1 तैखन चेले यीशु कां आए ते पुछ़ने लग्गे, "सुर्गेरे राज़्ज़े मां सेब्भन करां बड्डो कौने?" 2 तैनी अक निकड़ो बच्‍चो एप्पू कां कुजव, ते मझ़ाटे खड़ो कियो। 3 ते ज़ोने लगो, "अवं तुसन सेइं सच़ ज़ोताईं, कि तुस अपनो आप बेदलतां निकड़े बच्‍चेरो ज़ेरे न बनथ, त तुस सुर्गेरे राज़्ज़े मां कधी दाखल न भोल्हे। 4 ज़ै कोई अपनो आप इस बच्‍चेरो ज़ेरो निकड़ो बनालो, त तै सुर्गेरे राज़्ज़े मां बड्डो भोल्हो। 5 ते ज़ै कोई एरे ज़ेरे निकड़े बच्‍चे मेरे नंव्वे सेइं कबूल केरते, त तै मीं कबूल केरते।"

6 "ज़ै कोई इन निकड़न मरां ज़ैना मीं पुड़ विश्वास केरतन एक्‍केरे लेई ठोकर बने, त तैसेरेलेइ एन्ने रोड़ू आए कि बडे ढ्लाटेरो ढ्लेइटोल तैसेरे गल्‍ले उन्ढो ढंढेइतां डुग्घे समुन्दरे मां डोबतां छ़डोरो लोड़ते। 7 ठोकरां केरि वजाई सेइं दुनियाई पुड़ अफ़सोस! ठोकरां लेग्गनी त ज़रुरन पन, अफ़सोस तैस मैन्हु पुड़ ज़ेसेरी वजाई सेइं ठोकर लग्गतीए। 8 अगर तेरो हथ या तेरो पव तेरे लेई ठोकरारो ज़िरियो बनते, त तू तैस केटतां छ़ड, किजोकि तेरू टोन्टू या कानू बेनतां ज़िन्दगी मां दाखल भोनू रोड़ूए, ते तेरे दूईये हथ पव सथे भोने सेइं अगर तू हमेशारी अग्गी मां गास त तैल्‍ला केरतां तू टोन्टो या कानो बेनतां रोड़ोस। 9 अगर तेरी अछ़ तेरे लेई ठोकर्री वजा बनती, त तू तैस केढतां शैरी छ़ड, कानू भोइतां ज़िन्दगी मां दाखल भोनू तेरे लेई रोड़ूए, कि दूईये एछ़्छ़ी भोने सेइं तू नरकेरी अग्गी मां गास त तैल्‍ला रोड़ोस।"

10 "हेरा इन निक्‍के चेलन मरां तुस केन्ची घटिया न बुझ़ा, अवं तुसन सेइं ज़ोताईं कि तैन केरे स्वर्गदूत हर वक्त सुर्गे मां मेरे बाजी केरे हज़ूरी मां रातन। 11 (किजोकि मैन्हेरू मट्ठू यानी अवं हेरोरे लोकन बच़ाने एवरोईं।) 12 तुश्शो खियाल कुने? कि केसकोई कां 100 भैड्डां भोन, ते तैस मरां अक हेरोए, त कुन तै नड़ेनुवें भैड्डां ज़ैड़ी खतरो न भोए तैड़ी छ़ेडतां, तैस हेरोरि न तोपेलो? 13 ते अगर एरू भोए, तैस तै मैल्हे, त अवं तुसन सेइं सच़ ज़ोताईं कि तै तैना नड़ेनुवें केरे लेई एत्री खुशी न मनालो, ते तैस एक्‍की भैडारे लेई जादे खुशी बनालो। 14 एन्च़रे तुश्शो बाजी ज़ै सुर्गे मांए, तै एन न चाए कि एन निक्‍कन मरां भी कोई नाश न भोए।"

15 "अगर कोई मीं पुड़ विश्वास केरनेबालो ढ्ला तीं सेइं बुराई केरते, त तू अकैल्‍ले मां तैस समझ़ा, अगर तै तेरी गल शुने, त तीं तै वापस परमेशरे कां आनो। 16 अगर तै तेरी गल न शुने, त तू एप्पू सेइं साथी अक या दूई मैन्हु नेइयां, किजोकि मूसेरे कानूनेरे मुताबिक हर शिकैइतरी मां दूई या ट्लाई मैन्हु गवाह भोतन। 17 अगर तै तैन केरि भी न शुने, त तू कलीसियारे लोकन सेइं ज़ो, अगर तै कलीसियारे लोकां केरि भी न शुने, त तू तैस सेइं एरो बर्ताव केर ज़ेन्च़रां तै गैर कौमरो भोए या चुंगी घिन्ने बालो भोए।"

