1 अक होरि बुराई ज़ै मीं इस दुनियाई मां लाहोरीए, तै मैन्हन बड़ी भारी लगचे: 2 कोन्ची मैन्हु परमेशर धन दौलत ते इज़्ज़त इड़ी तगर देते कि ज़ैन किछ तैसेरो मन चाते तैस तैसेरी कोई घटी न भोए, फिर भी परमेशर तैस, तैस मरां खाने न दे, कोई होरो तैस खाते; ई बेकार ते बड़ो दुखे। 3 अगर कोन्ची मड़देरां 100 मट्ठा भोन, ते तै बड़े साल ज़ींतो राए ते तैसेरी उमर बधे, पन न तैसेरो प्राण खुश राए, ते न तैसेरी आखरी रसम की गाए, त अवं ज़ोताईं कि एरे मैन्हु करां वक्ते करां पेइलो मर्रो बच्‍चो रोड़ोए। 4 किजोकि तै बेफैइदो अव ते आंधरे मां च़लो जेव, ते तैसेरू नवं भी आंधरे मां छ़ेप्पी जेवं; 5 ते न तैने दिहाड़ो लाव, ते न किछ बुझ़ी बटु; फिर भी तैस मैन्हु करां जादे आराम मैल्हो। 6 किजोकि मैन्हेरे पल बेकार ज़िन्दगी मां ज़ै छावरो ज़ेरो बीत्ते कौन ज़ानते कि तैसेरे लेई रोड़ू कुन आए? किजोकि मैन्हु कौन ज़ोइ सकते कि तैसेरे बाद दुनियाई मां कुन भोल्हु?

7 मैन्हेरी सारी मेहनत तैसेरे पेटेरे लेई भोतीए, फिर भी तैसेरो मन न भरे। 8 ज़ै अक्लमन्दे, तै बेवकूफे करां कोस गल्‍ली मां बेद्धताएं? ते गरीब ज़ै एन ज़ानते कि इस ज़िन्दगी मां केन्च़रे सेइं च़लेरू लोड़ते, तैन भी तैस करां काई गल्‍लन मां बेद्धताएं? 9 एछ़्छ़न सेइं लहंनू, चंचल मने करां जादे रोड़ूए: इन भी बेकारे, तैन भी हवा ट्लाने बालू कम्मे।

10 ज़ैन किछ भोवरू बीतेरूए, तैसेरू नवं ज़मानेरे शुरू करां पेइलू रख्खू जेवरूए, ते तैन बांदू आहे कि तै मैन्हु आहे, कि तै तैस करां जादे शक्तिमाने*, ज़ै लड़ाई झगड़ो न केरि सके। 11 बेड़ि एरी ज़ेरि गल्‍लन, ज़ैन सेइं ज़िन्दगी मना जादे बेकार भोती गाचे, फिर भी मैन्हु कुन फैइदो हासिल भोते? 12 किजोकि कौन ज़ानते कि मैन्हेरे किछ बेकार दिहाड़े केरे दौरान, ज़ेन्च़रे तै छावरे ज़ेरे गुज़ारते, तैसेरेलेइ कुन रोड़ूए, तैस कौन ज़ोए? कि तैसेरे इस दुनियाई मरां च़ले गानेरां बाद कुन भोल्हु?