नंव्वू अम्बर ते कने नव्वीं धरती
1 फिरी मीं नंव्वू अम्बर ते नंव्वी धरती लाही, किजोकि पेइलू अम्बर, ते पेइली धरती न थी राहोरी, ते समुन्दर भी न राव। 2 फिरी मीं पवित्र नगर नंव्वू यरूशलेम सुर्गेरां परमेशरे करां एंइतू लाव, ते तैन तैस लैड़रू ज़ेरू थियूं, ज़ै अपने लाड़ेरे लेई तियार भोवरी भोए। 3 फिरी मीं परमेशरेरे तखते मरां कोई उच्ची आवाज़ी सेइं इन ज़ोते शुनो, "अज़ेरां बाद परमेशर मैन्हन सेइं साथी रालो, ते तैसेरू घर तैन लोकन मां भोल्हु, ते तैना तैसेरे लोक भोल्हे, ते परमेशर एप्पू तैन, अपने लोकां केरे रूपे मां कबूल केरेलो ते तैना लोक तैस अपनो परमेशर कबूल केरेले। 4 ते तै तैन लोकां केरे एछ़्छ़ी केरां सब ऐंखरू पुछ़ेलो; ते तैट्ठां पत्ती मौत न राली, ते न दुख, न मातम, न मुसीबत राली; पेइली गल्लां बीती जेई।"
5 ज़ै तखते पुड़ बिशोरो थियो तैने ज़ोवं, "कि तक, अवं सब किछ नंव्वू केरताईं।" फिरी तैने ज़ोवं, "कि लिख, किजोकि इना वचन विश्वासेरे काबल ते सच़्च़े आन।" 6 फिरी तैने मीं सेइं ज़ोवं, "सब किछ पूरू भोवं, अवं अलफा ते ओमेगा, पेइलो ते आखरी आईं, अवं ट्लिशोरे ज़िन्दगरे पैनेरे नागन मरां मुखत देइलो। 7 ज़ै ज़ींत हासिल केरे, तैए इन चीज़ां केरो बारस भोल्हो; ते अवं तैसेरो परमेशर भोल्हो, ते तैन मेरू मट्ठू भोल्हु। 8 पन डरपोक, विश्वास न केरनेबाले, भिटे, खूनी, बदमाशी केरनेबाले, जैदू केरनेबाले, मूरती केरि पूज़ा केरनेबाले ते सब झूठां केरो हिस्सो तैस समुन्दरे मां मैल्हेलो ज़ै अग्गी ते गन्धकी सेइं बलतो रहते, ई दूइयोवं मौते।"
नंव्वू यरूशलेम
9 फिरी तैन सत स्वर्गदूतेईं ज़ैनेईं सत आखरी आफतन सेइं भरोरे कटोरे मैन्हन पुड़ उलटावरे थिये, तैन मरां एक्के मीं कां एइतां ज़ोवं, "इरां एई, तीं अवं लैड़ी ज़ै जल्दी गबड़े सेइं ड्लाह बनाली हिराताईं।" 10 परमेशरेरे आत्मा अवं अपने कैबू मां कियो ते स्वर्गदूते अवं एक्की बड्डे ते उच्चे पहाड़े पुड़ नेव, ते पवित्र नगर यरूशलेम सुर्गेरां मरां परमेशरे करां एइतो हिरव। 11 परमेशरेरी महिमा तैस मां थी, ते तैसेरी लौ बड़े कीमती घोड़ां, मतलब बिल्लौरेरे ज़ेरे यशबे बराबर साफ थी। 12 तैस नगरेरे च़ेवरे पासन बड़ी उच्ची दिवार थी, ते तैसेरां 12 दारां ते दारन पुड़ 12 स्वर्गदूत थिये; ते तैन पुड़ इस्राएली केरे 12 गोत्रां केरां नंव्वां लिखोरां थियां। 13 पूर्वेरे पासे ट्लाई दारां, उत्तरेरे पासे ट्लाई दारां, दक्षिणेरे पासे ट्लाई दारां, ते पश्चिमेरे पासे ट्लाई दारां थियां। 14 ते नगरेरे दिवारारी 12 मुनीयादां थी, ते तैन पुड़ गबड़ेरे 12 प्रेरितां केरां 12 नंव्वां लिखोरां थियां। 15 ते ज़ै मीं सेइं गल्लां केरतो थियो, तैस कां नगर, ते तैसेरे दारन ते तैसेरे दिवारन नापनेरे लेई अक सोन्नेरो गज़ थियो। 16 ते तैस नगरेरे च़ेवर पासे थिये, ते तैसेरी लमबाई चोड़ाइअरे बराबर थी, ते तैने तैस गज़े सेइं नगर नापू, त 750 कोस निस्सी, ते तैसेरी लमबाई, ते चौड़ाई, ते ऊँचाई बराबर थी। 17 तैसेरां बाद स्वर्गदूते दिवारारी ऊँचाई नापी। तैने एन्च़रे नापी ज़ेन्च़रे मैन्हु चीज़ां नापतन, तै दिवार 66 मीटर उच्ची निस्सी। 18 ते तै दिवार कीमती घोड़न सेइं बनोरी थी ज़ैस जो यशब ज़ोतन, नगर खालिस सोन्ने सेइं बनोरू थियूं, ज़ैन साफ चमकते शीशेरू ज़ेरू भोए। 19 ते तैस नगरेरी मुनीयादरे घोड़ हर किसमेरी कीमती घोड़न सेइं सज़ावरे थिये, पेइली मुनीयाद यशबेरी दूइयोवं नीलमणेरी ट्लेइयोवं लालड़ी, च़ेवरोवं मरकते, 20 पंच़ोंव गोमेदेक, शेइयोवं माणिक्य, सत्तोवं पीतमणि, अठोवं पेरोज, नंव्वोवं पुखराज, दशोवं लहसनिए, यारोवं धूम्रकान्त, बारोवं याकूतेरी थी। 21 ते 12 दारां, 12 मोती केरां थियां, अक-अक दार, एक्की-एक्की मोती सेइं बनोरू थियूं, ते नगरेरी सड़क साफ शीशेरी ज़ेरि खालिस सोन्नेरी थी।
22 मीं कोई मन्दर न लाव, किजोकि सर्वशक्तिमान प्रभु-परमेशर, ते गबड़ू तैड़ी नगरे मांए। एल्हेरेलेइ मन्दरेरी कोई ज़रूरत नईं। 23 ते तैस नगरे मां दिहाड़ो ते चैंदनरे लौअरी ज़रूरत नईं, किजोकि परमेशरेरे महिमाई सेइं तैस मां लौ भोइ राहोरीए, ते कने गबड़ू तैसेरो दीयोए। 24 ते कौमां-कौमां केरे लोक तैसेरी लौई मां राले, ते धेरतलरे राज़े अपनि-अपनि धन-दौलत तैस नगरे मां आनेले। 25 तैस नगरेरां दारां सारे दिहैड़ी खुल्ला भोल्हो ते कधी बंद न भोल्हां। किजोकि तैड़ी कोई रात न भोल्ही। 26 दुनियारे लोक दुनियारे कौमां केरि सैरी खूबसूरत चीज़ां ते धन-दौलत तैस नगरे मां आनेले। 27 ते तैस मां कोई भिट्टी चीज़ या गन्दु कम केरनेबालो या झूठ बनानेबालो, केन्ची भी तरीके सेइं अन्तर न गालो; पन सिर्फ तैना लोक ज़ैन केरां नंव्वां गबड़ेरे ज़िन्दगरे किताबी मां लिखोरां भोल्हां।