1 "खबरदार, तुस अपने रोड़ां कम्मां सिर्फ लोकन हिरानेरे लेई न केरा, नईं त तुश्शो सुर्गेरो बाजी तुसन कोई इनाम न देलो। 2 एल्हेरेलेइ ज़ैखन तू गरीब मैन्हु दान देस, त तू ढुंढूरो न बज़ेइयां, ज़ेन्च़रे पाखंडी लोक प्राथना घरन मां ते गेलन मां केरतन, ताके लोक तैन केरि तारीफ़ केरन। अवं तुसन सेइं सच़ ज़ोताईं कि ज़ैन इनाम तैन मैल्हनू थियूं, तैन सिर्फ इन्ने, कि लोकेईं तैन केरि तारीफ़ की (परमेशरे करां तैन्न कोई इनाम न मैल्हेलो)। 3 पन ज़ैखन तू गरीब मैन्हु दान देस, त केन्ची पतो न लोड़े लग्गोरो कि तीं कुन दित्तू। 4 ताके तेरू दान छ़पोरू भोए, तैखन तेरो बाजी ज़ै छ़ेपतां तकते, तीं इनाम देलो।"

5 "ज़ैखन तू प्राथना केरस त पाखंडी लोकां केरो ज़ेरो न बेना, ज़ैना प्राथना घरन मां ते सड़कां केरे मोड़न पुड़ खेड़ोइतां प्राथना केरनि सुखातन, ताके लोक तैन तक्‍कन ते तैन केरि तारीफ़ केरन। अवं तुसन सेइं सच़ ज़ोताईं कि ज़ैन इनाम तैन्न मैल्होरू लोड़तू थियूं, तैन सिर्फ इन्ने, कि लोकेईं तैन केरि तारीफ़ की (परमेशरे करां तैन्न कोई इनाम न मैल्हेलू)। 6 पन ज़ैखन तू प्राथना केरस त अकैल्‍लो अपने कमरेरो अन्तर गा, ते दार बंद केरतां अपने परमेशरे कां ज़ै लेइहोए न तैस कां प्राथना केरा। तैखन तुश्शो बाजी परमेशर ज़ै लेइहोए न, ज़ै हर वक्त तीं तकतो रहते तै तीं इनाम देलो। 7 प्राथना केरते बार, गैर कौमां केरू ज़ेरू बकबक न केरां, किजोकि तैना समझ़तन कि तैन केरे बकबक केरने सेइं तैन केरि प्राथना शुनी गाली। 8 तैन केरे ज़ेरे न बना, किजोकि तुश्शो बाजी तुश्शे मगने करां पेइले तुश्शी ज़रूरतां ज़ानते।"

9 "एल्हेरेलेइ तुस एन्च़रे प्राथना केरा,

हे इश्शे बाजी, तू ज़ै सुर्गे मां आस, लोक तेरी आदर केरन किजोकि तू पवित्र परमेशर आस।

10 तू सेब्भी लोकन पुड़ ते चीज़न पुड़ राज़ केरस। तेरी मर्ज़ी ज़ेन्च़रे सुर्गे मां पूरी भोचे, इस धेरती पुड़ भी भोए।

11 इश्शी रोज़ेरी रोट्टी अज़ असन दे।

12 ते ज़ेन्च़रे अस ज़ैना इश्शे खलाफ बुराई केरतन, तैन माफ़ केरतम, तेन्च़रे तू भी इश्शी बुरैई माफ़ केर।

13 अज़मैइशरे ज़िरिये असन पाप केरने न दे, पन बुरैई यानी शैताने करां बच़ेइयां, (किजोकि राज़, शक्ति ते महिमा हमेशा तेरी भोती राए। आमीन।)"

14 "एल्हेरेलेइ अगर तुस लोकां केरे पाप माफ़ केरेले, त तुश्शो सुर्गेरो बाजी भी तुश्शे पाप माफ़ केरेलो। 15 ते अगर तुस लोकां केरे पाप माफ़ न केरेले, त तुश्शो सुर्गेरो बाजी भी तुश्शे पाप माफ़ न केरेलो।"

16 "ज़ैखन तुस बरत रखत, त पाखंडी लोकां केरू ज़ेरू अपनु तुत्तर न बगैड़थ। तैना अपनु तुत्तर बिगाड़तन, ताके लोकन पतो लग्गे कि एनेईं अज़ बरत रखोरूए ते तैन केरि तारीफ़ केरन। अवं तुसन सेइं सच़ ज़ोताईं कि ज़ैन इनाम तैन मैल्हनू थियूं तैन मैल्ही जेव। 17 बल्के ज़ैखन तू बरत रख्खस त अपनु तुत्तर धोइयां ते दोग्गे तेल मेल्‍लां। 18 ताके लोक नईं, पन तेरो सुर्गेरो बाजी, ज़ै लेइहोए न तै लाहे कि तीं बरत रखोरूए तै तीं इनाम देलो।"

