1 ज़ैन सत स्वर्गदूतन कां तैना सत कटोरे थिये, तैन मरां एइतां एक्‍के मीं सेइं ज़ोवं, "इरां एई, अवं तीं तैस बड़े वेश्यारी सज़ाह हिराताईं, ज़ै बड़े पैन्न पुड़ बिशोरीए। 2 ज़ैस सेइं धेरतलरे राज़ेईं बदमाशी की, ते धेरतली पुड़ रानेबाले तैसेरे बदमैशरे शराबी सेइं मसत भोवरे थिये।" 3 तैखन आत्मा अवं अपने कैबू मां कियो ते स्वर्गदूते अवं सुनसान ठैरी मांजो नेव। तैड़ी मीं अक कुआन्श हैवाने पुड़ सुवार लाही, ज़ेसेरी सत क्रोड़ी ते दश शिंगां थियां, तैसेरे जान परमेशरेरी तुहीन केरनेरे नंव्वन सेइं ढकोरी थी। 4 तैस कुआन्शां बैंगनी ते लाल लिगड़ां लेवरो थियां, ते सोन्नेरे ते कीमती मेनी ते मोतन सेइं सज़ोरी थी, ते तैसेरे हथ्थे मां अक सोन्नेरो कटोरो शराबी सेइं भेरतां थियो, ज़ै अशुद्ध कम्मन ते बदमैशरे कम्मन हिराते। 5 ते तैसेरे कुपाए पुड़ इन नवं लिखोरू थियूं, "भेद-बड़ो बाबेल धेरतलरी वेश्यां ते भिट्टी चीज़ां केरि अम्मा।" 6 ते मीं तै कुआन्श परमेशरेरे लोकां केरो खून ते यीशुएरे गवाहां केरो खून पीने सेइं मसत भोती लाही, ते अवं तैन लेइतां हैरान भोव।

7 तैने स्वर्गदूते मीं सेइं ज़ोवं, "तू किजो हैरान भोव? अवं तीं सेइं इस कुआन्शरो, ते तैस हैवानेरो भेद ज़ोताईं, ज़ैस पुड़ तै सुवारे, ते ज़ेसेरी सत क्रोड़ी ते दश शिंगन। 8 ज़ै हैवान तीं लाव, ई पेइलो थियो, पन हुनी नईं रानो, ते अथाह कुण्डेरां निसेलो ते परमेशर तैस पूरे तरीके सेइं नाश केरेलो, ते ज़ैना लोक इस दुनियाई मां ज़ींने लगोरेन ज़ैन केरां नंव्वां परमेशरे दुनिया बनाने करां पेइले ज़िन्दगरे किताबी मां नईं लिखोरां, तैना इस हैवान हेरतां हैरान भोल्हे, ई हैवान पेइलो ज़ींतो थियो ते हुनी ज़ींतो नईं पन फिरी एज्जेलो। 9 इन समझ़नेरे लेई ज्ञानी मन ज़रूरीए, तैना सत पहाड़न, ज़ैन पुड़ तै कुआन्श राज़ केरतीए। 10 ते तैना सत राज़े भी आन, पंच़ त मेरि जेवरेन, ते अक हेजूए; ते अक आखरी हेजू नईं एवरो, पन ज़ैखन तै एज्जेलो त थोड़े च़िरेरे लेई राज़ केरेलो। 11 ते ज़ै हैवान पेइलो थियो, ते हुना नईं, तै एप्पू अठोवं राज़ोए; ते तैन सत्तन मरां पैदा भोव, ते आखरी मां तैस राज़े हमेशारी सज़ाह मैल्हेली। 12 ते ज़ैना दश शिन्गां तीं पेइलां लां, तैना दश राज़ेन, ज़ैनेईं हेजू तगर राज़ शुरू नईं कियोरू। तैन दश राज़न हैवाने सेइं साथी राज़ केरनेरो अधिकार दित्तो जेव, पन तैन राज़ केरनेरे लेई थोड़ो वक्त दित्तो। 13 इना सब अक मन भोल्हे, ते तैना अपनि-अपनि शक्ति ते अधिकार तैस हैवान देले। 14 इना गबड़े सेइं लड़ेले, ते गबड़ू तैन पुड़ ज़ींत हासिल केरेलू; किजोकि तै राज़ां केरो राज़ो ते प्रभुं केरो प्रभुए। तैस पत्ती च़लनेबाले तैना आन ज़ैना परमेशरे कुजेवरेन ते च़ुनोरेन, ते ज़ैना तैस सेइं साथी ईमानदार आन।"

15 फिरी तैने स्वर्गदूते मीं सेइं ज़ोवं, "कि ज़ैन पानी तीं पेइलू लाहोरू थियूं, ज़ैस पुड़ तै वेश्या बिशोरी थी, ऐह दुनियारे सारे कौमन हिराती, ज़ैना बड़े मुल्खन मरां ते भाषान मरां आन। 16 तै वक्त एज्जेलो ज़ेइस हैवान दश राज़न सेइं ज़ैना तैस सेइं साथी आन, तैस वेश्याई सेइं बैर रखेले, तैना तैस पुड़ हमलो केरेले ते तैस नग्गी केरेले तैसेरू किछ मास खाले, ते बाकी फुकेले। 17 किजोकि परमेशर तैन केरे मन्न मां इन छ़डेलो, कि तैना तैसेरी मर्ज़ी पूरी केरेले; ते ज़ांतगर परमेशरेरू वचन पूरू न भोए, तांतगर अक मन भोइतां अपनु राज़ हैवाने देन। 18 ते तै कुआन्श, ज़ै तीं लाहोरी तैन बड्डू नगरे, ज़ैन धेरतलरे राज़न पुड़ राज़ केरते।"