Preocupação

25 "तैही बोला हुंह तम्हां लै इहअ कि आपणीं ज़िन्दगी लै इहअ फिकर निं करी कि किज़ै खाणअ किज़ै पिणअ? नां आपणीं देही लै फिकर करी कि हाम्हां किज़ै बान्हणअ? ज़िन्दगी आसा रोटी का अर देही आसा झिकल़ै का खास्सी किम्मती।

34 "ऐबै काल्‍ला धैल़ीओ फिकर निं तम्हैं करी, किल्हैकि काल्‍ला एछणैं आल़ी धैल़ी हेरनअ आपणअ फिकर आप्पै करी अर आझ़ा लै आसा आझ़ो दुख ई बतेर्हअ।"

22 "ज़ुंण बेज़अ झ़ाकल़ै पल़अ सह आसा तिन्‍नां मणछे बारै ज़ुंण बैण ता शूणां, पर एऊ संसारे फिकर अर धन-माये धोखै करै पाआ तेऊ बैणा बिस्सरी। तिंयां निं तिहअ करदै ज़िहअ परमेशर च़ाहा कि तिंयां करे।

छ़ल़-कपट करने खलाफ चतैनगी

1 तेतरी हुऐ तिधी हज़ारो लोग कठा एतरै कि लोग लागै एकी दुजे खूरा प्रैंदै गंईं लाई भाल़ै। ईशू बोलअ आपणैं च़ेल्‍लै लै इहअ, "फरीसी मणछे कपट रुपी सज़ेल़ै का रहै चतैन। 2 इहअ बगत बी एछणअ ज़ेभै ढोपी डाही दी हर च़ीज़ शुझणीं सोभी का अर गुप्त च़िज़ो लागणअ सोभी का थोघ। 3 ज़ुंण तम्हैं न्हैरै दी आसा बोलअ द, सह शुझणअ प्रैश्शै दी, अर ज़ुंण तम्हैं पांडा भितरी काना पिछ़ू आसा बोलअ द तेतो हणअ छ़ाप्परा का प्रच़ार।

कहा का डरनअ

4 "पर हुंह बोला तम्हां का ज़ुंण मेरै साथी आसा कि तम्हैं निं तिन्‍नां का डरी आथी ज़ुंण थारी देही च़ाहा मारनअ। तिंयां निं होर किछ़ करी सकदै। 5 हुंह खोज़ूं तम्हां का कहा का लागा डरनअ? तेऊ परमेशरा का डरै ज़हा तम्हां मारी करै जम्परी पाणैओ हक आसा। हाँ, सह ई आसा ज़सरी डरा हेठै लागा रहणअ। 6 दूई चाम्बे ढब्बै करै कै पांज़ च़ेल्‍ली निं बिक्‍कदी? तैबी निं परमेशर तिन्‍नां मांझ़ै एकी बी बिस्सरदअ। 7 इधी तैणीं कि तेऊ आसा थारै मुंडे शराल़ बी सोभ गणै दै। तैही बोला हुंह डरी निं आथी, तम्हैं आसा तिन्‍नां च़ेल्‍ली का खास्सै किम्मती।

ईशू मनणअ या नांईं मनणअ

8 "हुंह बोला तम्हां का कि ज़ुंण मुंह मणछे पूता होरी मणछा सम्हनै मने, सह मनणअ मुंह आपणैं बाब परमेशरे स्वर्ग दूते सम्हनै। 9 पर ज़ुंण मेरै बारै होरी मणछा सम्हनै हुधिए, तेऊ लै हुधणअ मुंह बी स्वर्गै आपणैं बाब परमेशर अर स्वर्ग दूता सम्हनै।

10 "ज़ुंण मुंह मणछे पूतो बरोधी हई किज़ै बोले, तेऊओ ज़ुल्म सका हई माफ, पर ज़ुंण पबित्र आत्में निंदा करे तेऊए ज़ुल्म निं कधि माफ हणैं।

11 "ज़ेभै लोग तम्हां सभागृहा, राज़पाल अर सैणैं सम्हनै निंए, तेभै निं फिकर करी कि हाम्हां किहअ करै अर किज़ै बोल़णअ, या किज़ै ज़बाब दैणअ। 12 किल्हैकि पबित्र आत्मां खोज़णअ तम्हां का तेभी कि तम्हां किज़ै बोल़णअ।"

