1 बिधाते ज़ै-ज़ैकार करा!

ए बिधाते च़ाकरी करनै आल़ैओ, बिधाते नाओंए करा ज़ै-ज़ैकार।

2 ज़ुंण परमेशर बिधाते भबनै,

पबित्र ज़ैगा च़ाकरी करा,

3 तम्हैं सोभै करा बिधाते ज़ै-ज़ैकार। किल्हैकि सह आसा भलअ,

तेऊए ज़ै-ज़ैकार करना लै बोला गिहा किल्हैकि सह आसा झणैल़ू।

4 बिधाता छ़ांटअ याकब आप्पू लै,

मतलब इज़राईली बणाऐं तेऊ आपणीं खास परज़ा।

5 मुखा आसा थोघ कि बिधाता आसा महान,

सह आसा सोभी देअ-देबी का बडअ।

6 सरग, धरती अर डुघै समुंदरै

सका सह ज़िहअ तेऊओ दिल बोलअ तिहअ करी अर

तेऊ करी बी हेरअ खोज़ी।

7 सह आणा पृथूईए दुजै बाढा का बादल़,

सरग हणां लै लाआ सह गुल़ूबिज़ल़ू,

आपणैं भढारा का छ़ाडा सह बागरी।

8 मिसर देशे लोगे पाऐ तै बिधाता

मणछ अर डागै-धणे ज़ेठै शोहरू मारी।

9 तिधी दैनी ती बिधाता नुआहरै नछ़ैण अर च़मत्कार रहैऊई,

माहा राज़ै अर तेऊए कार करिंदै लै सज़ा।

10 तेऊ किऐ कई देश खतम अर

बडै-बडै जोधै राज़ै पाऐ मारी।

11 अमोरी लोगो राज़अ सिहोन,

बाशान देशो राज़अ ओग अर

कनान देशे निं कोहै राज़ै तेऊ ज़िऊंदै छ़ाडै।

12 तिन्‍नों देश अर ज़ैदात दैनी तेऊ

आपणीं परज़ा इज़राईली लै बांडी।

13 हे बिधाता, तेरअ नाअं रहणअ सदा अटल़,

तूह निं पोस्ती दर पोस्ती कोही बिस्सर्नअ।

14 ज़ुंण बिधाते च़ाकरी करे, तेऊ करनी तिन्‍नें च़ाकरी,

तिन्‍नें खरी भाल़ी करनी तेऊ तिन्‍नां लै झींण।

15 पराई ज़ातीए लोगे देअ-देबी आसा सुन्‍नैं-च़ंदीए,

तिंयां आसा मणछै आपणैं हाथै बणाऐं दै।

16 तिन्‍नें खाखा ता हआ पर तिंयां निं गल्‍ला करी सकदै,

तिन्‍नें आछी ता हआ पर शुझदअ निं तिन्‍नां का आथी!

17 तिन्‍नां मैहरे कान ता हआ पर तिंयां निं शूणीं सकदै,

नां तिन्‍नां दी शाह आथी!

18 ज़ुंणी तिंयां मुहुर्ती बणाईं अर ज़ुंण तिन्‍नां दी भरोस्सअ डाहा,

तिंयां बी हुऐ तिन्‍नां मुहुर्ती ई ज़िहै बृथा अर गुग्गै।

19 ओ इज़राईलीओ, बिधाते ज़ै-ज़ैकार करा,

तेऊ परमेशर बिधाता लै करा शूकर।

20 लेबी ज़ुंण हारणो खिंब बिधाते प्रोहत आसा, सोभै करा ज़ै-ज़ैकार।

बिधाते डरा हेठै रहणैं आल़ै करा सोभै तेऊए ज़ै-ज़ैकार।

21 सियोन नगरीओ मालक बिधाता आसा ज़ै-ज़ैकार करनै जोगी,

सह रहा एरुशलेम नगरी।

तेऊओ करा शूकर अर ज़ै-ज़ैकार।