 15 ते यीशुए तैन सेइं ज़ोवं, "हर किसमेरे लालच़े करां दूर भोइयथ ते न केन्चेरी जेइदात केन्चेरी जानी करां जादे भोए।" 16 तैखन यीशुए तैन अक मिसाल शुनाई, "केन्ची अमीरेरे ज़मीनी मां बड़ी फसल बनी। 17 तै अपने दिले मां सोचतां ज़ोने लगो, कि अवं कुन केरि, मीं कां ठारे नईं कि ज़ैड़ी अवं अन्न रेखी सेखी? 18 तैखन तैनी ज़ोवं कि, ‘अवं अक कम केरताईं, अपने पुराने कोठार पुटतां होरे बड्डे कोठार बनेइ ते अपनु सारू अन्न तैस मां रखेलो। 19 फिरी मीं अपने आपे सेइं ज़ोनूए कि, मीं कां त बड़े सालन तगर अन्न जम्हां भोवरूए, मेरी जान आरामे सेइं खा ते एश केर।’ 20 पन परमेशरे तैस मैन्हु जो ज़ोवं, ‘हे बेवकूफ अज़्ज़े राती तू मरेलो, ते ज़ैन किछ तीं अपने लेई जम्हां केरतां रखेरूए तैन केसेरू भोल्हु?’ 21 एल्हेरेलेइ ज़ै अपने लेई दौलत जम्हां केरते, पन परमेशरेरी नज़री मां तै अमीर न भोए एसेरो भी एरो हाल भोनोए।"

22 तैखन यीशुए अपने चेलन सेइं ज़ोवं, एल्हेरेलेइ तुस न अपने ज़िन्दगरी ज़रूरतरे लेई फिक्र केरा, कि तुस कुन खाले, ते न अपने जानरी कि कुन लामेले। 23 किजोकि प्राण रोट्टी करां ते जान लिगड़े करां बेद्धतां भोते। 24 कंव्वां केरां तक्‍का, तैना न बेन ते न कट्टन ते न तैन कां गुदाम या कोठार भोन, तांभी परमेशर तैन खाने जो देते ते तुस त च़ुड़ोलन करां भी जादे कीमती आथ। 25 तुसन मां एरो कौन आहे, ज़ै फिक्र केरतां अपनि उमर अक घड़ी भी बधेईं सकते? 26 बस्सा, ज़ैखन तुस ऐह अक निकड़ी ज़ेरि गल भी न केरि बटथ, त बाकी बेड्डी चीज़ां केरि फिक्र किजो केरतथ? 27 सोसनेरे फूड़ू केरां तक्‍का कि तैना केन्च़रे बेडोतन? तैना न मेहनत केरन ते न कत्तन, फिरी भी अवं तुसन सेइं ज़ोताईं कि राज़ो सुलैमाने भी अपने सारे धन दौलतरे बावजूद भी तैन केरां ज़ेरां लिगड़ां न लां। 28 बस्सा ज़ैखन परमेशरे मैइदानेरो घास, ज़ै अज़ आहे ते कालां लौवंने मां फुकनोए, एरी खूबसूरती देते, त हे घट विश्वासे बाले लोकव, कुन तै तुसन लिगड़ न देलो? 29 ते एस फिक्रे मां न रेइयथ, कुन खामेले, या कुन पीमेले, या कुन लामेले, ते न शक केरथ। 30 किजोकि दुनियारी सैरी कौमां एस्से फिक्रे मां लेगोरी रेइचन, पन तुश्शो बाजी ज़ानते, कि तुसन कोनां-कोनां चीज़ां केरि ज़रूरते। 31 पेइले परमेशरेरे राज़्ज़ेरे तलाश केरा, फिरी तुसन एना सैरी चीज़ां मैल्ही गैली।

