1 हे बिधाता, मुल्है निं रोश्श करी नां सज़ा दैई,

नां तेभै मुंह नैरदअ लागी ज़ेभै ताह रोश्श होए आई दी।✝

2 हे बिधाता, मुल्है कर झींण! हुंह हुअ दुबल़अ,

तूह दै मुल्है बल, मुंह निं तराण ई रहै

3 अर मेरअ शाह चुटअ पठी।

हे बिधाता, ताह केभै तैणीं निं मेरी मज़त करनी?

4 हे बिधाता, फिरी एछ अर मुंह बच़ाऊ,

तूह बच़ाऊ मुंह मरनै का किल्हैकि तूह आसा खास्सअ झणैल़ू।

5 ज़ै हुंह मरी जाए, तेखअ निं हुंह ताह भज़ी सकदअ,

नां हुंह तेरअ शूकर करी सकदअ!

6 हुंह थक्‍कअ ऐबै धक्‍की-धक्‍की,

राची हआ कबल्‍लअ मेरअ च़ैन सिन्‍नअ

अर मेरअ शरैहण भिज़ा आशू करै पठी।

7 मेरी आछी फिरा लेरी-लेरी पाल्‍ली,

मेरै दुशमणै लरैऊअ हुंह इहअ कि

मुखा निस्सअ शुझुई बी, मेरी आछी आसा शुंआंईं दी।

8 कदुष्ट मणछो, मुंह सेटा का डेओआ पोर्ही!

बिधाता हेरी मेरी लेरा-पकारा शूणीं।✝

9 बिधाता हेरी मेरी लेर-पकार शूणीं कि मंऐं मांगी तेऊ का मज़त

अर ज़ुंण मंऐं अरज़ किई तेतो ज़बाब हेरनअ तेऊ दैई।

10 तेखअ हणैं मेरै दुशमण शर्मिंदै अर तिन्‍नां पल़णअ हैल़अ,

तिन्‍नां लागणअ पठी बेइज़त हई तिधा का छ़ेक्‍कै ठुहर्नअ।