एकी सेठ ऐडै मणछे कथ्या

13 तेखअ बोलअ एकी मणछै लोगे झाल़ै मांझ़ा का ईशू लै, "हे गूरू, मेरै भाई लै बोल इहअ कि बाबे ज़ैदात दै मुल्है बी बांड।" 14 ईशू बोलअ तेऊ लै, "हे मणछा, हुंह कुंणी आसा डाहअ द थारै पांच़ अर बांडी करदअ?"* 15 ईशू बोलअ तेखअ तिन्‍नां लै, "चतैन रहा, अर सोभी रंगे मांण करनै का रहा आप्पू बच़दै। किल्हैकि कोहिए ज़िन्दगी निं तेऊए खास्सी ज़ैदात करै बच़दी।"

16 तेखअ खोज़ी ईशू तिन्‍नां का एक होर कथ्या, "एकी सेठ मणछे हुई ज़िम्मीं दी खास्सी पज़ैआ। 17 तेखअ लागअ सह आपणैं मन्‍नैं आप्पू लै बोल्दअ, ‘हुंह किज़ै करूं? मुखा निं एतरी फसला डाहणां लै ज़ैगा आथी।’ 18 तेखअ बोलअ तेऊ ‘मुंह करनअ इहअ कि मुंह बणाणैं होछ़ै मणशू खोल्ही करै बधिया बडै अर तेथ डाहणअ मुंह आपणअ नाज़। 19 तेखअ दैणीं मुंह आपणैं शाह लै एही दसल्‍ली कि ताखा आसा आजू खास्सी साला लै धन-माया अर ज़ैदात डाही दी। मुंह करनअ ऐबै बैह संघा हणीं मुंह मौज़।’ 20 पर परमेशरै बोलअ तेऊ लै इहअ, ‘आरा ऐडै मणछा, तूह मरनअ ऐहा ई राची अर ज़ुंण बी तंऐं कठा आसा किअ द, सह कसरअ हणअ?’ 21 इहअ ई ऐडअ आसा सह मणछ बी ज़ुंण आप्पू लै धन-माया कठा करा, पर परमेशर निं तेऊ सेठ मंदअ।"

परमेशरा दी डाहा भरोस्सअ

22 तेखअ बोलअ ईशू आपणैं च़ेल्‍लै लै, "तैही बोला हुंह तम्हां लै इहअ कि आपणीं ज़िन्दगी लै इहअ फिकर निं करी कि हाम्हां किज़ै खाणअ, किज़ै पिणअ नां आपणीं देही लै फिकर करी कि किज़ै बान्हणअ? 23 किल्हैकि ज़िन्दगी आसा रोटी का अर देही आसा झिकल़ै का खास्सी किम्मती। 24 * सरगै डैऊंदै काऊड़ै भाल़ा! ईंयां नां बऊंदै अर नां लऊंदै नां तिन्‍नें खेच खहल़ नां भढार हंदै। तैबी धाचा तिन्‍नां परमेशर आप्पै। तम्हैं आसा इना का खास्सै किम्मती।

25 "तम्हां मांझ़ै इहअ कुंण आसा ज़ुंण फिकर करी आपणीं अमर धख ज़ेही बी सका लाम्मी करी? 26 तैही बोला हुंह तम्हां लै, ज़ै तम्हैं फिकर करी एक होछ़अ ज़िहअ काम बी निं करी सकदै, होरी गल्‍ला लै किल्है करा फिकर?

27 "बणैं लागै दै होछ़ै-होछ़ै फूला लै दैआ धैन कि तिंयां किहअ करै बझ़ा! तिंयां नां मैन्थ करदै अर नां तिंयां कातदै, तैबी बोला हुंह तम्हां लै कि सुलैमाने राज़ै बी निं आपणीं ज़िन्दगीए सारै राज़-पाठा दी तिन्‍नां मांझ़ै कहा एकी बराबर झिकल़ै बान्हैं। 28 ज़ै परमेशर घैहणींए घाहा लै, ज़ुंण आझ़ आसा अर काल्‍ला दहणअ सह आगी जैंदरी, तिन्‍नां का बी इहै झिकल़ै बन्हैऊंआं। ओ बैहमी विश्वासीओ, तम्हां लै कै सह झिकल़ै दैई निं सकदअ? 29 तम्हैं ऐहा गल्‍ला लोल़ै निं रहा लागी कि किज़ै खाणअ अर किज़ै पिणअ? नां बैहम करा। 30 किल्हैकि संसारे ज़ाती रहा इना गल्‍ला लोल़ी लागी। पर थारै बाब परमेशरा का आसा थोघ कि तम्हां किज़ू गल्‍ले ज़रुरत आसा। 31 पर तम्हैं करा आपणैं बाब परमेशरे धर्म अर राज़े लोल़-तोप अर ईंयां सोभ गल्‍ला जाणीं तम्हां भेटी।

