1 तैखन यीशुए अपने चेलन सेइं ज़ोवं, ज़ैखन मैन्हेरू मट्ठू यानी अवं वापस एज्जेलो तैस मौके सुर्गेरू राज़ तैन दश अड्लैई कुइयां केरू ज़ेरू भोल्हु, ज़ैना अपनि मिसालां बैलतां लाड़े सेइं मिलनेरे लेई निस्सी। 2 तैन मां पंच़ बेवकूफ थी, पन पंच़ अक्लमन्द थी। 3 ज़ैना बेवकूफ थी तैनेईं मिसालां त नी, पन होरो तेल साथी न नियो। 4 "पन ज़ैना अक्लमन्द थी तैनेईं मिसालां केरे अलावा कुप्पन मां होरो तेल भी साथी नियो।" 5 लाड़ो एजने च़िर लग्गू, ते तैना सब बलगते-बलगते डिगरी लेई देने, ते झ़ुल्‍ली जेई।

6 "अध्धी रात भोइ त शौर मच़ी कि लाड़ो एवरोए, ते तैस सेइं मिलनेरे लेई एज्जा। 7 तैखन सैरी अड्लैई कुइयां बींझ़ी, ते अपनि-अपनि मिसालां ठीक केरने लेगि। 8 बेवकूफ कुइयेईं अक्लमन्द अड्लैई कुइयन सेइं ज़ोवं, ‘अपने तेले मरां थोड़ो ज़ेरो तेल असन भी देथ, किजोकि इश्शी मिसालां हिश्शने लेवरिन।’ 9 पन अक्लमन्द कुइयेईं जुवाब दित्तो, ‘असन कां एत्रो तेल नईं, कि इश्शे लेई ते तुश्शे लेई पूरो भोए, तुस एरू केरा कि बेच़नेबालन करां आनां।’ 10 ज़ैखन तैना तेल घिन्ने च़ेलोरी थी त तेत्रे मां लाड़ो पुज़ी जेव, ते ज़ैना तियार थी, तैना लाड़े सेइं साथी अन्तर ड्लाहेरे घरे मां च़ेलि जेई, ते दार बंद केरतां छ़डू। 11 बादे मां तैना होरि अड्लैई कुइयां भी वापस पुज़ी ते लाड़े जो ज़ोने लेगि, ‘प्रभु! प्रभु!’ इश्शे लेई दार खोल्‍ल। 12 पन तैनी जुवाब दित्तो, ‘अवं तुसन सेइं सच़ ज़ोताईं, अवं तुसन न ज़ैंनी।’ 13 एल्हेरेलेइ खबरदार राथ, किजोकि तुस मेरे वापस एजनेरे दिहाड़ेरे बारे मां न ज़ानथ।"

14 ज़ैखन मैन्हेरू मट्ठू यानी अवं वापस एज्जेलो त सुर्गेरू राज़ तैस मैन्हेरो ज़ेरू भोनूए, ज़ै दूर मुल्खे जेव, तैनी अपने नौकर कुजाए ते सारी दौलत तैन दित्ती, ते तैन ज़ोवं एस दौलती सेइं होरि भी कमाई केरा। 15 "तैनी एक्‍की पंच़ तोड़े दित्ते होरि दूई तोड़े दित्ते, ते एक्‍की अक्‍के तोड़ो* दित्तो, हर एक्‍की तैसेरे काबलीतरे मुताबिक दित्ते, ते एप्पू होरि मुल्खे जो च़लो जेव।" 16 ज़ैस नौकरे पंच़ तोड़े मैल्होरे थिये, तैनी गेइतां कारोबार केरतां पंच़ तोड़े होरे कमाए। 17 एन्च़रे ज़ैस नौकरे दूई तोड़े मैल्होरे, तैनी दूई होरे कमाए। 18 पन ज़ैस नौकरे अक तोड़ो मैल्होरो थियो, तैनी मित्ती घेड़तां मालिकेरी रकम छ़ुपेइतां छ़डी।

