1 यीशु फिरी मिसाल देइतां ज़ोने लगो। 2 "सुर्गेरू राज़ एक्‍की राज़ेरू ज़ेरूए, ज़ैनी अपने मट्ठेरे ड्लाह बनाव। 3 ते अपने नौकर भेज़े कि तैना लोकन ज़ैन जेई ड्लाहेरी धाम बनोरी थी, तैन कुजान पन तैना न आए। 4 तैखन तैनी अपने नौकर एन ज़ोइतां भेज़े, कि ज़ैन जेई ड्लाहेरी धाम बनेवरीए, तैन ज़ोथ, रोट्टी बनोरीए ते मीं बडे-बडे जानबर कट्टोरन, ते सब किछ तियार भोरूए, ते ड्लाहेरी धामी मां शामल भोथ। 5 पन तैनेईं ध्यान न दित्तू ते कोई परवाह न की, कोई अपने ऊडारे मां च़लो जेव, ते कोई अपने कारोबारे मां लगो ते कोई कोरहां च़लो जेव। 6 किछेईं तैसेरे नौकर ट्लेइतां तैन तैना बेइज़्ज़त किये, ते जानां भी मैरी छ़ड्डे। 7 ज़ैखन राज़े एन शुनू त राज़े बड़ी सरक आई, ते तैनी अपनि फौज भेज़तां तैना कातली मैरी छ़ड्डे ते तैन केरां नगरां फुक्‍कां। 8 तैखन तैनी अपने नौकरन सेइं ज़ोवं, ड्लाहेरी धाम तियार आए, पन ज़ैन कुजेवरे थिये तैन एस काबल नईं। 9 एल्हेरेलेइ तुस हर पासे गाथ ते ज़ेत्रे तुसन मैलतन, तैना सब इरां कुजाथ। 10 तैखन तैना नौकर च़ले जे ते हर पासे गेइतां ज़ेत्रे खरे बुरे तैन मैल्हे, सब अकोट्ठे ड्लाहे मां आने ते मेहमानेइं सेइं घर भेरतां भोवं।

11 "ते राज़ो मेहमान सेइं मिलने अन्तर अव, त तैसेरी नज़र एक्‍की मैन्हु पुड़ पेई ज़ै ड्लाहे मां ड्लेरां लिगड़ां लेइतां न थियो एवरो।" 12 राज़े तैस पुछ़ू, हे दोस्त, तू ड्लाहेरे लिगड़न मां की नईं एवरो? पन तैने किछ न ज़ोवं। 13 "एस गल्‍ली पुड़ राज़े अपने सेवकन सेइं ज़ोवं, ‘एसेरे हथ पव बेन्धतां बेइर आंधरे मां छ़ड्डा ज़ैड़ी ऐह लेरां देंतो राए, ते दंत च़ापतो राए।’ 14 किजोकि परमेशरे हमेशारे ज़िन्दगरे लेई त बड़े कुजोरेन पन च़ुनोरे थोड़ेन।"

15 तैखन फरीसी लोक तैट्ठां च़ले जे, ते एप्पू मांमेइं मुशोरो केरने लग्गे एस केन्च़रे गल्‍लन मां फसाम। 16 एल्हेरेलेइ तैनेईं अपने किछ चेले हेरोदेस राज़ेरे लोकन सेइं साथी यीशु कां भेज़े, ते तैनेईं ज़ोवं, "हे गुरू अस ज़ानतम कि तू सच़्चोस, ते परमेशरेरी बत सच़्च़ैई सेइं शिखालतस ते कोन्चेरी परवाह न केरस किजोकि तू मैन्हु केरू तुत्तर हेरतां गल्‍लां न केरस। 17 एल्हेरेलेइ असन ज़ो, तू कुन सोचतस? महाराज़े जो चुंगी देनी जाइज़े की नईं?" 18 यीशु तैन केरि चाल सेमझ़तां ज़ोवं, "हे पाखंडी लोकव मीं किजो अज़मातथ? 19 ज़ै सिक्‍को चुंगरे लेई देतथ तैस मीं हिराथ, तैनेईं अक दीनार तैस कां आनो। 20 यीशुए तैन पुछ़ू, इस पुड़ केसेरी शकल ते केसेरू नवं लिखेरूए?" 21 तैनेईं जुवाब दित्तो महाज़ेरू, तैखन तैनी तैन सेइं ज़ोवं, "ज़ैन महाराज़ेरूए तैन महारज़े जो देथ, ते ज़ैन परमेशरेरू ए तैन परमेशरे जो देथ।" 22 तैना एन शुन्तां हैरान रेइजे, ते तैस तैड़ी छ़ेडतां च़ले जे।