स्वर्गो धन

32 "तम्हैं आसा भेडे होछ़ै छ़ुंडा ज़िहै ज़हा हुंह सभाल़ा, तम्हैं निं किछ़ी गल्‍ले फिकर करी। किल्हैकि थारै बाब परमेशरा लागअ इहअ भलअ कि तेऊ दैणअ तम्हां लै राज़। 33 आपणीं ज़ैदात करा बेच़ी दान अर आप्पू लै बणाआं इहै थैल्‍लू ज़ुंण कधि पराणैं निं हंदै। मतलब स्वर्गै करा आप्पू लै धन कठा ज़ुंण तिधी सदा रहणअ। नां तेता नेल़ च़ोर एछदअ अर नां किल़ै लागदै। 34 किल्हैकि ज़िधी थारअ धन आसा, तिधी रहणअ थारअ मन्‍न बी लागी।

बिऊंतै रहा

35 "थारी कुछी लोल़ी गाची बान्हीं रही अर थारै दीऐ लोल़ी ज़ल़दै रहै। * 36 तम्हैं रहा तिन्‍नां मणछ ज़िहै ज़ुंण आपणैं मालका न्हैल़ै रहा लागी कि बैहा का केभै एछणअ फिरी कि ज़ेभै सह दुआर टोक्‍के, तेभै खोल्हणअ तेभी तेऊ लै दुआर। 37 तिन्‍नां लै आसा बर्गत, ज़हा तिन्‍नों मालक एछी बिहुदै भाल़े। हुंह खोज़ा तम्हां का सत्त कि ज़ेभै सह तिन्‍नां रोटी खांदअ बशैल़े, तेभै करनी तेऊ आप्पै दास बणी तिन्‍नें च़ाकरी। 38 ज़ै सह राचकै दुजै पहरै या चिऊथै पहरै तिन्‍नां बिऊंतै भाल़े, तिन्‍नां लै हणअ सह खुश।

39 "पर ऐहा गल्‍ला लऐ तम्हैं समझ़ी कि, ज़ै घअरे मालका का इहअ थोघ हंदअ कि च़ोर केभै एछणअ तै रहणअ त तेऊ बिऊंतै अर आपणैं घअरै निं तेऊ च़ोरी दैणीं ती हणैं। 40 तम्हैं बी रहा हर बगत तैर। किल्हैकि ज़हा घल़ी तम्हैं सोठी बी निं सकदै, तैहा घल़ी एछणअ हुंह मणछो पूत।"

विश्वासा करनै या नांईं करनै जोगी दास

41 तेखअ बोलअ पतरासै, "हे प्रभू, ऐहा कथ्या कै तूह सिधअ हाम्हां ई लै बोला कि होरी लै बी बोला?" 42 ईशू बोलअ तेऊ लै, "इहअ भरोस्सै करनै जोगी अर समझ़कार मणछ कुंण आसा ज़सरै मालकै सह सोभी दास-दासी लै हुकम करदअ अर कामां कराऊंदअ भढारी डाहअ बणाईं कि तिन्‍नां लै रोटी-पाणीं करे दैई? 43 मालक हआ तेऊ दासा लै खुश ज़हा तेऊओ मालक इहअ ई करदै भाल़े। 44 हुंह खोज़ा तम्हां का सत्त कि तेऊ बणाणअं सह आपणीं सारी ज़ैदातो भढारी। 45 पर ज़ै सह दास इहअ सोठे कि मेरै मालक एछणा लै आसा अज़ी खास्सी बल़ैग, अर सह होरी दास-दासी च़िक्‍कदअ-मारदअ अर शूर-शराबा झुटदअ लागे, 46 तेऊ दासो मालक एछणअ तैहा धैल़ी, ज़ेभै सह न्हैल़अ बी निं होए लागअ द। ज़ेभै तेऊओ मालक एछणअ तेऊ का निं थोघ बी लागणअ। तेऊ भेटणीं तेते सज़ा तिन्‍नां ज़ेही ज़ुंण विश्वास घात करा।