32 "तुस भैड्डां केरे निकड़े केन्नरे ज़ेरेथ, तुस कोन्ची गल्‍लरे लेई न डरा, किजोकि तुश्शे बाजेरी खुशी एस्से मां आहे, कि तै तुसन राज़ दे। 33 अपनु घरबार बेच़तां धर्मरथ देथ, ते एप्पू जो अक बेटवो बनाथ, ज़ै पुरानो न भोए, सुर्गे मां दौलत जम्हां केरा ज़ै कधे न मुक्‍के, ज़ैड़ी न च़ोर पुज़्ज़े ते न कीड़ो खाए। 34 किजोकि ज़ैड़ी तेरी दौलत भोल्ही, तैड़ी तेरो दिल भी लग्गेलो।

35 "सेवा केरनेरे लेई रोड़ेच़ारे कमर बेंद्धतां तियार भोथ, ते तुश्शे दीये सैरी राती बलते रान। 36 तुस मेरे एजनेरे लेई एन्च़रे तियार राथ, ज़ेन्च़रे मैन्हु केरे अपने मालिके, ज़ै ड्लाहेरे धामी मरां वापस एजने बलगतन, कि ज़ैखन तै एज्जे ते दार गुड़कान त अस दार खोल्‍लम। 37 तैना नौकर धन आन ज़ैना अपने मालिकेरे वापस एजने पुड़ बींझ़े मैलतन, अवं तुसन सेइं सच़ ज़ोताईं, कि तै एप्पू तैन रोड़ेच़ारे नौकरन लिगड़ां लेइतां तियार लाएलो, ते मालिक तैन सेइं खुश भोइतां एप्पू सेइं साथी रोट्टी खाने बिशालेलो ते तैन केरि सेवा केरेलो। 38 अगर मालिक एध्धी राती या झ़ेझ़ेरेपार एइतां अपने नौकरन बींझ़े लाहे त तैन नौकरां केरे लेई केत्री धने गल्‍ले। 39 पन याद रखा, अगर घरेरे मालिके, च़ोर एजनेरो पतो भोए त तै बींझ़ो राथो ते अपने घरे च़ोरी न देथो भोने। 40 बस्सा, तुस भी मेरे वापस एजनेरे लेई तियार राथ, मैन्हेरू मट्ठू यानी अवं तैस वक्ते एज्जेलो ज़ेइस तुसन खियाल भी न भोल्हो।"

41 पतरसे पुछ़ू, "हे प्रभु ज़ै मिसाल तीं शुनाई तै सिर्फ इश्शे लेइए या सेब्भी केरे लेइए?" 42 प्रभुए ज़ोवं, "कौने ईमानदार अक्लमन्द नौकर ज़ेसेरो मालिक तैस अपने नौकरन पुड़ मुन्शी रख्खे ताके तैन केरि खूराक ठीक मौके पुड़ रोड़ेच़ारे बन्टतो राए? 43 तै नौकर धने कि ज़ेसेरो मालिक एज्जे ते मालिक तैस रोड़ेच़ारे कम केरतू लाहे। 44 अवं तुसन सेइं सच़ ज़ोताईं कि तै अपने सारे घरबारेरी हेर गेशारे अधिकार तैसेरे सुपुर्द केरेलो। 45 पन अगर तै नौकर अपने दिले मां ज़ोए कि मेरे मालिके एजने हेजू बड़ू च़िरे ते होरि नौकरन ते नौकरेनन मार धाड़ केरनि शुरू केरे ते खेइ पीतां नशे मां मसत भोइ गाए। 46 ते तैस नौकरेरो मालिक केन्ची एरे दिहाड़े एज्जे ज़ेइस तैस नौकरे एजनेरो पतो न भोए ते तै मालिक एज्जी गाए त तैस नौकरेरे टुक्ड़े-टुक्ड़े केरतां ते तैसेरी हालत बेइमाना केरि ज़ेरि भोल्ही। 47 हर तै नौकर ज़ै ज़ानते कि तैसेरे मालिकेरी कुन मर्ज़ी आहे, कि तै कुन केरे, पन तै अपने आपे कम केरनेरे लेई तियार न केरे ते अपने मालिकेरी मर्ज़ी पूरी न केरे तैस पक्‍की मार बज़नीए। 48 पन अगर कोई नौकरे ज़ैस नईं पतो कि मेरे मालिकेरी कुन मर्ज़ी, कि अवं कुन केरि, ते तैन केरे ज़ैस सेइं तैस सज़ाह मैल्हे, त तैस घट सज़ाह मैल्हेली।"

