प्रकाशित 8

सत्तोवं मोहर ते सोन्नेरू धूपदान

1 ज़ैखन गबड़े सत्तोवं मोहर खोल्‍ली, त सुर्गे मां अध्धे घंटे तगर खामोशी राई। 2 मीं तैन सत स्वर्गदूत ज़ैना परमेशरेरे सामने खड़े रहतन, लाहे, ते तैन सत नरशिंगे दित्ते जे।

3 फिरी अक होरो स्वर्गदूत सोन्नेरू धूपदान घिन्तां अव, ते बलिदान केरनेरी ठारी कां जेव; ते तैस बड़ो धूप दित्तो, कि सेब्भी पवित्र लोकां केरि प्राथनान सेइं साथी तैस सोन्नेरे बलिदान केरनेरी ठारी पुड़ ज़ै तखतेरे सामने च़ाढ़े। 4 ते तैस धूपेरो तू परमेशरेरे लोकां केरि प्राथनान सेइं साथी स्वर्गदूतां केरे ज़िरिये परमेशरेरे सामने पुज़ो। 5 तैखन स्वर्गदूत धूपदान नेइतां तैस मां बलिदान केरनेरी ठारारी अग भरी, ते धेरतली पुड़ छ़डी, ते गुड़नेरी आवाज़ ते बिजली ते भुंज़ल भोने लाए।

सत नरशिंगे

6 ते तैना सते स्वर्गदूत ज़ैन कां सत नरशिंगे थिये, बज़ानेरे लेई तियार भोए।

7 पेइले स्वर्गदूत नरशिंगो बज़ाव, ते खूने सेइं मिलोरी आण ते अग धेरतली पुड़ शारी; ते धेरतली ट्लेइन मरां अक हिस्सो फुकोई जेव, ते बुट भी अक तिहाई फुकोए, ते सब नीलो घास भी फुकोव।

8 दूइयोवं स्वर्गदूते नरशिंगो बज़ाव, त किछ ज़ेन्च़रे बड्डे पहाड़ेरू ज़ेरू अग्गी सेइं फुकोतू समुन्दरे मां शारू; ते समुन्दर अक तिहाई खून भोव। 9 ते अक तिहाई जानबर ज़ैना समुन्दरे मां रहते थिये मेरि जे, ते समुन्दरेरां अक तिहाई ज़िहाज़ां तबाह भोआं।

10 ट्लेइयोवं स्वर्गदूते नरशिंगो बज़ाव, ते अक बड्डो तारो ज़ै दीयेरो ज़ेरो बलतो थियो, सुर्गेरां ट्लुटो, ते दरियां केरे एक्‍की तिहाई पुड़, ते पैन्न पुड़ पेव। 11 ते तैस तारेरू नवं नागदौनाए, ते अक तिहाई पानी नागदौनारू ज़ेरू ट्लिठू भोवं, ते बड़े मैन्हु तैस पैनेरे ट्लिठू भोने सेइं मेरि जे।

12 च़ेवरोवं स्वर्गदूते नरशिंगो बज़ाव, ते दिहाड़ो अक तिहाई, ते चैंदनरी अक तिहाई ते तारां केरि एक्‍की तिहाई पुड़ हलचल पेई, इड़ी तगर कि तैन केरो अक तिहाई हिस्सो आंधरो भोव ते दिहैड़री एक्‍की तिहैई मां लौ न राई, ते तेन्च़रे राती मां भी।

13 ज़ैखन मीं हेरू, त अम्बरेरे मझ़ामेई अक उकाब उडरते ते ज़ोरे सेइं इन ज़ोते शुनू, "कि तैन ट्लाई स्वर्गदूतां केरे नरशिंगेरे आवाज़रे वजाई सेइं ज़ैना बज़ाने हेजू बाकिन, धेरतली रानेबालन पुड़ अफ़सोस! अफ़सोस! अफ़सोस!"