47 "सह दास ज़हा आपणैं मालके बारै थोघ त पर तैर निं रहअ अर नां तेऊ तिहअ किअ ज़िहअ मालकै तेऊ लै बोलअ त! तेऊ भेटणीं बेघै बूरी मार। 48 पर ज़हा दासा का इहअ थोघ निं होए कि तेऊओ मालक किज़ै काम कराऊंणअ च़ाहा अर नज़ाणै दी कोई गलती करे, तेऊ भेटणीं थोल़ी मार। तैही ज़हा लै खास्सअ आसा दैनअ द, तेऊ का मांगणअ खास्सअ ई अर ज़हा का खास्सअ डाहअ द आसा, तेऊ का काढणअ बी खास्सअ।

ईशूए एछणेंओ फल

49 "हुंह आसा पृथूई दी आगी चैल़दअ आअ द। हुंह होर एता सुआई किज़ै च़ाहा कि आग एभी ज़ल़े! 50 मुंह आसा आजू एक घोर दाह-दुखे डुबकी लणा लै। ज़ेभै तैणीं सह पूरअ निं हुअ तेभै तैणीं आसा मुल्है खास्सअ बोझ़। 51 तम्हैं किज़ै समझ़ा कि हुंह पृथूई दी मेल़-ज़ोल़ करदअ आसा आअ द? हुंह बोला नांईं, पर हुंह आसा मणछा एकी-दुजै का ज़ुदै करदअ आअ द। 52 किल्हैकि एभा पोर्ही हणैं एकी घअरे पांज़ ज़ण्हैं आप्पू मांझ़ै बरोधी चिई ज़ण्हैं दूई का अर दूई ज़ण्हैं चिई का।*

53 ‘बाबा करनी शोहरू संघै ज़ीद

अर शोहरू करनी बाबा संघै ज़ीद।

ईजा डाहणीं शोहरी संघै ज़ीद

अर शोहरी डाहणीं ईजा संघै ज़ीद।

शाशुई करनी नुशा संघै ज़ीद

अर नुशा डाहणीं शाशुई संघै ज़ीद।’"

प्रभू एछणेंओ नछ़ैण

54 ईशू बोलअ तिधी तिन्‍नां खास्सै झाल़्हुऐ दै लोगा बाखा फिरी, "ज़ेभै तम्हैं बादल़ पछ़मा बाखा भाल़ा, तेभै बोला तम्हैं इहअ कि पाणीं हणअ अर इहअ ई हआ बी। 55 ज़ेभै दखणा बाखा बागरी च़ला, तेभै बोला तम्हैं इहअ कि आझ़ पल़णअ चटाक धुप्पअ अर हआ बी तिहअ ई। 56 ओ कपटी मणछो, पृथूई अर सरगे बारै जाआ तम्हैं तेते लछ़ण भाल़ी समझ़ी, तै एऊ जुगो भेद किल्है निं समझ़दै?

दुशमणा संघै मेल़-ज़ोल़

57 "तम्हैं आप्पै किल्है निं फैंसलअ लंदै कि भलअ किज़ै आसा? 58 ज़ेभै तूह आपणैं दुशमणा संघै पांच़ा सेटा लै आसा च़ाल्‍लअ द, तेभै कर बाता हांढदी तेऊ संघै मेल़-ज़ोल़। इहअ निं हआ कि सह निंए ताह पांच़ा सेटा अर पांच़ दैए ताह सपाही का अर सपाही पाए ताह कैद खानै दी। 59 हुंह खोज़ा तम्हां का सत्त ज़ेभै तैणीं तूह पाई-पाई नां भरी मुक्‍के, तेभै तैणीं निं तूह तिधा का छ़ुटणअ।"

6 किछ़ू गल्‍लो फिकर निं करी, पर हर गल्‍ला लै करनी परमेशरा का प्राथणां। ज़ुंण थारी ज़रुरत आसा सह खोज़णीं परमेशरा का, अर ज़ुंण बी तेऊ तम्हां लै किअ करनअ तेऊओ शूकर। 7 तेखअ डाहणैं परमेशरे शांती ज़ुंण सोभी मणछे समझ़ा का बागै आसा थारै दिल अर थारै बच़ार मसीहा ईशू दी बच़ाऊई।✝