18 "अवं तुसन सेइं सच़ ज़ोताईं, ज़ैन किछ तुस ज़मीनी पुड़ बन्धेले त समझ़ा कि सुर्गे पुड़ बन्धोलू, ते ज़ैन किछ तुस ज़मीनी पुड़ खोल्‍लेले त तैन सुर्गे मां खुल्‍लेलू। 19 फिरी अवं तुसन सेइं सच़ ज़ोताईं, कि अगर तुसन मरां दूई ज़ने धेरती पुड़ अक मन भोइतां कोन्ची मसलेरे हल कढनेरे लेई बाजी परमेशरे करां ज़ै सुर्गे मां आए मद्दत मघन, त तै तैन केरि मद्दत ज़रूर केरेलो। 20 किजोकि ज़ैड़ी दूई या ट्लाई मैन्हु, मेरे नव्वें सेइं परमेशरे करां मद्दत मगनेरे लेई अकोट्ठे भोतन, अवं तैड़ी तैन केरि मद्दत केरनेरे लेई तैन मां भोताईं।"

21 तैखन पतरसे यीशु कां एइतां पुछ़ू, "प्रभु अगर कोई तीं पुड़ विश्वास केरनेबालो, मीं सेइं बुराई केरतो राए, त अवं केत्रे बार तैस माफ़ केरि? कुन सत बार?" 22 यीशुए जुवाब दित्तो, "अवं तीं सेइं इन न ज़ोईं सत बार, बल्के सत्तेरे सत्तर बार माफ़ करां (यानी लगातार माफ़ केरतू रानू)। 23 बस्सा अवं तुसन सेइं इन ज़ोताईं, सुर्गेरू राज़ तैस राज़ेरू ज़ेरू आए, ज़ैनी सोचू कि अवं अपने नौकरन करां हिसाब घिन्नी। 24 ज़ैखन तै हिसाब घिन्ने लगो, त अक मैन्हु तैस कां हाज़र कियो, ज़ै दश हज़ार सोन्नेरे सिक्‍कां केरे तोड़ां* केरो कर्ज़दार थियो। 25 तैस कां कर्ज़ो मुकाने जो किछ न थियूं, राज़े हुक्म दित्तो, एसेरे बाल बच्‍चे ते कुआन्श ते ज़ैन किछ भी आए सब बेच़तां कर्ज़ो उसुल केरा। 26 पन तै नौकर ज़ोवले हथ केरतां मालिके कां मिन्नत केरतां ज़ोने लगो, ‘मीं किछ मौको दे, ते अवं तेरो सारो कर्ज़ो मुकालो।’ 27 मालिके तैस नौकरे पुड़ बड़ो तरस अव, ते तैनी तै छ़ेडी दित्तो ते तैसेरो कर्ज़ो भी माफ़ कियो।"

28 "पन ज़ैखन तै नौकर तैट्ठां च़लो जेव, त तैस अक एरो नौकर मैल्हो, ज़ै तैसेरो साथी थियो, ते तैस तैनी 100 दीनार* दित्तोरे थिये, तैनी तै गलेरां ट्लाव ते ज़ोने लगो, ‘मेरो कर्ज़ो कढ।’ 29 तैसेरो साथी नौकर तैस्से कां मिन्नत केरने लगो, मीं किछ मौको दे ते अवं तेरो सारो कर्ज़ो मुकालो। 30 पन तैनी तैसेरी अक गल भी न शुनी, ते तैनी तै ढेपतां छ़डो कि ज़ांतगर कर्ज़ो न देस तांतगर ढप्पोरो रा। 31 ज़ैखन होरि नौकरेईं एन शुनू, त तैना बड़े परेशान भोए, ते मालिके कां गेइतां सारो हाल शुनाव। 32 तैखन मालिके तै अपने नौकर कुजेइतां ज़ोवं, ‘ओ बेइमान नौकरा मीं तेरो सारो कर्ज़ो माफ़ कियो, किजोकि तीं मीं कां छंदे कियोरे थिये। 33 कुन तेरे लेई ज़रूरी न थियूं, कि ज़ेन्च़रे मीं तीं पुड़ दया केरतां तेरो कर्ज़ो माफ़ कियो, तेन्च़रे तू भी अपने सैथन पुड़ दया केरतां तैन केरो कर्ज़ो माफ़ केरेथो?’ 34 मालिके सरक आई, ते तैनी तै नौकर सज़ाह देनेबालां केरे हवाले कियो, कि ज़ांतगर मेरो सारो कर्ज़ो न दे तांतगर ढप्पोरो भोए।

35 "एन्च़रे अगर तुसन मरां हर कोई, तैस मैन्हु ज़ै मीं पुड़ विश्वास केरते दिले सेइं माफ़ न केरे त मेरो सुर्गेरे बाजी यानी परमेशर भी तुसन सेइं एन्च़रे पेश एज्जेलो।"