49 यीशुए ज़ोवं, "अवं धेरती पुड़ अग लांने एवरोईं ते अगर अग लग्गोरी भोथी त रोड़ू थियूं। 50 पन मीं बड़े जल्दी दुख झ़ैल्‍लनोए, ते अवं बड़ो परेशान आईं ज़ांतगर दुख न झ़ेल्‍ली। 51 कुन तुस एन सोचतथ कि अवं धेरती पुड़ मेल कराने लेई एवरोईं? नईं! अवं तुसन सेइं ज़ोताईं, कि अलग केरने एवरोईं। 52 अज़्ज़ेरे बाद अगर एक्‍की घरे मां पंच़ मैन्हु भोल्हे त तैना एप्पू मांमेइं बेन्टोले, ट्लाई ज़ैना मीं पुड़ विश्वास न केरन तैना दूईयां केरे खलाफ भोल्हे, ते दूई, ट्लेइयां केरे खलाफ भोल्हे। 53 बाजी मट्ठेरे खलाफ भोल्हो ते मट्ठू बाजेरे खलाफ भोल्हु, हैई कुइयरे खलाफ ते कुई हैईयरे खलाफ ते शिख नुशरे ते नुश शिखरे खलाफ भोनीए।"

54 फिरी यीशुए बड़े मैन्हन मां ज़ोवं, "कि ज़ैखन तुस बिदलार डुबते पासेरां च़लती लातथ त तुस ज़ोतथ कि झ़ड़ी एजने बालीए ते तैन्ने भोते। 55 ते दक्षिणेरे पासेरां हवा च़ली त तुस ज़ोतथ गर्मी भोरीए ते तैन्ने भोते। 56 हे पाखंडी लोकव, तुस धरती ते अम्बरेरो हाल हेरतां मौसमेरो अंदाज़ो केरनो ज़ानतथ, पन इन न ज़ैनी बटथ कि, परमेशर कुन चाते?

57 "तुस एप्पू फैसलो केरा कि, तुश्शे लेई कुन रोड़ूए। 58 ज़ैखन तू लीडरे सेइं साथी हाकिमे कां गाथ त बत्ते मां तैस सेइं फैसलो की न केरस, एरू न भोए तै तीं हाकिमे कां ने ते हाकिम सिपाहीएरे हवाले केरे, ते तू कैद भोइ गास। 59 अवं तुसन सेइं ज़ोताईं कि ज़ांतगर तू पाई-पाई न देले त तांतगर तैट्ठां छुट्टी न सकेलो।"

6 कोन्ची भी गल्‍लरी फिक्र न केरा, पन हर एक्‍की गल्‍ली मां तुश्शी दरखुवास, प्राथना बिनती सेइं शुक्रे साथी परमेशरे कां हाज़र भोन। 7 तैखन परमेशरेरी शान्ति, ज़ै समझ़ी करां बिलकुल बेइरे, तुश्शे दिलन ते तुश्शे खियालन मसीह यीशु मां बिलकुल मैफूज़ रखेली।

7 परमेशरे अपने परेशैनी ते फिकरां केरे बारे मां ज़ोथ, किजोकि तैस तुश्शू ध्याने।

22 अपनो बोझ यहोवा पुड़ छ़ड तै तीं सम्भालेलो;