23 तैस्से दिहैड़ी किछ सदूकी लोक ज़ैना ज़ोते थिये कि मरनेरां बाद कोई ज़ींतो नईं भोनो, तैनेईं तैस पुछ़ू, 24 "हे गुरू मूसे ज़ोवरूए कि, ‘अगर कोई मैन्हु बेऔलाद मेरि गाए, त तैसेरो ढ्ला तैसेरी कुआन्शी सेइं ड्लाह बनाए ताके अपने ढ्लाएरे लेई औलाद पैदा केरे।’ 25 इश्शे इड़ी सत ढ्ला थिये, पेइलो ड्लाह बनेइतां मेरि जेव, तैस औलाद न थी तैनी अपनि कुआन्श अपने ढ्लाएरे लेई छ़ेड्डी दित्ती। 26 ऐह वजाए तैसेरे दूइयोवं ते ट्लेइयोवं भी एन्च़रे कियूं बल्के सत्ते ढ्लान सेइं एन्ने भोतू रावं। 27 आखर्कार तै कुआन्श भी मेरि जेई। 28 हुनी ज़ो तै कुआन्श मुड़दन मरां ज़ींते भोनेरे दिहाड़े तैन सत्ते ढ्लान मरां केसेरी कुआन्श भोल्ही? किजोकि तै सेब्भी केरि कुआन्श बनोरी थी।" 29 यीशुए तैन जुवाब दित्तो, "तुस न पवित्रशास्त्र ते न परमेशरेरी शक्ति ज़ानथ, ते एस्से वजाई सेइं तुस टेपलोरेथ। 30 किजोकि ज़ींते भोनेरां पत्ती तैना ड्लाह न बनाले, पन तैना सुर्गे मां परमेशरेरे स्वर्गदूतां केरे ज़ेरे भोनेन।"

31 "पन मुड़दन मरां ज़ींते भोनेरे बारे मां कुन तुसेईं इन वचन नईं पढ़ेरू ज़ैन परमेशर तुसन सेइं ज़ोवं, 32 ‘अवं अब्राहमेरो परमेशर, ते इसहाकेरो परमेशर ते याकूबेरो परमेशर आई?’ तै मुवोरां केरो नईं बल्के ज़ींतां केरो परमेशरे।" 33 लोक तैसेरी ऐह शिक्षा शुन्तां हैरान रेइजे।

34 ज़ैखन फरीसी लोकेईं एन शुनू कि तैनी सदूकी केरू आशी बंद कियोरूए, त तैना तैस कां सब अकोट्ठे भोए। 35 तैन मरां अक शास्त्री तैस अज़मानेरे लेई यीशुए पुछ़ू। 36 "हे गुरू, मूसेरे कानूने मां सेब्भन करां बड्डो हुक्म कौ आए?" 37 तैनी ज़ोवं, "तू परमेशरे अपने प्रभु सेइं अपने सारे मने सेइं ते अपनि सैरी जानी सेइं ते अपनि सैरी अक्ली सेइं प्यार केरा। 38 सेब्भन करां बड्डो ते खास हुक्म ईए। 39 एसेरो ज़ेरो ईए, ‘अपने पड़ोसी सेइं अपने बराबर प्यार केर।’ 40 इन्ना दूई हुक्म मूसेरे कानून ते नेबी केरो आधारे।"

41 ज़ैखन फरीसी लोक भी तैड़ी जम्हां भोइजेइ, त यीशुए तैन पुछ़ू। 42 "मसीहेरे बारे मां तुश्शो कुन खियाले, कि तैन केसेरू मट्ठूए?" तैनेईं जुवाब दित्तो, "दाऊदेरू मट्ठू।" 43 यीशुए तैन सेइं ज़ोवं, "फिरी दाऊद आत्माई मां तैस जो प्रभु किजो ज़ोते?" 44 "प्रभुए मेरे प्रभु सेइं ज़ोवं, मेरे देइने पासे बिश ज़ांतगर अवं तेरे दुश्मन तेरे पव्वन हैठ न ढ्लेन्च़ेईं। 45 बस्सा, अगर दाऊद तैस जो प्रभु ज़ोते त तैन तैसेरू मट्ठू केन्च़रे सेइं भोइ सकते?" 46 तैन मरां केन्चे भी एक्‍की गल्‍लरो जुवाब न देइ बटो। पन तैस वक्तेरे बाद फिरी कोन्ची तैस पुछ़नेरी हिम्मत न भोइ।