19 बड़े च़िरेरां पत्ती तैन केरो मालिक वापस अव, ते नौकरन सेइं हिसाब केरने लगो कि तैनेईं तैन तोड़ां केरू कुन कियूं। 20 "ज़ैस नौकरे पंच़ तोड़े मैल्होरे थिये, तैनी गेइतां पंच़ होरे तोड़े हाज़र कमाए ते ज़ोने लगो, ‘हे मालिक तीं पंच़ तोड़े दित्तोरे, ते हेर मीं पंच़ तोड़े होरे कमाए।’ 21 मालिके तैस सेइं ज़ोवं, ‘शाबाश ईमानदार नौकरा तीं थोड़ी ज़ेरि रकमी पुड़ ईमानदैरी सेइं कम कमाव, अवं तीं बेड़ि चीज़ां केरो मुख्तियार बनालो, ते अपने मालिकेरी खुशी मां शामल भो।’"

22 ते ज़ैस दूई तोड़े मैल्होरे थिये, तै भी अव ते ज़ोने लगो, "हे मालिक तीं मीं दूई तोड़े दित्तोरे थिये, ते हेर मीं दूई तोड़े होरे कमाए।" 23 मालिके तैस सेइं ज़ोवं, "शाबाश ईमानदार नौकरा तीं थोड़ी ज़ेरि रकमी पुड़ ईमानदैरी सेइं कम कमाव, अवं तीं बेड़ि चीज़ां केरो मुख्तियार बनालो, ते अपने मालिकेरी खुशी मां शामल भो।"

24 ते ज़ैस अक तोड़ो मैल्होरो थियो, त तै भी हाज़र भोव ते ज़ोने लगो, "हे मालिक अवं ज़ानतो थियो तू बड़ो सखत मैन्हु आस, तू तैस मैन्हेरो ज़ेरोस ज़ैनी ऊडारे मां फसल नईं बेवरी ते तै तैट्ठां फसल कटते।" 25 एल्हेरेलेइ अवं डरो कि अगर अवं तेरी दौलत हरेइलो त तू मीं सज़ाह देलो, तांए तेरी दौलत मीं ज़मीनी मां देबतां छ़डी, हेर, "तेरी दौलत ई आए।" 26 तैसेरे मालिके जुवाब दित्तो, हे दुष्ट ते निकम्मे नौकरा अगर तीं पतो थियो, कि अवं तैस मैन्हेरो ज़ेरोईं ज़ैनी ज़ैस ऊडारे मां नईं बेवरू त तैट्ठां कटते। 27 त तीं एन लोड़तू थियूं कियोरू, कि मेरी दौलत शौकारां केरे हवाले केरस, तैखन अवं वापस एइतां अपनि दौलत सूते समेत उसुल केरेथो। 28 हुनी एन केरा कि एस करां तै तोड़ो नेइतां तैस देथ ज़ैस कां दश तोड़ेन। 29 एल्हेरेलेइ ज़ैस कां परमेशरेरी मर्ज़ी समझ़नेरी इच्छा आए, तैस परमेशर जादे समझ़ देलो। पन ज़ैस कां परमेशरेरी मर्ज़ी समझ़नेरी इच्छा नईं, तैस केरां, थोड़ी ज़ेरि समझ़ ज़ै तैस कां आए, तै भी नी गाली। 30 ते एस निकम्मे नौकरे बेइर आंधरे मां छ़ड्डा, ज़ैड़ी ऐह लेरां देंतो ते दंत च़ापतो राए।