19 "एप्पू जेई धरती पुड़ दौलत अकोट्ठी न केरा, ज़ैड़ी कीड़े खातन ते मौरच़ो लेगतां नाश केरते, ते च़ोर तुश्शू घर ट्लोड़तां च़ोरी केरतन। 20 बल्के रोड़ू केरतां अपने लेई सुर्गे मां दौलत अकोट्ठी केरा ज़ैड़ी न कीड़ो लग्गे, ते न मोरच़ो लग्गे ते न च़ोर च़ोरी केरेले। 21 किजोकि ज़ैड़ी तेरी दौलत भोल्ही, तैड़ी तेरो दिल भी लग्गेलो।"

22 "अछ़ जानेरे लेई दीयेरी ज़ेरि आए, एल्हेरेलेइ अगर तेरी अछ़ रोड़ी साफ आए, त तेरी सारी जान लौ भोल्ही। 23 अगर तेरी अछ़ खराब आए, त सारी जानी मां आंधरू भोल्हु। बस अगर ज़ै लौ तीं मां आए तै आंधरू बेनि गाए, त तैन केत्रू आंधरू भोल्हु!"

24 "कोई मैन्हु दूई मालिकां केरि सेवा एक्‍की वक्ते मां न केरि सके। न त एक्‍की सेइं दुश्मनी केरेलो ते होरि सेइं प्यार केरेलो, या एक्‍केरो बेनतां रालो त होरि न सुखालो। तुस परमेशरेरी ते दौलतरी, दूईयां केरि सेवा न केरि सकतथ। 25 एल्हेरेलेइ अवं तुसन सेइं ज़ोताईं, कि तुस अपने ज़िन्दगरी ज़रूरतां केरे लेई फिक्र न केरा, कि तुस कुन खाले या कुन पीले, ते न अपने जानरी कि कुन लामेले। कुन प्राण रोट्टी करां ते जान लिगड़े करां बेद्धतां नईं!"

26 "अम्बरेरे च़ुड़ोलन हेरा! तैना न किछ बेन, ते न किछ कट्टन, ते न कोठारन मां अकोट्ठे केरतां रखन, फिरी भी तुश्शो सुर्गेरो बाजी तैन खाने जो देते ते तैन केरि हेरगेश केरते। कुन तुश्शी कदर तैन करां जादे नईं? 27 तुसन मां एरो कौन आए, ज़ै फिक्र केरतां अपनि उमर अक घड़ी भी बधेईं सकते?"

28 "ते लिगड़ेरे लेई किजो फिक्र केरतथ? जंगले मां सोसनेरां फूड़ू हेरा कि तैना केन्च़रे बेडोतन, न तैना मेहनत केरन, ते न तैना लिगड़ां बनान। 29 फिर भी अवं तुसन सेइं ज़ोताईं कि राज़ो सुलैमाने भी अपने सारे धन दौलतरे बावजूद भी तैन केरां ज़ेरां लिगड़ां न लां। 30 एल्हेरेलेइ ज़ैखन परमेशर मैइदानेरो घास, ज़ै अज़ आए ते कालां लौवंने मां फुकनोए, एरी खूबसूरती देते, त हे घट विश्वासे बाले लोकव, कुन तै तुसन लिगड़ न देलो? 31 एल्हेरेलेइ तुस फिक्र केरतां एन न ज़ोइयथ, कि ‘कुन खामेले, या कुन पीमेले, या कुन लामेले?’ 32 किजोकि गैर कौमां एन गल्‍लां केरि फिक्री मां रेइचन। ते तुश्शो सुर्गेरो बाजी ज़ानते, कि तुसन कोनां-कोनां चीज़ां केरि ज़रूरत आए। एल्हेरेलेइ तुस कोन्ची चीज़री फिक्र न केरा। 33 पन पेइले तुस अपने आपे परमेशरेरे राज़्ज़ेरे लेई अर्पण केरा, ते तैन कम केरा ज़ैन परमेशरेरी नज़री मां रोड़ू भोते, त इना सैरी चीज़ां भी तुसन मैल्ही गैली। 34 एल्हेरेलेइ कालेरे बारे मां फिक्र न केरथ, किजोकि कालेरी दिहाड़ी अपने लेई एप्पू फिक्र आनेली। अज़्ज़ेरे लेई अज़्ज़ेरो दुख सुद्धोए।"