7 अर आपणीं सारी फिकर छ़ाडा तेऊ दी, किल्हैकि तेऊ आसा थारअ धैन-खैल।

22 हे बिधाता, हाम्हैं आसा तेरै,

हाम्हैं खोज़ा आपणीं खरी ताखा

अर तूह निं धर्मीं मणछा हारनै दैंदअ।

25 मन्‍नों फिकर करा मणछा धिठै,

पर एक भली गल्‍ला करै हआ तेऊ उझै।

19 ज़ेभै मुंह खास्सअ हैल़अ फिकर हुअ,

तेभै दैनअ तंऐं बिधाता मुल्है हैअ अर खुशी।

9 हे मालक, ताखा आसा मेरै दिले सोभी गल्‍लो थोघ,

ताखा आसा मेरी दाहे धअक शुण्हदी लागी दी।

27 "हुंह दैंऊं तम्हां लै शांती, ज़िहअ संसारे मणछ फिकर दैआ, तिहअ निं हुंह तम्हां लै दैंदअ, मुंह दैणीं तम्हां लै आपणीं शांती ताकि थारअ मन्‍नैं फिकर नां पल़े अर नां डरे।

परमेशरा सेटा पुजणें बात

1 "तम्हैं निं आपणैं मन्‍नैं हैल़अ करी, तम्हैं करा परमेशरो विश्वास, मुंह प्रैंदै बी डाहा विश्वास।

10 तम्हैं निं डरी आथी, तम्हां संघै आसा हुंह!

हुंह आसा थारअ परमेशर, तम्हां निं कोही का डरने ज़रुरत आथी!

तम्हां लै बल दैणअ मुंह अर थारी मज़त बी करनी मुंह।

तम्हैं नढैऊणैं मुंह हाथै ढाकी संघा डाहणैं बच़ाऊई।✝

11 ज़ेभै तिंयां तम्हां कैद करे अर पेशी लै खल़ै करे, तेभै निं तम्हैं फिकर करी किई हाम्हां किज़ै बोल़णअ। तैहा घल़ी परमेशर ज़िहअ तम्हां का खोज़े तेभै बोलै तिहअ। किल्हैकि तैहा घल़ी निं बोल़णैं आल़ै तम्हैं हणैं, पर तेभै बोल़णैं आल़ी हणीं पबित्र आत्मां।"

8 परमेशरो जश सका तम्हां लै सोभ गल्‍ला थारी ज़रुरती का बी खास्सअ दैई, ज़ेता करै तम्हां लै हर गल्‍ल हर बगत ज़ुंण तम्हां ज़रूरी आसा सह तम्हां सेटा रही सके अर हर भलै कामां करना लै सका तम्हां सेटा सोभ गल्‍ला हई।

3 तेखअ शूणअ मंऐं राज़गाद्दी सेटा का एक ज़ोरै इहअ बोल्दअ, "भाल़, एभा पोर्ही बस्सणअ परमेशर मणछा जैंदरी, अर तेऊ करनअ तिन्‍नां मांझ़ै बसेरअ, अर तिंयां हणैं तेऊए परज़ा अर परमेशरा रहणअ आप्पू ई तिन्‍नां संघै अर सह ई हणअ तिन्‍नों परमेशर।✝

4 "तेऊ टुशणैं तिन्‍नें आछिए आशू, अर तेखअ निं कधि मौत एछणी अर नां शोग अर नां लेरा-पकारा अर नां दाह दुख। पैहलै संसारै ज़ुंण गल्‍ला ती, तिंयां सोभै गल्‍ला हणीं खतम।"✝

20 इना गल्‍ला शूणीं उझ़ुऐ आयूबा दुखै ज़िहै शूल़ अर तेऊ धेल़ै आपणीं घेरीए झिकल़ै। तेऊ छाम्बअ आपणअ मूंड संघा रहअ दुखी उटी बाखा धरनीं पल़ी। 21 आयूब लागअ लेरा लांदी इहअ बोल्दअ,

"हुंह आसा आपणीं माए रित्तै हाथै ओदरा का नांगअ आअ द,

मरी करै बी निं मुंह आप्पू संघै किछ़ै निंणअ।

बिधाता ई आसा मुल्है दैणैं आल़अ अर

तेऊ ई निंईं तिंयां सोभै गल्‍ला बापस।

तेऊए लोल़ी सदा ज़ै-ज़ैकार हुई!"

18 किल्हैकि खास्सअ ज्ञैन बी दैआ दुख,

अर खास्सी अक्ल बी बढेरा फिकर ई।

10 मन्‍नैं निं फिकर डाहणअ, तै रहणीं थारी देही नरोगी किल्हैकि बाल़ी अमर अर ज़ुआनी निं सदा रहंदी आथी। तेखअ हआ सोभै गल्‍ला बृथा।