तै धेर्मी कधे हिलने न देलो।✝

25 परेशान मन दब्बो गाते,

पन रोड़ी गल्‍ली सेइं तै खुश भोते।

19 ज़ैखन मेरे मने मां बड़ी फिक्र भोतीए,

तैखन हे यहोवा, तेरी दित्तोरी शैन्ति सेइं मीं सुख भोते।

9 हे प्रभु मेरी सारी खुवैइश तेरे सामने,

ते मेरू करलानू तीं करां छ़पोरे नईं।

27 अवं तुसन शान्ति देइतां ज़ै मीं कां आहे, ज़ेन्च़रे दुनिया देचे तेन्च़रे नईं, तुश्शो दिल उदास न भोए ते न डेरथ।

1 "तुश्शो दिल उदास न भोए, तुस परमेशरे पुड़ विश्वास केरतथ, मीं पुड़ भी विश्वास केरा।

10 डर न, किजोकि अवं तीं सेइं साथी आईं, इरां उरां न तक, किजोकि अवं तेरो परमेशर आईं, अवं तीं मज़बूत केरेलो ते तेरी मद्दत केरेलो, ते अपने धर्मी देइने हथ्थे सेइं तीं सुमैलतां रखेलो।

11 ज़ैखन लोक तुसन नेइतां आदालतां केरे हवाले केरले, त पेइले फिक्र न केरथ त न सोचथ कि अस कुन ज़ोमेले, पन ज़ैन किछ परमेशर तुसन तैस घड़ी ज़ोनेरे लेई ज़ोवं गालू, तैन्ने ज़ोइयथ। किजोकि ज़ोनेबाले तुस नईं, पन पवित्र आत्मा तुश्शे ज़िरिये ज़ोलो।

8 परमेशर ज़ैन किछ तुसन ज़रूरते तैसेरो अनुग्रह देइ बटते, ज़ैस सेइं हर गल्‍ली मां ते हर वक्त, सब किछ, ज़ेसेरी तुसन ज़रूरत भोए, तुसन कां राए, ते हर एक्‍की रोड़े कम्मेरे लेई तुसन कां बड़ू किछ भोए।

3 फिरी मीं परमेशरेरे तखते मरां कोई उच्‍ची आवाज़ी सेइं इन ज़ोते शुनो, "अज़ेरां बाद परमेशर मैन्हन सेइं साथी रालो, ते तैसेरू घर तैन लोकन मां भोल्हु, ते तैना तैसेरे लोक भोल्हे, ते परमेशर एप्पू तैन, अपने लोकां केरे रूपे मां कबूल केरेलो ते तैना लोक तैस अपनो परमेशर कबूल केरेले। 4 ते तै तैन लोकां केरे एछ़्छ़ी केरां सब ऐंखरू पुछ़ेलो; ते तैट्ठां पत्ती मौत न राली, ते न दुख, न मातम, न मुसीबत राली; पेइली गल्‍लां बीती जेई।"

20 तैखन अय्यूब खड़ो उठ्ठो, ते दुखेरे मारे अपना लिगड़ां छ़िन्दां, ते टिन्ड बनेइतां तुत्तरेरे भारे तल्‍ले मां झुकतां परमेशरेरी आराधना केरतां ज़ोने लगो, 21 "अवं एपनी अम्मरे पेटे मरां खाली हथ्थेइं एवरोईं, ते खाली हथ्थेइं च़लो गेइलो, यहोवा दित्तेरू थियूं, ते तैन्नी वापस भी नेवं; यहोवारू नवं धने।"

18 किजोकि जादे अक्ली सेइं दुख भी भोते,

ते ज़ै अपनु ज्ञान बद्धाते तै अपनो दुख भी बद्धाते।

10 बस गम अपने दिले मरां दूर केर, ते एपनी जानी करां दुख दूर केर, किजोकि लड़कपन ते जुवानी दूईये बेकारन।