प्रकाशित 20

1000 सालां केरू राज़

1 फिरी मीं अक स्वर्गदूत सुर्गेरां एइतो लाव; ज़ेसेरे हथ्थे मां अथाह कुण्डेरी चाबी ते कने अक बड्डी शंगल थी। 2 तैने तै अजगर ट्लाव ज़ै बड़े पेइले सप्पेरे रूपे मां लेइहोरो थियो ज़ेसेरू नवं शैतान भी आहे। तैने तै ट्लेइतां हज़ार सालेरे लेई बन्धो। 3 ते तै अथाह कुण्डे मां शैरतां बन्द कियो ते तैस पुड़ मोहर लाई; कि तै हज़ार साल पूरे भोने तगर कौमां-कौमां केरे लोकन फिरी न भटकाए; इसेरां पत्ती ज़रूरे, कि थोड़े च़िरेरे लेई खोल्‍लो गाए।

4 फिरी मीं किछ तखत लाहे ते ज़ैना लोक तैन पुड़ बिश्शोरे थिये ते तैन राज़ केरनेरो अधिकार दित्तो; ते तैन केरि आत्मा भी लेही, ज़ैन केरि क्रोड़ी एल्हेरेलेइ केटोरी थी कि तैना यीशु मसीह अपनो प्रभु मनतन ते परमेशरेरे वचने पुड़ विश्वास केरतन, ते ज़ैनेईं तैस हैवानेरी, ते तैसेरे मूरतरी पूज़ा न थी कियोरी, ते तैसेरी मोहर अपने कुपाए ते हथ्थन पुड़ न थी। तैना ज़ींते भोइतां मसीह सेइं साथी हज़ार सालन तगर राज़ केरेले। 5,6 इना लोक पेइले आन ज़ैना ज़ींते किये गाले ते तैना धन ते पवित्र आन। दूइयोवं मौतरी तैन पुड़ कोई शक्ति न भोल्ही। तैना परमेशरेरे लेई याजक भोल्हे ते मसीह तैन सेइं साथी हज़ार साल राज़ केरेलो, ज़ांतगर तैना हज़ार साल पूरे न भोन तांतगर होरे मर्रे लोक ज़ींते न किये गाले।

शैतानेरो विनाश

7 ज़ैखन हज़ार साल खतम भोनेबाले भोल्हे त स्वर्गदूत शैताने तैस ठैरारा हथरां छ़डेलो ज़ैड़ी तै बन्धोरो थियो। 8 ते तैन कौमन ज़ैना सैरी दुनियाई मां आन धोखो देनेरे लेई निस्सेलो। तैन कौमन जो गोग ते मागोग ज़ोतन। शैतान तैन तैस ठैरी आनेलो ज़ैड़ी तै तैन सेइं लड़ेलो। तैन केरि गिनती समुन्दरेरे रेती बराबर भोल्ही। 9 शैतानेरी सेना सारे दुनियाई मां गाली, तैना तैस नगरे घेरेले ज़ैस सेइं परमेशर प्यार केरते ते ज़ैड़ी तैसेरे लोक रहतन, परमेशरेरे तरफां सुर्गेरां अग तैन सेब्भन भस्म केरेली। 10 ते तैन केरो गुमरा केरनेबालो शैतान अग ते गन्धकेरे समुन्दरे मां शारो गालो, ज़ैस मां तै हैवान ते कने झूठो नबी भी भोल्हो, तैना रात दिहाड़ी हमेशा दुखे मां राले।

बड्डो छ़ितो तखत ते आखरी न्याय

11 फिरी मीं अक बड्डो छ़ितो तखत ते ज़ै तैस पुड़ बिशोरो थियो लाव, ज़ेसेरे सामनेरां धरती ते अम्बर नश्शू, ते तैन केरे लेई ठार न मैल्ही। 12 फिरी मीं निकड़े बडे ज़ैना मर्रे थिये तखतेरे सामने खड़े लाहे, ते किताबां खोल्‍ली जेई; ते फिरी अक होरि किताब खोल्‍ली; मतलब ज़िन्दगरी किताब खोल्‍ली; ते ज़ेन्च़रे तैन किताबन मां लिखोरू थियूं, तैन केरे कम्मां केरे मुताबिक मुड़दां केरो न्याय कियो। 13 ते समुन्दरे तैना मर्रे मैन्हु दित्ते ज़ैना तैस मां थिये, ते मौतां ते पाताले ज़ैना तैस मां मर्रे थिये दित्ते; ते तैन मरां हर एक्‍केरो तैन केरे कम्मां केरे मुताबिक न्याय कियो। 14 ते मौत ते पाताल भी अग्गरे समुन्दरे मां शारू, ई अग्गरो समुन्दरे त दूइयोवं मौते। 15 ते ज़ेसेरू भी नवं ज़िन्दगरे किताबी मां लिखोरू न मैल्हू, तै अग्गरे समुन्दरे मां शारो जेव।