बिधाता दैआ कदुष्ट मणछा लै सज़ा
1 हे परमेशर बिधाता, तूह दैआ कदुष्ट मणछा लै सज़ा।
तिन्नां लै कर ऐबै आपणअ कोप प्रगट।94:1 बधा. 32:35
2 हे बिधाता, पृथूईओ नसाफ करनै आल़अ आसा तूह ई,
घमंडी मणछा लै दै तिन्नें कामें साबै तिन्नों फल!
3 हे बिधाता, ईंयां कदुष्ट मणछ
केभै तैणीं रहणैं राज्ज़ी-मौज़ी?
4 तिंयां करा शरेरी गल्ला,
इना कदुष्ट मणछा कधू तैणीं रहणअ डिंगा मारदै लागी?
5 इनै आणै लोग हारी-मारी!
ईंयां दैआ तेरी परज़ा लै दुख।
6 ईंयां करा बिधबा, छ़ुटै मुक्कै दै मणछे
अर पाखलै मणछे हत्या।
7 तिंयां बोला इहअ, "बिधाता निं हाम्हां भाल़दअ,
याकबो परमेशर निं एथ बाखा धैन बी दैंदअ।"
8 तम्हैं मेरी परज़ा केही ऐडी अर कमुर्ख हुऐ?
तम्हां केभै एछणी अक्ल?
9 ज़ुंणी बिधाता तम्हां लै कान दैनै, सह कै आप्पू शूणीं निं सकदअ?
तेऊ दैनी तम्हां लै आछी, सह कै आप्पू भाल़ी निं सकदअ?
10 सह नैरा सोभी देशा, सह कै सज़ा निं सकदअ दैई?
सह दैआ हाम्हां सोभी मणछा लै शिक्षा, आप्पू कै तेऊ का ज्ञैन निं आथी?
11 बिधाता हेरा भुझ़ी कि हाम्हैं सोभ किज़ै सोठा!
तेऊ का आसा थोघ कि हाम्हां मणछे सोर केही बृथा आसा। 94:11 1 करि. 3:20
12 हे बिधाता, तेऊ मणछे खुल़्हणै भाग ज़हा तूह नैरा अर
आपणअ बधान सखाऊआ।
13 तूह दैआ तिन्नां लै आफ़ता का राम अर
कदुष्ट मणछा ढाकणा लै डाहा तेतरी खात्ती खण्हीं।
14 किल्हैकि तूह बिधाता निं आपणीं परज़ा कल्ही छ़ाडदअ,
ज़ुंण तेरै आपणैं आसा, तिन्नां निं तूह आप्पू का दूर करदअ।
15 तेरी दालता दी हआ शुचअ नसाफ अर
धर्मीं मणछ दैआ तिन्नां गल्लो साथ।
16 ताह बिधाता छ़ाडी निं मुंह कदुष्ट मणछा का होर कोहै बच़ाऊई सकदअ।
तिन्नां नर्दैई लोगा लै ज़बाब दैंदअ आसा मुंह संघै तूह बिधाता ई खल़अ।
17 ज़ै तंऐं मेरी मज़त नांईं किई हंदी,
तै गई ती आझ़ा लै कधू मेरी ज़िन्दगी खतम हई!
18 ज़ेतरी हुंह फिशल़ुअ थिअ, तेतरी हेरअ तंऐं बिधाता आप्पै हुंह थम्हीं,
किल्हैकि तूह झ़ूरा मुल्है खास्सअ।
19 ज़ेभै मुंह खास्सअ हैल़अ फिकर हुअ,
तेभै दैनअ तंऐं बिधाता मुल्है हैअ अर खुशी।
20 भ्रष्ट पांच़ा संघै निं तूह हंदअ,
ज़ुंण गलत नसाफ करा।
21 तिंयां बणाआं धर्मीं मणछा मारना लै दल,
नर्दोश मणछा लै दैआ तिंयां मौते सज़ा।
22 पर तूह बिधाता करा मेरी फाज़त,
हुंह लआ ताह सेटा शरण।
23 हेर परमेशर, ताह दैणीं तिन्नें कदुष्ट कामां लै सज़ा,
तिन्नें पाप करनै पिछ़ू पाणै ताह तिंयां मारी।
हे परमेशर बिधाता, ताह करनै तिंयां पठी खतम।