31 ज़ैखन मैन्हेरू मट्ठू यानी अवं, अपने महिमा मां अपने स्वर्गदूतन सेइं साथी एज्जेलो त अपने महिमारे तखते पुड़ बिशतां लोकन पुड़ राज़ केरेलो। 32 सैरी कौमां मीं कां अकोट्ठी भोल्ही, ते धर्मी लोक बुरे लोकन करां अलग किये गानेन, ज़ेन्च़रे पुहाल भैड्डन, छ़ेल्‍लन मरां अलग केरते। 33 ते अवं धर्मी लोकन सेइं ज़ैना मेरे देइने पासे भोल्हे, ते बुरे लोकन ज़ैना मेरे बांए पासे भोल्हे। 34 तैखन राज़ो यानी अवं अपने देइने पासेरे लोकन सेइं ज़ोलो, "एज्जा मेरे बाजेरे धन लोकव इन राज़, ज़ैन दुनियारे शुरू मां तुश्शे लेई तियार कियोरूए। 35 किजोकि अवं नियन्नो थियो, ते तुसेईं मीं रोट्टी खुवाई, अवं ट्लिशोरो थियो, ते तुसेईं मीं पानी पियांव अवं परदेशी थियो, ते तुसेईं अवं अपने घरे मां कुजव। 36 अवं नग्गो थियो, ते तुसेईं मीं लिगड़ां दित्तां, ते अवं बिमार थियो, ते तुसेईं मेरी हेरगेश की अवं कैद थियो, ते तुस मीं मिलने आए।"

37 तैखन तैना धर्मी मैन्हन ज़ोलो, "हे प्रभु असेईं कैखन तू नियन्नो लाव, ते असेईं तीं रोट्टी खुवाई या तू ट्लिशोरो थियो, ते असेईं तीं पानी पियांव।" 38 असेईं कैखन परदेशी सेमझ़तां तू अपने घरे मां रख्खो, या तू नग्गो थियो, ते असेईं तीं लिगड़ां दित्तां? 39 ते अस कताली तीं बिमार या कैद लेइतां तीं सेइं मिलने आए? 40 तैखन राज़ो यानी अवं जुवाब देलो, "कि अवं तुसन सेइं सच़ ज़ोताईं कि ज़ैखन तुसेईं इन लोकन सेइं ज़ैनेईं मीं पुड़ विश्वास कियो एक्‍की सेइं भी एरो बर्ताव कियो त एन बुझ़ा कि एन तुसेईं मीं सेइं कियूं।"

41 तैखन तै बांए पासे बालन सेइं ज़ोलो, "हे लानती लोकव मेरे तुत्तरे अगरां तैस हमेशारी बैलती अग्गी मांजो गाथ, ज़ै परमेशरे, शैतान त कने शैतानेरे दूतां केरे लेई तियार कियोरीए। 42 एल्हेरेलेइ ज़ैखन अवं नियन्नो थियो, ते तुसेईं मीं रोट्टी न खुवाई अवं ट्लिशोरो थियो, ते तुसेईं मीं पानी न पियांव। 43 अवं परदेशी थियो, ते तुसेईं अवं अपने घरे मां न रख्खो, अवं नग्गो थियो, ते तुसेईं मीं लिगड़ां न दित्तां, ते अवं बिमार ते कैद थियो, ते तुस मीं सेइं मिलने न आए।"

44 तैखन तैना लोक भी ज़ोले, "हे प्रभु असेईं कताली तू नियन्नो या ते ट्लिशोरो या परदेशी ते नग्गो या बिमार या कैद लाव ते असेईं तेरी सेवा न की?" 45 तैखन अवं अपने बांए पासेरे लोकन जुवाब देलो, "अवं तुसन सेइं सच़ ज़ोताईं कि ज़ैखन तुसेईं मेरे इन निकड़े करां निकड़े लोकन पुड़ ज़ैना मीं पुड़ विश्वास केरतन एक्‍की सेइं भी एरो ज़ेरो बर्ताव कियो त एन बुझ़ा कि एन मीएं सेइं कियूं। 46 एल्हेरेलेइ एन लोकन हमेशारे लेई सज़ाह भोल्ही, पन धर्मी लोकन हमेशारी ज़िन्दगी मैल्हेली।"