सत कलीसियां केरे बारे मां
1 यीशु मसीहेरो प्रकाशितवाक्य, ज़ै परमेशरे तैस एल्हेरेलेइ दित्तो कि तै अपने सेवकन तैना गल्लां हिराए, ज़ैन केरू जल्दी भोनू ज़रूरीए। यीशु मसीहे अपनो स्वर्गदूत भेज़तां तैसेरे ज़िरिये अपने दास यूहन्ना इना गल्लां ज़ोई, 2 अवं यूहन्ना तैन सब लिखने लगोरोईं ज़ैन मीं लवं, अवं इस मां परमेशरेरू वचन ते यीशु मसीहेरी सच़्च़ी शिक्षारी गल्लां लिखने लगोरोईं ज़ैना तैनी मीं सेइं ज़ोई। 3 परमेशर तैन सेब्भी लोकन बरकत देलो ज़ैना इस भविष्यिवैनरे वचने पढ़तन, ते कने ज़ैना शुन्तन ते इस मां लिखोरी गल्लन मनतन, किजोकि इन गल्लां पूरी भोनेरो वक्त नेड़ो एवरोए। 4 अवं यूहन्ना आसियारे सत कलीसियान जो लिखने लगोरोईं। परमेशरे ज़ै आहे ते ज़ै हमेशा थियो, ते ज़ै एजनेबालोए; ते तैन सत आत्मां केरे तरफां ज़ैना तैसेरे तखतेरे सामनेन तुसन अनुग्रह ते शान्ति मैलती राए। 5 ते यीशु मसीहेरे तरफां, ज़ै वफादार गवाह ते मुड़दन मरां ज़ींतो भोने बालन मरां पेइलोए त कने धेरतरे राज़ां केरो प्रधाने तुसन अनुग्रह ते शान्ति मैलती राए। यीशु मसीहे असन सेइं प्यार कियो, त कने तैने अपने खूने सेइं अस पापन करां छुटाए। 6 तैने अस अक राज़ ते अपने बाजी परमेशरेरी सेवा केरनेरे लेई याजक भी बनाए; तैसेरी महिमा ते हुकूमत हमेशा भोती राए। आमीन। 7 हेरा, मसीह बिदलारी सेइं साथी एजनेबालोए, ते हर कोई तैस लाहेलो, बल्के ज़ैना लोक तैसेरे मौतरे लेई ज़िमेवार थिये, तैना भी तैस लाहेले, ते धेरतरे सारे लोक ज़ोरे-ज़ोरे सेइं लेरां देले। हाँ इन भोल्हु। आमीन। 8 प्रभु-परमेशर ज़ोते, "अव्वें अलफा ते ओमेगा आईं, (मतलब पेइलो ते आखर) अवं तै आईं, ज़ै आहे, ज़ै हमेशा थियो, ते ज़ै एजने बालोईं, ते बड़ो शक्ति बालोईं।" तै इन ज़ोते,
यूहन्ना मसीहेरू दर्शन भोनू
9 अवं यूहन्ना तुश्शो विश्वासी ढ्ला, ते कने यीशु मसीहेरे लेई दुखन मां, परमेशरेरे राज़्ज़े मां, ते सबरी मां तुसन सेइं साथी शामलाई। अवं पतमुस नंव्वेरे टैपू पुड़ परमेशरेरू वचन शुनानेरे त कने यीशुएरी गवाही देनेरे वजाई सेइं कैद थियो। 10 हफतेरे पेइले दिहाड़े पवित्र आत्मां अवं अपने कैबू मां कियो, मीं एप्पू पत्र अक आवाज़ इन ज़ोते शुनी। तै आवाज़ नरशिंगेरी उच्ची आवज़री ज़ेरि थी। 11 "ज़ैन किछ तू लहतस, तैस किताबी मां लिखतां सत नगरां केरे कलीसियान कां भेज़, मतलब इफिसुस, स्मुरना, पिरगमुन, थुआतीरा, सरदीस, फिलदिलफिया ते लौदीकिया नगरन मां आन।"
12 तैखन ज़ै मीं सेइं गल्लां केरने लगोरो थियो तैस हेरनेरे लेई तक्कू; ते पत्रोवं फिरतां मीं सोन्नेरे सत दीवट लाहे। 13 ते तैन दीवटां केरे मझ़ाटे मड़देरो ज़ेरो कोई लाव, तैने पव्वन तगर लम्मो चोगो लेवरो थियो, ते तैसेरे छैती पुड़ सोन्नेरो पटको बंधोरो थियो। 14 तैसेरे क्रोड़ी पुड़ तैसेरे बाल छ़ित्ती उन्नी या हिंवेरे ज़ेरे थिये। तैसेरी एछ़्छ़ी अग्गरे लपरी ज़ेरि बेलती थी। 15 ते तैसेरे पव भेट्ठी मां गर्म कियोरे पितलरे ज़ेरे चमकते थिये, ते ज़ैखन तैने गल की तैसेरी आवाज़ बड़े ज़ोरे सेइं थी, ज़ेन्च़रे बड़े दरियां केरि ज़ेरि ज़ैना बड़े ज़ोरे सेइं च़लतन। 16 ते तै अपने देइने हथ्थे मां सत तारे घिन्तां थियो, ते तैसेरे मुखे सेइं दूई धारण बाली तलवार निसती थी, तैसेरू तुत्तर एरू चमकतू थियूं, ज़ेन्च़रे दिहाड़ो भर-दुपहरेईं चमकते। 17 ज़ैखन मीं तै लव, त तैसेरे पव्वन पुड़ मुड़देरो ज़ेरो पेव, ते तैने मीं पुड़ अपनो देइने हथ रेखतां इन ज़ोवं, "डर न, अवं पेइलो त कने आखरी आईं। 18 ते ज़ींतो भी अवं आई, अवं एक्की बार मर्रो थियो, पन हुनी अवं ज़ींतोईं ते अवं हमेशा ज़ींतो रहनोईं। मीं मौती पुड़ ते पाताले पुड़ ज़ै मर्रे लोकां केरि ठारे अधिकारे। 19 एल्हेरेलेइ ज़ैना गल्लां तीं हेरी ते ज़ैना गल्लां भोइ रेवरिन, ते ज़ैना इट्ठां बाद भोने बैलिन, तैना सब लिख।" 20 मतलब तैन सत तारां केरो भेद ज़ैना तीं मेरे देइने हथ्थे मां लाहोरे थिये, ते तैन सत सोन्नेरे दीवटां केरो भेद, ते सत तारे सत कलीसियां केरे स्वर्गदूतन, ते तैना सत दीवट सत कलीसियान।