प्रकाशित 10

स्वर्गदूत ते निकड़ी किताब

1 फिरी मीं अक होरो ताकतबर स्वर्गदूत बिदलार पलेटतां सुर्गेरां एइतो लाव, तैसेरे दोग्गे पुड़ भुन्ज़ल्‍लैठ थी, ते तैसेरू आशी दिहाड़ेरू ज़ेरू ते तैसेरे पव अग्गरे खम्भेरे ज़ेरे थिये। 2 तैने अपनो देइने पव समुन्दरे पुड़ रख्खो, ते बांओ धेरतली पुड़ रख्खो, ते तैसेरे हथ्थे मां अक निकड़ी किताब खोल्‍लोरी थी। 3 तैनी स्वर्गदूते बड़े ज़ोरे सेइं ज़ोवं, तैसेरी आवाज़ शेरेरे गरज़नेरी ज़ेरि थी। ते ज़ैखन तैने ज़ोरे सेइं चिन्ड मारी, त सत आवाज़ेईं जुवाब दित्तो, ज़ैन केरि आवाज़ गुड़नेरी ज़ेरि थी। 4 ते ज़ैखन मीं सत्ते गुड़नेरी आवाज़ शुनी, त अवं लिखने बालो थियो, त मीं सुर्गेरां ई आवाज़ शुनी, "कि ज़ैना गल्‍लां तीं गुड़नेरी ज़ेरि शुनोरिन, तैन छ़ेपोरी रख, ते तैन न लिख।" 5 ते ज़ै स्वर्गदूत मीं समुन्दर ते धेरतली पुड़ खड़ो लेवरो थियो; तैने अपनो देइने हथ सुर्गेरे पासे खड़ो कियो। 6 ते ज़ै हमेशा ज़ींतोए ते ज़ैने सुर्ग, धरती त कने समुन्दर ते ज़ैन किछ तैन मांए बनेवरूए, तैनी तैसेरी कसम खेइतां ज़ोवं, "हुनी होरि कोन्ची चीज़रो इंतज़ार नईं। हुनी सब पूरू कियूं गालू।" 7 बल्के ज़ैखन सत्तोवं स्वर्गदूत नरशिंगो बज़ालो, त परमेशरेरो तै मकसद पूरो भोल्हो ज़ै तैसेरे नेबेईं ज़ोवरोए, ज़ैनेईं तैसेरी सेवा की, पन तैने होरि लोकन तैसेरो पतो लग्गने न दित्तो। 8 मीं फिरी दुबारां सुर्गेरां तैए आवाज़ शुनी। तैस आवाज़ां मीं सेइं ज़ोवं, तैए फिरी मीं सेइं गल्‍लां केरने लाव, "कि गा, ज़ै स्वर्गदूत समुन्दर ते धेरतली पुड़ खड़ोए, तैसेरे हथ्थे मरां खुलोरी किताब ने।" 9 ते मीं स्वर्गदूत कां गेइतां ज़ोवं, "ई निकड़ी किताब मीं दे।" तैने मीं सेइं ज़ोवं, "यां इस खा, ते ई तेरे पेटे ट्लइट्ठी त केरेली, पन तेरे ऐशी मैछ़ी करां भी जादे मिट्ठी लग्गेली।" 10 ते मीं तै निकड़ी किताब तैस स्वर्गदूते करां नेइतां खाइ, तै मेरे ऐशी मां मैछ़ेरी ज़ेरि मिट्ठी लग्गी, पन ज़ैखन मीं तै खाइ, ते तैस सेइं मेरू पेट ट्लिठू भोवं। 11 तैखन मीं सेइं इन ज़ोवं, "तीं बड़े लोकन, कौमन, भाषान, ते कने राज़न पुड़, फिरी दुबारां भविष्यिवाणी केरनि भोल्ही।"